മലയാള സിനിമയുടെ പ്രിയതാരവും മികച്ച ഹാസ്യാഭിനേതാവുമായ സലിംകുമാര് വിടവാങ്ങി. പറവൂരിലെ വസതിയില് വെച്ച് ഔദ്യോഗിക ബഹുമതികളോടെയാണ് അദ്ദേഹത്തിന്റെ സംസ്കാര ചടങ്ങുകള് പൂര്ത്തിയായത്.
രാവിലെ എട്ടുമണിയോടെ പൊതുദര്ശനത്തിനായി അദ്ദേഹത്തിന്റെ ഭൗതികശരീരം പറവൂര് ടൗണ്ഹാളിലേക്ക് മാറ്റി. കനത്ത മഴയെ അവഗണിച്ചും സാംസ്കാരിക പ്രവര്ത്തകരും സുഹൃത്തുക്കളും നാട്ടുകാരും അടക്കം ആയിരക്കണക്കിന് ആളുകളാണ് പ്രിയതാരത്തിന് അന്ത്യാഞ്ജലി അര്പ്പിക്കാന് എത്തിയത്.
വിവിധ രാഷ്ട്രീയ-ഭരണ രംഗത്തുള്ള പ്രമുഖര് ടൗണ്ഹാളിലെത്തി ആദരാഞ്ജലികള് അര്പ്പിച്ചു. തുടര്ന്ന് ഭൗതികശരീരം വീട്ടിലെത്തിച്ചപ്പോഴും അന്തിമോപചാരം അര്പ്പിക്കാന് വന് ജനാവലിയാണ് തടിച്ചുകൂടിയത്.
വൈകുന്നേരം മൂന്നരയോടെ സര്ക്കാരിന്റെ ഔദ്യോഗിക ബഹുമതികളോടെയായിരുന്നു അന്ത്യകര്മ്മങ്ങള്. മകന് ചന്തു ചിതയ്ക്ക് തീ പകര്ന്നു.
അന്ത്യകര്മ്മങ്ങളില് സാക്ഷ്യം വഹിക്കാന് മുഖ്യമന്ത്രി വിഡി സതീശന്, എഐസിസി ജനറല് സെക്രട്ടറി കെസി വേണുഗോപാല്, മന്ത്രി പിസി വിഷ്ണുനാഥ്, ഡെപ്യൂട്ടി സ്പീക്കര് ഷാനിമോള് ഉസ്മാന്, എംഎല്എമാരായ അന്വര് സാദത്ത്, രമേശ് പിഷാരടി തുടങ്ങിയ പ്രമുഖര് എത്തിച്ചേര്ന്നിരുന്നു. മലയാളികളുടെ മനസ്സില് ചിരിയുടെ മായാത്ത ഓര്മ്മകള് ബാക്കിവെച്ചാണ് അദ്ദേഹം വിടവാങ്ങിയത്.
