കോർപറേറ്റ് ജോലി ഉപേക്ഷിച്ചു; എഐ സാങ്കേതികവിദ്യയിലൂടെ ലക്ഷങ്ങൾക്കൊരു തൊഴിൽ ദാതാവായി ‘സാപ്പിഹയർ’

ഉന്നത കോർപറേറ്റ് കമ്പനികളിലെ പതിനഞ്ച് വർഷത്തെ ഔദ്യോഗിക ജീവിതത്തിന് വിരാമമിട്ടാണ് ആലപ്പുഴ സ്വദേശിയായ ദീപു സേവ്യറും എറണാകുളം പിറവം സ്വദേശിയായ ജ്യോതിസും സ്വന്തം സംരംഭമെന്ന സ്വപ്നത്തിലേക്ക് ചുവടുവെച്ചത്. തൊഴിൽ തേടുന്നവർക്കും മികച്ച ഉദ്യോഗാർഥികളെ കണ്ടെത്തുന്ന കമ്പനികൾക്കും ഒരേപോലെ സഹായകമാകുന്ന ഒരു പ്ലാറ്റ്‌ഫോം എന്ന ആശയമാണ് 2018-ൽ ‘സാപ്പിഹയർ’ (Zappyhire) എന്ന കമ്പനിയുടെ പിറവിക്ക് കാരണമായത്.

സാങ്കേതിക വിദ്യയുടെ കരുത്തിൽ
ആർട്ടിഫിഷ്യൽ ഇന്റലിജൻസ് അഥവാ എഐ (AI) ഉപയോഗിച്ച് ഉദ്യോഗാർഥികളുടെ പ്രൊഫൈൽ തയ്യാറാക്കുന്നതു മുതൽ ഇന്റർവ്യൂ തയ്യാറെടുപ്പുകൾ വരെ ഈ പ്ലാറ്റ്‌ഫോമിലൂടെ സാധ്യമാണ്. നിലവിൽ സാപ്പിഹയർ, സാപ്പിവ്യൂ, സാപ്പിഫൈൻഡ് എന്നിങ്ങനെ മൂന്ന് സേവനങ്ങളാണ് കമ്പനി നൽകുന്നത്.

ഉദ്യോഗാർഥികളെ കണ്ടെത്താൻ പ്രയാസപ്പെടുന്ന കമ്പനികൾക്ക് മികച്ച സേവനം ഉറപ്പാക്കുക എന്നതാണ് ഇവരുടെ പ്രധാന ലക്ഷ്യം. പ്രവർത്തന രീതി
ഉദ്യോഗാർഥികൾക്ക് വെബ്സൈറ്റിൽ രജിസ്റ്റർ ചെയ്ത ശേഷം തങ്ങളുടെ യോഗ്യതകളും താല്പര്യങ്ങളും ഫോൺ കോളിലൂടെ രേഖപ്പെടുത്താം.

ഈ വിവരങ്ങൾ വിശകലനം ചെയ്ത് എഐ സഹായത്തോടെ തൊഴിൽ കണ്ടെത്താൻ സാപ്പിഫൈൻഡ് സഹായിക്കുന്നു. ഇതിനകം ഒരു ലക്ഷത്തിലധികം പേർക്ക് ഈ പ്ലാറ്റ്‌ഫോമിലൂടെ തൊഴിൽ ലഭിച്ചിട്ടുണ്ടെന്ന് സഹസ്ഥാപകൻ ദീപു സേവ്യർ വ്യക്തമാക്കി.

ബാങ്കിങ്, ഓട്ടോമോട്ടീവ് തുടങ്ങി അന്താരാഷ്ട്ര പ്രശസ്തിയുള്ള നൂറിലധികം കമ്പനികൾ ഇന്ന് ഇവരുടെ സേവനം പ്രയോജനപ്പെടുത്തുന്നുണ്ട്. സോഫ്റ്റ്‌വെയർ ആസ് എ സർവീസ് (SaaS) മാതൃകയിലാണ് പ്രവർത്തനങ്ങൾ.

നിക്ഷേപവും വരുമാനവും
കമ്പനിയുടെ വളർച്ചയിൽ വലിയ കുതിച്ചുചാട്ടമാണ് കഴിഞ്ഞ കാലങ്ങളിൽ ഉണ്ടായത്. കഴിഞ്ഞ വർഷം 4.75 കോടി രൂപയായിരുന്നു വരുമാനം.

ഈ വർഷം ഇത് 10 കോടി രൂപയിലേക്ക് എത്തുമെന്നാണ് പ്രതീക്ഷ. വിവിധ ഘട്ടങ്ങളിലായി നാല് കോടി രൂപയുടെ നിക്ഷേപവും കമ്പനി സമാഹരിച്ചിട്ടുണ്ട്.

ഇതിനുപുറമെ, ബിസിനസ് പിച്ച് ഷോയിലൂടെ അധികമായി ഒരു കോടി രൂപയുടെ നിക്ഷേപവും കരസ്ഥമാക്കാൻ കമ്പനിക്ക് സാധിച്ചു. വരാനിരിക്കുന്ന പുതിയ ബിസിനസ് ഡീലുകൾ കമ്പനിയെ അടുത്ത തലത്തിലേക്ക് എത്തിക്കുമെന്ന് സഹസ്ഥാപകൻ ജ്യോതിസ് അഭിപ്രായപ്പെട്ടു.