നീലേശ്വരത്തെ ദേശീയപാത വികസനം: അശാസ്ത്രീയ നിർമാണത്തിനെതിരെ ശക്തമായ പ്രതിഷേധം

കാസർകോട് ജില്ലയിലെ പ്രധാന നഗരങ്ങളിലൊന്നായ നീലേശ്വരത്ത് നടപ്പിലാക്കുന്ന ദേശീയപാത വികസന പദ്ധതി പ്രദേശവാസികൾക്കിടയിൽ കടുത്ത ആശങ്ക ഉയർത്തുന്നു. കാസർകോട് നഗരത്തിൽ എലിവേറ്റഡ് ബ്രിജ് നിർമ്മിച്ച് ഗതാഗത സൗകര്യങ്ങൾ മെച്ചപ്പെടുത്തിയ മാതൃക നീലേശ്വരത്തും പിന്തുടരണമെന്നാണ് നാട്ടുകാരുടെ പ്രധാന ആവശ്യം.

എന്നാൽ, ഇവിടെ നഗരഹൃദയത്തിലൂടെ മണ്ണിട്ടുയർത്തിയ പാത (എംബാങ്ക്മെന്റ്) നിർമിക്കുന്നതിലൂടെ നഗരത്തിന്റെ വികസന സാധ്യതകൾ ഇല്ലാതാക്കുകയാണെന്ന് വിമർശനം ഉയരുന്നു. നിർമാണത്തിലെ അശാസ്ത്രീയതയും സുരക്ഷാ ആശങ്കകളും
കോട്ടപ്പുറം റോഡ് മുതൽ മന്ദംപുറം പെട്രോൾ പമ്പ് വരെയുള്ള 360 മീറ്റർ ഭാഗത്ത് എലിവേറ്റഡ് ബ്രിജ് നിർമിക്കണമെന്ന ആവശ്യം 2023-ൽ തന്നെ കേന്ദ്ര ഉപരിതല ഗതാഗത വകുപ്പ് മന്ത്രി നിതിൻ ഗഡ്കരിക്ക് നൽകിയ നിവേദനത്തിൽ ഉന്നയിച്ചിരുന്നെങ്കിലും അനുകൂല നടപടികളുണ്ടായില്ല.

ചതുപ്പുനിലങ്ങൾക്ക് മുകളിൽ എംബാങ്ക്മെന്റ് നിർമിക്കുന്നത് അപകടകരമാണെന്ന് ചൂണ്ടിക്കാട്ടി നെടുങ്ങണ്ട ഉൾപ്പെടെയുള്ള പ്രദേശങ്ങളിലെ സംഭവങ്ങൾ ജനങ്ങൾ ഉദാഹരണമായി ചൂണ്ടിക്കാട്ടുന്നു. നിർമാണത്തിനിടെ മണ്ണുമാന്തി യന്ത്രം താഴുകയും റോഡിൽ വിള്ളലുകൾ രൂപപ്പെടുകയും ചെയ്തത് പ്രദേശവാസികളുടെ ഭീതി വർധിപ്പിച്ചിരിക്കുകയാണ്.

കൂടാതെ, മഴക്കാലത്ത് സർവീസ് റോഡുകളിൽ വെള്ളക്കെട്ട് രൂപപ്പെടുന്നതും പതിവായി മാറി. പഴയ പാലത്തിന്റെ അവസ്ഥ
2023 സെപ്റ്റംബർ 18-ന് തിരുവനന്തപുരത്ത് നടന്ന ഉന്നതതല യോഗത്തിൽ 1957-ൽ നിർമിച്ച മാർക്കറ്റിലെ പഴയ പാലം പൊളിച്ചുമാറ്റണമെന്ന തീരുമാനമുണ്ടായിരുന്നു.

ഇൻലാൻഡ് നാവിഗേഷൻ അതോറിറ്റിയുടെ മാനദണ്ഡപ്രകാരം പുതിയ പാലം നിർമിക്കണമെന്നായിരുന്നു നിർദേശം. എന്നാൽ, 68 വർഷം പഴക്കമുള്ള പാലം ഇതുവരെ നീക്കം ചെയ്തിട്ടില്ല.

ഡിപിആർ പ്രകാരമുള്ള നിർമാണങ്ങൾ പൂർത്തിയാക്കാൻ എന്താണ് തടസ്സമെന്ന ചോദ്യം ശക്തമാണ്. പരിസ്ഥിതിയും സുരക്ഷയും
ചെങ്കൽക്കുന്നുകൾ ഇടിച്ച് മണ്ണെടുക്കുന്നതും വീരമലക്കുന്നിന്റെ നാശവും നിർമാണ രീതിയെച്ചൊല്ലി വലിയ വിവാദങ്ങൾക്കാണ് വഴിവെച്ചത്.

മണ്ണ് ഖനനവുമായി ബന്ധപ്പെട്ട് നിർമാണ കമ്പനിയായ മേഘ കൺസ്ട്രക്‌ഷൻസിന് മൈനിങ് ആൻഡ് ജിയോളജി വകുപ്പ് പിഴ ചുമത്തിയത് ഗുരുതരമായ വീഴ്ചകൾ നടന്നുവെന്ന ആരോപണത്തിന് ബലമേകുന്നു. എൻകെബിഎം എയുപി സ്കൂളിന് സമീപത്തുകൂടി കടന്നുപോകുന്ന പാതയിലെ സുരക്ഷാ ക്രമീകരണങ്ങൾ പാലിക്കണമെന്നും സ്കൂൾ അധികൃതരും രക്ഷിതാക്കളും ആവശ്യപ്പെടുന്നു.

തുടരുന്ന ജനകീയ പ്രക്ഷോഭം
അശാസ്ത്രീയമായ നിർമാണത്തിനെതിരെ നീലേശ്വരം നഗരസഭാ ഭരണസമിതിയുടെ നേതൃത്വത്തിൽ 43 ദിവസവും, ജനകീയ സമരസമിതിയുടെ നേതൃത്വത്തിൽ 81 ദിവസവും നീണ്ടുനിൽക്കുന്ന അനിശ്ചിതകാല സമരം തുടരുകയാണ്. പള്ളിക്കര റെയിൽവേ മേൽപാലത്തിന്റെ ദയനീയാവസ്ഥ ചൂണ്ടിക്കാട്ടി, ഇനിയെങ്കിലും അധികൃതർ കണ്ണുതുറക്കണമെന്നാണ് നാട്ടുകാരുടെ ഏകസ്വരത്തിലുള്ള ആവശ്യം.