കേന്ദ്രത്തിന്റെ ഭവ്യ വ്യവസായ പാർക്ക് പദ്ധതി: കേരളത്തിന് അവസരം നഷ്ടമാകുന്നു

കേരളത്തിലെ വ്യവസായ മേഖലയിൽ വൻ കുതിച്ചുചാട്ടത്തിന് വഴിയൊരുക്കാവുന്ന കേന്ദ്ര പദ്ധതിയായ ഭാരത് ഔദ്യോഗിക് വികാസ് യോജന (ഭവ്യ) പ്രയോജനപ്പെടുത്തുന്നതിൽ സംസ്ഥാനം വീണ്ടും പിന്നിലാവുന്നു. 15 ലക്ഷം തൊഴിലവസരങ്ങൾ സൃഷ്ടിക്കാനായി കേന്ദ്രസർക്കാർ ആവിഷ്കരിച്ച ഈ പദ്ധതിക്കായി രാജ്യത്തെ മറ്റ്‌ സംസ്ഥാനങ്ങൾ ഇതിനകം തന്നെ അപേക്ഷ സമർപ്പിച്ച് മുന്നേറിക്കഴിഞ്ഞു.

എന്നാൽ, കേരളത്തിൽ പുതിയ നയതീരുമാനങ്ങൾക്കോ വ്യവസായ വകുപ്പിന്റെ അന്തിമ തീരുമാനങ്ങൾക്കോ വേണ്ടി കാത്തിരിക്കേണ്ട അവസ്ഥയാണുള്ളത്.

കഴിഞ്ഞ മാർച്ചിലാണ് 33,660 കോടി രൂപ ചെലവിൽ ഭവ്യ പദ്ധതി പ്രഖ്യാപിക്കപ്പെട്ടത്. ‘പ്ലഗ് ആൻഡ് പ്ലേ’ സൗകര്യങ്ങളോടുകൂടിയ 100 ആധുനിക വ്യവസായ പാർക്കുകൾ രാജ്യത്തുടനീളം സ്ഥാപിക്കുകയാണ് പദ്ധതിയുടെ പ്രധാന ലക്ഷ്യം.

പദ്ധതിയിൽ ഉൾപ്പെടുന്ന ഓരോ ഏക്കർ സ്ഥലത്തിനും അടിസ്ഥാന സൗകര്യ വികസനത്തിനായി ഒരു കോടി രൂപ വീതം നിക്ഷേപകന് കേന്ദ്രം ലഭ്യമാക്കും. സമതല പ്രദേശങ്ങളിൽ കുറഞ്ഞത് 100 ഏക്കറും മലമ്പ്രദേശങ്ങളിൽ 25 ഏക്കറും ഭൂമിയാണ് ഇതിനായി ആവശ്യമുള്ളത്.

പദ്ധതി പ്രകാരമുള്ള വ്യവസായ പാർക്കുകളിൽ പ്രവർത്തിക്കുന്ന സംരംഭങ്ങൾക്ക് ആവശ്യമായ എല്ലാവിധ റഗുലേറ്ററി അനുമതികളും മുൻകൂറായി ഉറപ്പുവരുത്തുമെന്നതാണ് ഇതിന്റെ പ്രത്യേകത. കർണാടക, ആന്ധ്രാപ്രദേശ്, മഹാരാഷ്ട്ര, രാജസ്ഥാൻ തുടങ്ങിയ സംസ്ഥാനങ്ങൾ ഇതിനകം തന്നെ പദ്ധതിയുടെ ഭാഗമാകാൻ നടപടികൾ പൂർത്തിയാക്കിക്കഴിഞ്ഞു.

ലഡാക്ക് ഉൾപ്പെടെയുള്ള കേന്ദ്രഭരണ പ്രദേശങ്ങളും അപേക്ഷ സമർപ്പിച്ചവരിൽ ഉൾപ്പെടുന്നു. ആദ്യഘട്ടത്തിൽ സ്ഥാപിക്കുന്ന 50 പാർക്കുകളിൽ ഇടംപിടിക്കാനാണ് വിവിധ സംസ്ഥാനങ്ങൾ മത്സരിക്കുന്നത്.

കേന്ദ്ര വ്യവസായ നിക്ഷേപ പ്രോത്സാഹന മന്ത്രാലയത്തിന് കീഴിലുള്ള ഇൻഡസ്ട്രിയൽ കോറിഡോർ ഡെവലപ്‌മെന്റ് ട്രസ്റ്റ് (NICDIT) ആണ് പദ്ധതിയുടെ നിർവഹണ ഏജൻസി. അവർ ആദ്യഘട്ട

അപേക്ഷകൾ പരിശോധിച്ചു വരികയാണ്. മുൻകാലങ്ങളിൽ നടത്തിയ ചില പ്രാഥമിക പഠനങ്ങൾക്കപ്പുറം കേരളം കാര്യമായ മുന്നേറ്റം നടത്തിയിട്ടില്ല.

പദ്ധതി അനുവദിച്ചു കിട്ടിയാൽ പാർക്ക് നടത്തിപ്പിനായി പ്രത്യേക കമ്പനി (SPV) രൂപീകരിക്കുകയും അനുയോജ്യമായ വ്യവസായ സൗഹൃദ നയങ്ങൾ സംസ്ഥാന സർക്കാർ ആവിഷ്കരിക്കുകയും ചെയ്യേണ്ടതുണ്ട്.