പി.ടി 5 ആനയെ പിടികൂടും, ശസ്ത്രക്രിയ നടത്തും

പാലക്കാട് ∙ മദപ്പാട് ലക്ഷണം കാണിച്ചു തുടങ്ങുന്നതിനു മുൻപേ പി.ടി.5 കാട്ടാനയ്ക്കു കണ്ണിന്റെ തുടർചികിത്സ നൽകാൻ തീരുമാനം. ഇതുവരെയുള്ള ചികിത്സ ഫലിക്കാത്തതിനാൽ മയക്കുവെടിവച്ചു പിടികൂടി ധോണിയിലെ വനംവകുപ്പിന്റെ ക്യാംപിലെത്തിച്ചു ശസ്ത്രക്രിയ നടത്താനാണു നീക്കം. ഇനിയും കണ്ണിൽ തുള്ളിമരുന്ന് ഒഴിച്ച് ചികിത്സ നൽകുന്നതു ഫലം കാണില്ലെന്നാണു വിദഗ്ധ സമിതിയുടെ വിലയിരുത്തൽ.
ശസ്ത്രക്രിയയ്ക്കുശേഷം ആനയെ കാട്ടിലേക്കു വിടണോ അതോ ബേസ് ക്യാംപിൽ പി.ടി.7 ആനയ്ക്കൊപ്പം നിർത്തണോ എന്ന കാര്യവും പരിശോധിക്കും.

ഇതു സംബന്ധിച്ച തീരുമാനമെടുക്കാൻ അടുത്തദിവസം യോഗം ചേരും. കാഴ്ചയില്ലാത്ത ആനയെ കാട്ടിലേക്കു തുറന്നുവിട്ടാൽ അതിജീവിക്കില്ലെന്നാണു സമിതിയുടെ അഭിപ്രായം.

കാട്ടാനയുടെ കാഴ്ച പൂർണമായും നഷ്ടമായോ എന്ന് ഇന്നലെ മുതൽ നിരീക്ഷിച്ചു തുടങ്ങി. കഞ്ചിക്കോട് കോങ്ങോട്ടുപാടത്താണ് ആനയുള്ളത്.
പകൽ മലമ്പുഴയിലെ ജനവാസ മേഖലയിൽ എത്തിയിരുന്നു. മദപ്പാട് ലക്ഷണം കാണിച്ചു തുടങ്ങിയാൽ അക്രമവാസന കൂടാൻ സാധ്യതയുണ്ടെന്നും അതിനു മുൻപേ കണ്ണിനു ചികിത്സ ഉറപ്പാക്കണമെന്നുമാണു സമിതിയുടെ റിപ്പോർട്ട്.

ആനയ്ക്കു കാഴ്ചയില്ലെങ്കിൽ മുന്നിലുള്ള എല്ലാറ്റിനെയും ആക്രമിച്ചെന്നു വരാം. ആന തപ്പിത്തടഞ്ഞാണു നടക്കുന്നതെന്നു വനംവകുപ്പ് സ്ഥിരീകരിച്ചു.
കഴിഞ്ഞദിവസം മലമ്പുഴ പുല്ലങ്കുന്ന് ഭാഗത്ത് എത്തിയ ആന കണ്ണുകാണാതെ മതിലിലും മരങ്ങളിലും തട്ടി നടന്നുനീങ്ങുന്ന ദൃശ്യങ്ങൾ നാട്ടുകാർ പകർത്തി വനംവകുപ്പിനു കൈമാറിയിരുന്നു.

മതിലിൽ ഇടിച്ച് ആനയുടെ തുമ്പിക്കയ്യിനു പരുക്കേറ്റിരുന്നു. ദേഹത്തു പലഭാഗത്തായി ചെറുതും വലുതുമായ മുറിവുകളുമുണ്ട്. വലതുകണ്ണിന്റെ കാഴ്ച കൂട്ടാൻ വനംവകുപ്പ് നൽകിയ ചികിത്സ ഫലം കണ്ടില്ലെന്നാണു വിവരം.
ഇടതു കണ്ണിനു നേരത്തെ കാഴ്ച നഷ്ടമായിരുന്നു.

കാഴ്ചക്കുറവു കാരണം നടക്കാൻ ബുദ്ധിമുട്ടുന്ന ആനയ്ക്ക് ഈ മാസം 8നു വനംവകുപ്പ് മയക്കുവെടി വച്ചു കാട്ടിൽ ചികിത്സ നൽകിയിരുന്നു. പക്ഷേ, കാഴ്ച കൂടിയില്ലെന്നാണു നടത്തത്തിൽ നിന്നു വ്യക്തമാകുന്നതെന്ന് ഉദ്യോഗസ്ഥർ പറഞ്ഞു.

…