പാലക്കാട് ∙ പി.ടി അഞ്ചാമൻ (പാലക്കാട് ടസ്കർ) കാട്ടാനയുടെ കാഴ്ച പൂർണമായും നഷ്ടമായോ ? കണ്ണു കാണാതെ മതിലിലും മരങ്ങളിലും തട്ടിനടന്നു നീങ്ങുന്ന കാട്ടാനയുടെ ദയനീയ കാഴ്ചയാണ് ഇന്നലെ മലമ്പുഴ – കഞ്ചിക്കോട് റോഡിൽ നാട്ടുകാർ കണ്ടത്. മതിലിൽ ഇടിച്ച് ആനയുടെ തുമ്പിക്കൈക്കു പരുക്കേറ്റു.
ദേഹത്തു പലഭാഗത്തായി ചെറുതും വലുതുമായ മുറിവുകളുമുണ്ട്.
ഇന്നലെ വൈകിട്ട് അഞ്ചോടെയാണു കഞ്ചിക്കോട് – മലമ്പുഴ റോഡിലെ പുല്ലങ്കുന്നിൽ കാട്ടാനയെത്തിയത്. ഒരു മണിക്കൂറിലേറെ തപ്പിത്തടഞ്ഞു നടന്നു.
മതിലിലും മരങ്ങളിലും തട്ടിയതോടെ തിരിഞ്ഞു നടന്നു. ജനവാസ മേഖലയിലേക്കു ഇറങ്ങാൻ ശ്രമിച്ചപ്പോൾ നാട്ടുകാർ ശബ്ദമുണ്ടാക്കി.
ഇതോടെ ആന തിരിഞ്ഞ് നടന്നു. പിന്നീട് തപ്പി തടഞ്ഞു നടന്ന് കാട്ടിൽ മറഞ്ഞു.
നാട്ടുകാർ അറിയിച്ചതിനെ തുടർന്നു വനംവകുപ്പ് ഉദ്യോഗസ്ഥരെത്തി ആനയെ നിരീക്ഷിച്ചു തുടങ്ങി.
വലതു കണ്ണിന്റെ കാഴ്ച കൂട്ടാൻ വനംവകുപ്പ് നൽകിയ ചികിത്സ ഫലം കണ്ടില്ലെന്നാണു വിവരം. കാഴ്ച പൂർണമായും നഷ്ടമായോ എന്നു വിദഗ്ധ സമിതി പരിശോധിക്കും.
ഇടതു കണ്ണിനു നേരത്തെ കാഴ്ച നഷ്ടമായിരുന്നു.
കാഴ്ചക്കുറവു കാരണം നടക്കാൻ ബുദ്ധിമുട്ടുന്ന പി.ടി അഞ്ചാമന് ഈ മാസം എട്ടിനാണു വനംവകുപ്പ് മയക്കുവെടിവച്ച് കാട്ടിൽ ചികിത്സ നൽകിയത്. ചികിത്സ ഫലിക്കുമോയെന്നറിയാൻ 20 ദിവസം കാത്തിരിക്കണമെന്നാണു വെറ്ററിനറി ഡോക്ടർമാരുടെ സംഘം അറിയിച്ചത്.
ഇന്നലെ 20 ദിവസം പൂർത്തിയായി. പക്ഷേ ആനയ്ക്കു കാഴ്ച കൂടിയില്ലെന്നാണ് നടത്തത്തിൽ നിന്നു വ്യക്തമാകുന്നതെന്ന് ഉദ്യോഗസ്ഥർ പറഞ്ഞു.
ഇന്നു മുതൽ നിരീക്ഷിച്ച് ഉറപ്പാക്കും.
ഇനിയെന്ത് ?
വലതു കണ്ണിന് കാഴ്ച പൂർണമായും നഷ്ടപെട്ടിട്ടുണ്ടെങ്കിൽ തിരികെ കിട്ടാൻ സാധ്യത കുറവാണെന്നു വെറ്ററിനറി ഡോക്ടർമാർ പറയുന്നു. ആനയെ മയക്കുവെടിവച്ചു പിടികൂടി ധോണിയിലെ ബേസ് ക്യാംപിലെത്തിച്ചു ശസ്ത്രക്രിയ നടത്തി കാഴ്ച കിട്ടാനുള്ള അവസാന ശ്രമം നടത്തും.
അതും ഫലിച്ചില്ലെങ്കിൽ കാട്ടിലേക്കു വിടാതെ ആനയെ ബേസ് ക്യാംപിൽ തന്നെ നിർത്താനാണു നീക്കം.കാട്ടിലേക്കു തുറന്നുവിടുന്നത് ആനയുടെ ആരോഗ്യത്തിനു ദോഷം ചെയ്യുമെന്നു വിദഗ്ധർ പറയുന്നു. …
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
