സംസ്ഥാനത്ത് പൂട്ടിക്കിടക്കുന്ന കള്ള് ഷാപ്പുകൾ തുറക്കാൻ സർക്കാർ തലത്തിൽ നീക്കം

സംസ്ഥാനത്ത് വിവിധ കാരണങ്ങളാൽ പ്രവർത്തനം നിർത്തിവെച്ച കള്ള് ഷാപ്പുകൾ വീണ്ടും തുറക്കുന്നതിനുള്ള നടപടികൾ സർക്കാർ തലത്തിൽ സജീവ പരിഗണനയിൽ. വിഷയം സംബന്ധിച്ച സാധ്യതകൾ പരിശോധിക്കുന്നതിനായി എക്സൈസ് വകുപ്പ് മന്ത്രിയുടെ നേതൃത്വത്തിൽ പ്രത്യേക ചർച്ചകൾ നടക്കും.

പരമ്പരാഗത തൊഴിൽ മേഖലയായ കള്ള് വ്യവസായം നേരിടുന്ന ഗുരുതരമായ പ്രതിസന്ധികൾ കണക്കിലെടുത്ത് സർക്കാരിൽ നിന്നും അനുകൂലമായ തീരുമാനമുണ്ടാകുമെന്ന പ്രതീക്ഷയിലാണ് ഷാപ്പ് ഉടമകളും തൊഴിലാളികളും. കഴിഞ്ഞ സർക്കാരിന്റെ കാലയളവിൽ സംസ്ഥാനത്ത് മൊത്തം 1,460 കള്ള് ഷാപ്പുകളാണ് പൂട്ടിയത്.

ഈ നടപടി മൂലം 4,500-ലേറെ തൊഴിലാളികളുടെ ഉപജീവനമാർഗ്ഗമാണ് വഴിമുട്ടിയത്. സംസ്ഥാനത്ത് ബിവറേജസ് ഔട്ട്‌ലെറ്റുകളുടെയും ബാറുകളുടെയും എണ്ണം വർദ്ധിച്ചതോടെ വിൽപ്പനയിൽ ഉണ്ടായ കുറവും തുടർന്നുണ്ടായ സാമ്പത്തിക പ്രതിസന്ധിയുമാണ് മിക്ക ഷാപ്പുകളും അടച്ചുപൂട്ടാൻ ഇടയാക്കിയത്.

ഒരിക്കൽ പൂട്ടിയ ഷാപ്പുകൾ വീണ്ടും തുറക്കുന്നതിന് നിലവിൽ ഒട്ടേറെ നിയമപരമായ വെല്ലുവിളികളും പ്രായോഗിക തടസ്സങ്ങളുമുണ്ട്. കെട്ടിടങ്ങളുടെ ഉയർന്ന വാടകയും പ്രാദേശിക തലത്തിലുള്ള ശക്തമായ എതിർപ്പുകളും ഇതിൽ പ്രധാനമാണ്.

പതിറ്റാണ്ടുകളായി ഈ പരമ്പരാഗത തൊഴിലിനെ മാത്രം ആശ്രയിച്ച് ഉപജീവനം നടത്തിയിരുന്ന നിരവധി കുടുംബങ്ങളാണ് നിലവിൽ കടുത്ത സാമ്പത്തിക പ്രതിസന്ധിയിൽ അകപ്പെട്ടിരിക്കുന്നത്.