സംസ്ഥാനത്തെ സ്വർണ വിപണിയിൽ വില ഇടിവ് തുടരുന്നു. തുടർച്ചയായ രണ്ടാം ദിവസവും സ്വർണത്തിന് വില കുറഞ്ഞു.
ഇന്ന് ഒരു ഗ്രാം സ്വർണത്തിന് 40 രൂപ കുറഞ്ഞ് 14,580 രൂപയിലാണ് വ്യാപാരം നടക്കുന്നത്. പവന് 320 രൂപയുടെ കുറവാണ് രേഖപ്പെടുത്തിയത്, ഇതോടെ വില 1,16,640 രൂപയായി മാറി.
രാജ്യാന്തര വിപണിയിൽ സ്വർണത്തിന്റെ മൂല്യം കുറഞ്ഞതാണ് ആഭ്യന്തര വിപണിയിലും പ്രതിഫലിക്കുന്നത്. കഴിഞ്ഞ പത്ത് ദിവസത്തിനുള്ളിൽ മാത്രം കേരളത്തിൽ സ്വർണം പവന് 6,480 രൂപയാണ് കുറഞ്ഞത്.
സ്വർണ ഇറക്കുമതി തീരുവ വർധിപ്പിച്ചതിന് പിന്നാലെ മേയ് 13-ന് രേഖപ്പെടുത്തിയ 1,23,120 രൂപയാണ് ഈ മാസത്തെ റെക്കോർഡ് വില. വില കുറയാനുള്ള കാരണങ്ങൾ
യുഎസ്-ഇറാൻ സമാധാന കരാർ വൈകിയേക്കുമെന്ന വാർത്തകളെ തുടർന്ന് ക്രൂഡ് ഓയിൽ വിലയിലുണ്ടായ വർധന ഡോളറിന്റെ മൂല്യത്തെ സ്വാധീനിച്ചു.
ഡോളർ സൂചിക 0.07 ശതമാനം ഉയർന്ന് 99.26 എന്ന നിലയിലെത്തിയത് സ്വർണ വിപണിക്ക് തിരിച്ചടിയായി. കൂടാതെ, വർഷാവസാനത്തോടെ അടിസ്ഥാന പലിശ നിരക്ക് ഉയർത്തിയേക്കുമെന്ന റിപ്പോർട്ടുകളും വില കുറയാൻ കാരണമായി.
യുഎസ് ഫെഡറൽ റിസർവ് ചെയർമാനായി ചുമതലയേറ്റ കെവിൻ വാഷിന്റെ നിലപാടുകളും പലിശ നിരക്കിലെ മാറ്റങ്ങളും നിക്ഷേപകരിൽ ആശങ്കയുണ്ടാക്കുന്നുണ്ട്. പലിശ നിരക്ക് ഉയർത്തിയാൽ നിക്ഷേപകർ ബോണ്ടുകളിലേക്ക് മാറാൻ സാധ്യതയുണ്ട്, ഇത് സ്വർണത്തോടുള്ള ഡിമാൻഡ് കുറയാൻ കാരണമാകും.
വിപണിയിലെ പ്രതിസന്ധി
രാജ്യത്തെ ആഭരണ വിപണി കടുത്ത പ്രതിസന്ധിയിലേക്കാണ് നീങ്ങുന്നതെന്നാണ് റിപ്പോർട്ടുകൾ. ആഭരണങ്ങൾ, കോയിനുകൾ, ബാറുകൾ എന്നിവയുടെ വിൽപനയിൽ 13-15 ശതമാനം വരെ ഇടിവുണ്ടാകുമെന്നും, ഇത് പതിറ്റാണ്ടിലെ ഏറ്റവും കുറഞ്ഞ നിരക്കായിരിക്കുമെന്നും വിലയിരുത്തപ്പെടുന്നു.
ക്രിസിൽ റേറ്റിങ്ങിന്റെ റിപ്പോർട്ട് പ്രകാരം, വിൽപന കുറഞ്ഞാലും ഈ മേഖലയിലെ വരുമാനത്തിൽ 20-25 ശതമാനം വരെ വർധനവ് പ്രതീക്ഷിക്കുന്നുണ്ട്. 2026 സാമ്പത്തിക വർഷത്തിൽ ഇന്ത്യ 720 ടൺ സ്വർണം ഇറക്കുമതി ചെയ്തതിന് 7200 കോടി ഡോളറാണ് ചെലവായത്.
വിദേശനാണ്യ ശേഖരം സംരക്ഷിക്കുന്നതിന്റെ ഭാഗമായി സ്വർണ ഇറക്കുമതി തീരുവ 15 ശതമാനമായി കേന്ദ്ര സർക്കാർ ഉയർത്തിയിരുന്നു. ആഭരണം വാങ്ങുമ്പോൾ
സംസ്ഥാനത്തെ ഇന്നത്തെ നിരക്കിൽ ഒരു പവൻ സ്വർണാഭരണം വാങ്ങുന്നതിന് പണിക്കൂലി കൂടി കണക്കിലെടുക്കുമ്പോൾ ഏകദേശം 1,32,200 രൂപയെങ്കിലും ചെലവാകും.
ആഭരണങ്ങളുടെ ഡിസൈൻ അനുസരിച്ച് പണിക്കൂലിയിൽ മൂന്നു മുതൽ മുപ്പതു ശതമാനം വരെ വ്യത്യാസം വരാം. ഇതിനുപുറമെ 3 ശതമാനം ജിഎസ്ടിയും ഹോൾമാർക്കിങ് ചാർജും അധികമായി നൽകണം.
18 കാരറ്റ് സ്വർണത്തിന് ഗ്രാമിന് 12,045 രൂപയാണ് വില. ചില ജ്വല്ലറികളിൽ ഇത് 11,980 രൂപ നിരക്കിലും ലഭ്യമാണ്.
വെള്ളി വില ഗ്രാമിന് 285 രൂപയായി തുടരുന്നു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
