സിൽവർ ലൈൻ ഉപേക്ഷിച്ചെന്ന വാർത്ത: ചെങ്ങന്നൂരിൽ കെ-റെയിൽ വിരുദ്ധ സമരസമിതിയുടെ ആഹ്ലാദപ്രകടനം

സിൽവർ ലൈൻ പദ്ധതി സർക്കാർ ഉപേക്ഷിച്ചുവെന്ന റിപ്പോർട്ടുകൾ പുറത്തുവന്നതോടെ, കടുത്ത പ്രതിഷേധങ്ങൾക്ക് സാക്ഷ്യം വഹിച്ച ചെങ്ങന്നൂരിലും പരിസരപ്രദേശങ്ങളിലും കെ-റെയിൽ വിരുദ്ധ സമരസമിതി പ്രവർത്തകർ ആഹ്ലാദപ്രകടനം നടത്തി. നീണ്ട

പോരാട്ടങ്ങളുടെ ഭാഗമായി പലയിടത്തും ഇപ്പോഴും പദ്ധതിയുടെ മഞ്ഞക്കുറ്റികൾ അവശേഷിക്കുന്നുണ്ട്. 2022 മാർച്ച് 14-ന് കൊഴുവല്ലൂർ കിഴക്കേ മോടിയിൽ തങ്കമ്മയുടെ വീടിന് സമീപം കെ-റെയിൽ ഉദ്യോഗസ്ഥർ സ്ഥാപിച്ച മഞ്ഞക്കുറ്റി ഇപ്പോൾ സമരവിജയത്തിന്റെ പ്രതീകമായാണ് പരിഗണിക്കപ്പെടുന്നത്.

തങ്കമ്മയ്ക്ക് വീട് നിർമിച്ചു നൽകുമെന്ന അധികൃതരുടെ ഉറപ്പ് നിറവേറ്റപ്പെടാത്ത സാഹചര്യത്തിൽ, കെ-റെയിൽ സിൽവർ ലൈൻ വിരുദ്ധ ജനകീയ സമിതി 7.75 ലക്ഷം രൂപ ചെലവഴിച്ചാണ് അവർക്കായി വീട് പൂർത്തിയാക്കിയത്. സമരപ്പന്തലിന് സമീപം നട്ട

വാഴകൃഷിയിൽ നിന്നുള്ള വരുമാനവും ഇതിനായി വിനിയോഗിച്ചിരുന്നു. തന്റെ ഭൂമി നഷ്ടപ്പെടില്ലെന്ന ആശ്വാസത്തിലാണ് ഇപ്പോൾ തങ്കമ്മ.

മുളക്കുഴ ജംക്‌ഷനിൽ ഒത്തുചേർന്ന പ്രവർത്തകർ, 2022 മാർച്ച് 4-ന് ഊരിക്കടവ് പാലത്തിന് സമീപം മഞ്ഞക്കുറ്റി സ്ഥാപിച്ചതിനെ തുടർന്നുണ്ടായ സംഘർഷങ്ങളും പോലീസ് നടപടികളും അനുസ്മരിച്ചു. കെപിസിസി ജനറൽ സെക്രട്ടറി എബി കുര്യാക്കോസ് സമരസമിതിക്ക് അഭിവാദ്യമർപ്പിച്ചു.

സമരക്കാർ പിഴുതെറിഞ്ഞ മഞ്ഞക്കുറ്റി ഉയർത്തിപ്പിടിച്ച്, ‘കെ റെയിൽ വരില്ല കേട്ടോ’ എന്ന ബാനർ ഉയർത്തിയുമായിരുന്നു ആഹ്ലാദപ്രകടനം. ചെങ്ങന്നൂർ, മാവേലിക്കര താലൂക്കുകളിലെ മുളക്കുഴ, വെൺമണി, നൂറനാട്, പാലമേൽ വില്ലേജുകളിലായി 42.0884 ഹെക്ടർ ഭൂമി ഏറ്റെടുക്കാനായിരുന്നു സർക്കാർ ലക്ഷ്യമിട്ടിരുന്നത്.

പടനിലം ക്ഷേത്രത്തിലെ ഉത്സവങ്ങളെ ബാധിക്കുന്ന അലൈൻമെന്റിനെതിരെ കൊടിക്കുന്നിൽ സുരേഷ് എംപിയുടെ നേതൃത്വത്തിൽ നടന്ന നിരാഹാരസമരം ഉൾപ്പെടെയുള്ളവ വലിയ ജനശ്രദ്ധയാകർഷിച്ചിരുന്നു. പദ്ധതിയുമായി ബന്ധപ്പെട്ട് ജില്ലയിലെ ചെങ്ങന്നൂർ, നൂറനാട് സ്റ്റേഷനുകളിലായി രജിസ്റ്റർ ചെയ്ത 41 കേസുകളിൽ 33 എണ്ണം പിഴയടച്ച് തീർപ്പാക്കി; ബാക്കി 8 കേസുകൾ നിലവിലുണ്ട്.