സുസുക്കി ഫ്രോങ്ക്സ് സ്‌പോർട് മലേഷ്യയിൽ പുറത്തിറങ്ങി; കൂടുതൽ കരുത്തുമായി പുതിയ വകഭേദം

ജപ്പാനിലെ പ്രമുഖ വാഹന നിർമ്മാതാക്കളായ സുസുക്കി തങ്ങളുടെ ജനപ്രിയ കോംപാക്റ്റ് എസ്‌യുവിയായ ഫ്രോങ്ക്സിന്റെ പുതിയ ‘സ്‌പോർട്’ പതിപ്പ് മലേഷ്യൻ വിപണിയിൽ അവതരിപ്പിച്ചു. സാധാരണ മോഡലിനേക്കാൾ കൂടുതൽ ആകർഷകവും സ്‌പോർട്ടിയുമായ ഡിസൈൻ ശൈലിയാണ് ഇതിൽ പരീക്ഷിച്ചിരിക്കുന്നത്.

ഇന്തോനേഷ്യയിൽ നിന്ന് സിബിയു (CBU) യൂണിറ്റായി ഇറക്കുമതി ചെയ്യുന്നതിനാലാണ് മലേഷ്യയിൽ ഈ വാഹനത്തിന് ഉയർന്ന വില നിശ്ചയിച്ചിരിക്കുന്നത്. വിലയും ലഭ്യതയും
മലേഷ്യൻ വിപണിയിൽ അടിസ്ഥാന ഫ്രോങ്ക്സ് മോഡലിന് MYR 1,18,888 (ഏകദേശം 27.89 ലക്ഷം ഇന്ത്യൻ രൂപ) ആണ് വിലയെങ്കിൽ, പുതിയ ഫ്രോങ്ക്സ് സ്‌പോർട്ട് പതിപ്പിനായി MYR 1,30,888 (ഏകദേശം 30.70 ലക്ഷം രൂപ) മുടക്കേണ്ടി വരും.

മോണോടോൺ കൂൾ ബ്ലാക്ക്, ഡ്യുവൽ-ടോൺ പേൾ സ്നോ വൈറ്റ് എന്നീ രണ്ട് കളർ ഓപ്ഷനുകളിലാണ് വാഹനം ലഭ്യമാവുക. ഡിസൈൻ പ്രത്യേകതകൾ
യുവതലമുറയെ ലക്ഷ്യമിട്ടുള്ളതാണ് ഈ പുതിയ മോഡൽ.

എസ്‌യുവിക്ക് ഗൗരവമേറിയ ലുക്ക് നൽകാനായി മുൻവശത്ത് കറുത്ത ഗ്രില്ലും കറുത്ത സുസുക്കി ലോഗോയും നൽകിയിട്ടുണ്ട്. ഫ്രണ്ട് ബമ്പറിൽ പുതിയ ലോവർ ലിപ് എക്സ്റ്റൻഷൻ നൽകിയതോടെ സ്‌പോർട്ടി ഭാവം വർധിച്ചു.

പുതിയ സൈഡ് സ്‌കർട്ടുകൾ, ഫ്രോങ്ക്സ് സ്‌പോർട്ട് ഡെക്കലുകൾ, 215/50R17 അളവിലുള്ള കോണ്ടിനെന്റൽ അൾട്രാകോൺടാക്റ്റ് UC7 ടയറുകളോട് കൂടിയ 17 ഇഞ്ച് അലോയ് വീലുകൾ എന്നിവ വാഹനത്തിന് കരുത്തുറ്റ രൂപം നൽകുന്നു. പിൻഭാഗത്ത് പുതിയ ഡിഫ്യൂസറും ടെയിൽഗേറ്റിൽ ഘടിപ്പിച്ച സ്‌പോയിലറും വാഹനത്തിന്റെ മാറ്റുകൂട്ടുന്നു.

ഇന്റീരിയറും സുരക്ഷയും
വാഹനത്തിനുള്ളിലെ പ്രധാന മാറ്റം മുൻഭാഗത്തും പിൻഭാഗത്തും ഉൾപ്പെടുത്തിയ 4K ഡാഷ്‌ക്യാമാണ്. തുകൽ പൊതിഞ്ഞ ത്രീ-സ്‌പോക്ക് സ്റ്റിയറിംഗ് വീൽ, ഷിഫ്റ്റ് പാഡിൽസ്, വയർലെസ് ഫോൺ ചാർജിംഗ്, ആപ്പിൾ കാർപ്ലേ, ആൻഡ്രോയിഡ് പിന്തുണ തുടങ്ങിയ സൗകര്യങ്ങൾ ഇതിലുണ്ട്.

ബ്ലൈൻഡ് സ്പോട്ട് മോണിറ്റർ, അഡാപ്റ്റീവ് ക്രൂയിസ് കൺട്രോൾ, ലെയ്ൻ കീപ്പ് അസിസ്റ്റ്, റിയർ ക്രോസ്-ട്രാഫിക് അലേർട്ട് എന്നിവയുൾപ്പെടെയുള്ള ആധുനിക എഡിഎഎസ് (ADAS) സുരക്ഷാ സംവിധാനങ്ങൾ വാഹനത്തിൽ ഉൾപ്പെടുത്തിയിട്ടുണ്ട്. ആറ് എയർബാഗുകൾ, ഹിൽ ഹോൾഡ് അസിസ്റ്റ്, ഇലക്ട്രോണിക് സ്റ്റെബിലിറ്റി കൺട്രോൾ തുടങ്ങിയ സുരക്ഷാ ക്രമീകരണങ്ങളും സ്റ്റാൻഡേർഡായി ലഭിക്കും.

എഞ്ചിൻ കരുത്ത്
മലേഷ്യൻ വിപണിയിൽ K15C 1.5 ലിറ്റർ, 4-സിലിണ്ടർ നാച്ചുറലി ആസ്പിറേറ്റഡ് പെട്രോൾ എഞ്ചിനിലാണ് വാഹനം എത്തുന്നത്. മൈൽഡ്-ഹൈബ്രിഡ് സംവിധാനമുള്ള ഈ എഞ്ചിൻ 103 PS പവറും 138 Nm ടോർക്കും ഉത്പാദിപ്പിക്കുന്നു.

6-സ്പീഡ് ഓട്ടോമാറ്റിക് ട്രാൻസ്മിഷനാണ് ഇതിൽ ഉപയോഗിച്ചിരിക്കുന്നത്.