ചാർജിങ് സ്റ്റേഷനിൽ അപകടമരണം: വൈദ്യുതി പ്രവഹിച്ചുള്ള അപകടം ഒഴിവായി

ഈരാറ്റുപേട്ട ∙ വാഗമൺ വഴിക്കടവിൽ വൈദ്യുതി വാഹന ചാർജിങ് സ്റ്റേഷനിൽ നിയന്ത്രണംവിട്ട

കാർ ഇടിച്ചുകയറി ഉണ്ടായ അപകടത്തിൽ വൈദ്യുതി പ്രവഹിച്ചുള്ള അപകടം ഒഴിവായി. ഒരേ സമയം 2 വാഹനങ്ങൾക്കു ചാർജ് ചെയ്യാനാകുന്ന സൗകര്യമാണ് ഈ സ്റ്റേഷനിലുള്ളത്. ഇതിൽ ഒന്നിൽ ഒരു വാഹനം ചാർജ് ചെയ്തുകൊണ്ടിരിക്കുകയുമായിരുന്നു. അപകടമുണ്ടാക്കിയ കാർ തൊട്ടടുത്ത ചാർജിങ് പോയിന്റിലേക്കു കയറ്റുന്നതിനിടയിലാണ് അപകടം.
ചാർജിങ് പോയിന്റിലേക്ക് വാഹനം ഇടിച്ചു കയറിയാൽ ചാർജിങ് സ്റ്റേഷനു തകരാർ സംഭവിക്കുകയും വൈദ്യുതി പ്രവഹിക്കുകയും ചെയ്യാനുള്ള സാധ്യത ഏറെയാണ്.

30 കിലോവാട്ട് വൈദ്യുതിയാണ് ഒരേസമയം ഈ ചാർജിങ് പോയിന്റിലൂടെ കടത്തിവിടുന്നത്. വൈദ്യുതി ഡിസി ആകുന്നതിനുമുൻപുള്ള ഭാഗത്താണ് അപകടം ഉണ്ടാകുന്നതെങ്കിൽ അപകടത്തിനുള്ള സാധ്യത കൂടുതലുണ്ട്. ആവശ്യമായ സുരക്ഷാസംവിധാനങ്ങൾ ഒരുക്കിയാണ് ചെയ്തിരിക്കുന്നതെങ്കിലും വാഹനങ്ങൾ ശക്തമായി ഇടിച്ചു കയറിയാൽ ഇതിനു തകരാർ സംഭവിക്കാനുള്ള സാധ്യതയുണ്ട്.
ഇന്നലെയുണ്ടായ അപകടത്തിൽ, മേൽക്കൂരയ്ക്കായി നിർമിച്ച തൂണിലിടിച്ച കാർ കസേരയിൽ ഇരിക്കുകയായിരുന്ന ആര്യയെയും മകൻ 4 വയസ്സുകാരൻ അയാൻഷ്നാഥിനെയും ഭിത്തിയോടു ചേർത്ത് ഇടിച്ചാണ് നിന്നത്. കാറിനരികിൽ നിൽക്കുകയായിരുന്ന ശബരീനാഥ് ഓടിയെത്തി, അപകടമുണ്ടാക്കിയ കാർ പിന്നോട്ടെടുക്കാൻ കൈകൂപ്പി അപേക്ഷിക്കുന്ന സിസിടിവി ദൃശ്യം നൊമ്പരമായി. അപകടമുണ്ടായതിനു ശേഷവും കാർ വീണ്ടും മുൻപോട്ടു പോകാൻ ശ്രമിക്കുന്നതും ചക്രങ്ങൾ ഉരുളുന്നതും ദൃശ്യങ്ങളിലുണ്ട്. …