കണ്ണൂരിലെ വിനോദസഞ്ചാര കേന്ദ്രങ്ങളിൽ സുരക്ഷാ സംവിധാനങ്ങൾ അപര്യാപ്തം; അപകടങ്ങൾ വർധിക്കുന്നു

കണ്ണൂർ ജില്ലയിലെ പ്രധാന വിനോദസഞ്ചാര കേന്ദ്രങ്ങളായ പയ്യാമ്പലം, മുഴപ്പിലങ്ങാട് ബീച്ചുകളിൽ എത്തുന്ന ഇതര സംസ്ഥാന വിനോദസഞ്ചാരികളുടെ എണ്ണത്തിൽ വലിയ വർധനവാണ് ഉണ്ടായിരിക്കുന്നത്. ജില്ലയിലെ വിവിധ ക്ഷേത്രങ്ങൾ സന്ദർശിച്ച ശേഷം ബീച്ചുകളിലേക്ക് എത്തുന്നവരാണ് ഇക്കൂട്ടരിൽ ഭൂരിഭാഗവും.

എന്നാൽ വിനോദസഞ്ചാരികളുടെ തിരക്ക് വർധിക്കുമ്പോൾ അതിനനുസരിച്ചുള്ള സുരക്ഷാ ക്രമീകരണങ്ങൾ ഒരുക്കാൻ ബന്ധപ്പെട്ട അധികൃതർക്ക് കഴിയുന്നില്ല എന്നത് വലിയ ആശങ്കയ്ക്ക് വഴിവെച്ചിരിക്കുകയാണ്.

പയ്യാമ്പലം ബീച്ചിലെ പ്രതിസന്ധികൾ അപകടസാധ്യതയേറിയ പയ്യാമ്പലം ബീച്ചിൽ സിസിടിവി ക്യാമറകളുടെ അഭാവം വലിയ വെല്ലുവിളിയാണ്. നടപ്പാതകളിൽ തെരുവുവിളക്കുകൾ പ്രകാശിക്കാത്തതിനാൽ രാത്രികാലങ്ങളിൽ കടലിലിറങ്ങുന്നവരെ കണ്ടെത്താൻ സുരക്ഷാ ഉദ്യോഗസ്ഥർക്ക് സാധിക്കുന്നില്ല.

നിലവിൽ വേലിയേറ്റ സമയങ്ങളിൽ കടലിൽ ഇറങ്ങരുത് എന്ന് സൂചിപ്പിക്കുന്ന നാല് ഭാഷയിലുള്ള ബോർഡ് മാത്രമാണ് ഇവിടെയുള്ളത്. ബീച്ചിനെ ഗ്രീൻ, റെഡ് സോണുകളായി തിരിച്ചിട്ടില്ലാത്തതും സുരക്ഷാ വീഴ്ചയായി ചൂണ്ടിക്കാണിക്കപ്പെടുന്നു.

കഴിഞ്ഞ രണ്ട് വർഷത്തിനിടെ ബീച്ചിൽ മുങ്ങിമരിച്ച ആറുപേരിൽ അഞ്ചുപേരും കർണാടക സ്വദേശികളാണ്. നിലവിൽ ആറ് ലൈഫ് ഗാർഡുകളാണ് ഇവിടെ സേവനമനുഷ്ഠിക്കുന്നത്.

എന്നാൽ മൂന്ന് ഡ്യൂട്ടി പോയിന്റുകളിലായി കുറഞ്ഞത് രണ്ട് ഗാർഡുകൾ വീതമെങ്കിലും വേണമെന്നാണ് ആവശ്യം. ‘‘ സർക്കാർ ഇപ്പോഴും പഴയ പരിശീലന രീതിയാണ് പിന്തുടരുന്നത്.

റെസ്ക്യൂ കാൻ, ജെറ്റ് സ്കീ തുടങ്ങിയ അത്യാധുനിക രക്ഷാപ്രവർത്തന ഉപകരണങ്ങൾ കൊണ്ടു വരണം’’– പയ്യാമ്പലം ബീച്ചിലെ ഒരു ലൈഫ് ഗാർഡ് പറഞ്ഞു. അഗ്നിരക്ഷാസേനയ്ക്ക് പകൽ സമയങ്ങളിൽ മാത്രമാണ് തിരച്ചിൽ നടത്താനുള്ള സംവിധാനങ്ങളുള്ളത്.

രാത്രികാലങ്ങളിൽ കടലിൽ കാണാതാകുന്നവരെ തിരയാനുള്ള അത്യാധുനിക സംവിധാനങ്ങൾ ഇതുവരെയും ലഭ്യമായിട്ടില്ല. മുഴപ്പിലങ്ങാട് ഡ്രൈവ്-ഇൻ ബീച്ചിലെ സ്ഥിതി കേരളത്തിലെ ഏക ഡ്രൈവ്-ഇൻ ബീച്ചായ മുഴപ്പിലങ്ങാട് സന്ദർശകരുടെ തിരക്ക് ദിനംപ്രതി ഏറിവരികയാണ്.

കൊട്ടിയൂർ ഉത്സവത്തോടനുബന്ധിച്ച് എത്തുന്നവർ ബീച്ചിലെത്തുന്നതാണ് തിരക്ക് വർധിക്കാൻ കാരണം. ഇവിടെ 20 കിലോമീറ്റർ വേഗപരിധി നിശ്ചയിച്ചിട്ടുണ്ടെങ്കിലും പലരും 60 കിലോമീറ്റർ വരെ വേഗതയിൽ വാഹനങ്ങൾ ഓടിക്കുന്നത് അപകടങ്ങൾക്ക് വഴിവയ്ക്കുന്നു.

പത്ത് ലൈഫ് ഗാർഡുകൾ വേണ്ട സ്ഥാനത്ത് നാല് പേർ മാത്രമാണ് ഇവിടെയുള്ളത്.

രാത്രികാലങ്ങളിൽ സുരക്ഷാ ഉദ്യോഗസ്ഥരുടെ സേവനം പൂർണമായും ലഭ്യമല്ല. എടക്കാട് മുതൽ ധർമ്മടം തുരുത്ത് വരെയുള്ള നാലര കിലോമീറ്റർ നീളുന്ന തീരത്ത് സന്ദർശകരെ നിയന്ത്രിക്കാൻ ആവശ്യമായ സംവിധാനങ്ങളില്ല.

മതിയായ സൈൻ ബോർഡുകളോ ഡ്രോൺ നിരീക്ഷണ സംവിധാനമോ ഇവിടെയില്ല. അത്യാഹിതങ്ങൾ സംഭവിച്ചാൽ രോഗികളെ ആശുപത്രിയിലെത്തിക്കാൻ റോഡിന്റെ വീതിക്കുറവും വലിയ തടസ്സമാണെന്ന് പഞ്ചായത്ത് അംഗം രാജേഷ് വ്യക്തമാക്കുന്നു.

തീരത്ത് മഴക്കാലത്ത് സുരക്ഷയ്ക്കായി റിബൺ കെട്ടി വേർതിരിക്കാറുണ്ടെങ്കിലും ഇത് കാര്യക്ഷമമല്ല. ശക്തമായ കടൽക്ഷോഭ സമയങ്ങളിൽ വിനോദസഞ്ചാരികളെ കർശനമായി തടയാൻ സംവിധാനമില്ലാത്തത് അപകടങ്ങൾക്ക് കാരണമാകുന്നു.

അതേസമയം, സഞ്ചാരികളുടെ സുരക്ഷ മുൻനിർത്തി രണ്ട് ലൈഫ് ഗാർഡുമാരെ കൂടി നിയമിക്കാൻ മന്ത്രി ഉത്തരവിട്ടിട്ടുണ്ടെന്നും അവർ ഉടൻ ജോലിയിൽ പ്രവേശിക്കുമെന്നും ടി.ഒ. മോഹനൻ എംഎൽഎ അറിയിച്ചു.