റോഡിൽ സ്ത്രീയെ ചവിട്ടി വീഴ്ത്തിയ ആൾക്കെതിരെ കേസെടുത്തു

തിരുവമ്പാടി  ∙ നടുറോഡിൽ സ്ത്രീയെ ചവിട്ടി വീഴ്ത്തിയ ആൾക്കെതിരെ പൊലീസ് കേസെടുത്തു. തിരുവമ്പാടി ബവ്റിജസ് ഔട്‌ലെറ്റിന് സമീപം കഴിഞ്ഞ ദിവസമാണ്  സംഭവം.

തിരുവമ്പാടി സ്വദേശി ശിഹാബുദ്ദീൻ ആണ് അക്രമം നടത്തിയത്. മദ്യലഹരിയിലായിരുന്നു ഇയാൾ.

നടന്നു പോവുകയായിരുന്ന രണ്ടു സ്ത്രീകളിൽ ഒരാളുമായി ഇയാൾ വാക്കുതർക്കത്തിൽ ഏർപ്പെടുന്നത് പുറത്തുവന്ന സിസിടിവി ദൃശ്യങ്ങളിൽ വ്യക്തമാണ്. തർക്കങ്ങൾക്കു പിന്നാലെ സ്ത്രീ ചെരിപ്പ് ഊരി യുവാവിനെ അടിക്കാൻ ഓങ്ങുന്നതും തുടർന്ന് ഇയാൾ ഓടിയെത്തി സ്ത്രീയെ നടുഭാഗത്ത് ചവിട്ടി വീഴ്ത്തുന്നതും ദൃശ്യങ്ങളിലുണ്ട്.
വീണ ശേഷം എഴുന്നേറ്റ സ്ത്രീയോട് വീണ്ടും ഇയാൾ മടങ്ങിയെത്തി തർക്കത്തിൽ ഏർപ്പെടുന്നതും ദൃശ്യങ്ങളിൽ കാണാം.കോഴിക്കോട്ടു നിന്നു പിരിവിന് എത്തിയതായിരുന്നു സ്ത്രീകൾ.

ഇവർ പൊലീസിൽ പരാതി നൽകിയിട്ടില്ല. മദ്യപിച്ചു പൊതുസ്ഥലത്ത് ശല്യം ഉണ്ടാക്കിയതിനാണ് ശിഹാബുദ്ദീനെതിരെ തിരുവമ്പാടി പൊലീസ് കേസെടുത്തത്.

…