ചാത്തന്നൂരിൽ ശക്തമായ മഴ; ദേശീയപാതയിൽ വെള്ളക്കെട്ട്, വ്യാപാരസ്ഥാപനങ്ങളിൽ ലക്ഷങ്ങളുടെ നാശനഷ്ടം

ചാത്തന്നൂർ മേഖലയിൽ വെള്ളിയാഴ്ച രാത്രി രണ്ടു മണിക്ക് ശേഷം പെയ്ത ശക്തമായ മഴയിൽ ദേശീയപാത വെള്ളത്തിനടിയിലായി. ദേശീയപാത വികസനത്തിന് പിന്നാലെ രൂപപ്പെട്ട

വെള്ളക്കെട്ട് ഭീഷണി ഇത്തവണയും പരിഹാരമില്ലാതെ തുടരുകയാണ്. സർവീസ് റോഡ് പൂർണമായും വെള്ളത്തിൽ മുങ്ങിയതോടെ ഗതാഗതം സ്തംഭിക്കുകയും സമീപത്തെ മുപ്പതോളം കടകളിലും ഫ്ലാറ്റ് സമുച്ചയങ്ങളിലും വീടുകളിലും വെള്ളം കയറി നാശനഷ്ടങ്ങൾ സംഭവിക്കുകയും ചെയ്തു.

നാശനഷ്ടങ്ങളുടെ വ്യാപ്തി
കനറാ ബാങ്കിന് സമീപമുള്ള ആവണി ജ്വല്ലറി, ഐക്കര മൊബൈൽ ഷോപ്പ്, നന്ദനം സ്വർണപ്പണയ സ്ഥാപനം പ്രവർത്തിക്കുന്ന കെട്ടിടം, പ്രിൻസ് ഡ്രൈവിങ് സ്കൂൾ കെട്ടിടത്തിലെ ഏഴ് കടമുറികൾ എന്നിവയിൽ വലിയ തോതിൽ വെള്ളം കയറി. ഇൻവെർട്ടറുകൾ, പ്രിന്ററുകൾ, ബാറ്ററികൾ, കംപ്യൂട്ടറുകൾ, നോട്ട് എണ്ണുന്ന യന്ത്രങ്ങൾ, ഫർണിച്ചർ, വിവിധ രേഖകൾ എന്നിവ നശിച്ചതിലൂടെ ലക്ഷക്കണക്കിന് രൂപയുടെ നഷ്ടമാണ് വ്യാപാരികൾക്കുണ്ടായിരിക്കുന്നത്.

കച്ചവടക്കാർ മുൻകരുതലായി നിർമിച്ച സിമന്റ് തിട്ടകളെ മറികടന്നാണ് വെള്ളം കടകളിലേക്ക് ഇരച്ചുകയറിയത്. റോഡിലൂടെ കടന്നുപോയ വാഹനങ്ങൾ വെള്ളം തെറിപ്പിച്ചത് നാശനഷ്ടങ്ങളുടെ ആക്കം കൂട്ടി.

ദുരിതത്തിലായ പ്രദേശങ്ങൾ
കാഞ്ഞിരംവിള ജംക്‌ഷൻ മുതൽ ചാത്തന്നൂർ ഹൈസ്കൂൾ ജംക്‌ഷൻ വരെ സർവീസ് റോഡ് പൂർണമായും വെള്ളത്തിനടിയിലാണ്. മാവിലഴികം റോഡിലൂടെ കുത്തിയൊലിച്ചെത്തിയ വെള്ളം മിന റസിഡൻസിയുടെ പിൻമതിൽ തകർത്തു.

ഫ്ലാറ്റിനുള്ളിലും വെള്ളം കയറി. റോഡിന്റെ ടാറിങ് ഭാഗം നിലനിൽക്കുമ്പോൾ അടിയിലെ മണ്ണ് ഒലിച്ചുപോയ സ്ഥിതിയിലാണ് മാവിലഴികം റോഡ് ഇപ്പോൾ ഉള്ളത്.

റീജനൽ ബാങ്കിന് എതിർവശം, റോയൽ ആശുപത്രിക്ക് എതിർവശം, പെട്രോൾ പമ്പിന് എതിർവശം എന്നിവിടങ്ങളിലും സമാനമായ രീതിയിൽ വെള്ളപ്പൊക്കമുണ്ടായി. പരിഹാരമില്ലാത്ത പ്രതിസന്ധി
ദേശീയപാത അതോറിറ്റിയുടെ അനാസ്ഥയാണ് ഈ ദുരിതത്തിന് കാരണമെന്ന ആക്ഷേപം ശക്തമാണ്.

മഴവെള്ളം ഒഴുകിപ്പോകാനുള്ള ഓടകളിലെ സുഷിരങ്ങൾ മാലിന്യവും മണ്ണും നിറഞ്ഞ് അടഞ്ഞുകിടക്കുകയാണ്. കനറാ ബാങ്കിന് കിഴക്കുഭാഗത്ത് ഒരാഴ്ച മുൻപ് ഗ്രിൽ സ്ഥാപിച്ചെങ്കിലും മാലിന്യം അടിഞ്ഞുകൂടി നീരൊഴുക്ക് തടസ്സപ്പെട്ടു.

റോഡിന്റെ ഭിത്തിയിലെ ഓവുകൾ റോഡ് നിരപ്പിൽ നിന്ന് ഉയർന്ന് നിൽക്കുന്നതിനാൽ വെള്ളം ഒഴിഞ്ഞുപോകാത്ത അവസ്ഥയുമുണ്ട്. വെള്ളം കയറിയതിനെത്തുടർന്ന് പ്രദേശത്തെ വീട്ടമ്മയുടെ ആരോഗ്യനില വഷളാവുകയും ആശുപത്രിയിൽ പ്രവേശിപ്പിക്കുകയും ചെയ്തു.

മേവറം മുതൽ കടമ്പാട്ടുകോണം വരെയുള്ള ഭാഗത്തെ വെള്ളക്കെട്ട് ഒഴിവാക്കാൻ ശാസ്ത്രീയമായ പഠനം നടത്തി അടിയന്തര നടപടി സ്വീകരിക്കണമെന്നാണ് നാട്ടുകാരുടെ ആവശ്യം.