'മാസം 1.2 ലക്ഷം കയ്യിൽ കിട്ടുന്നവര്‍ക്ക് പോലും ഇവിടെയൊരു വീട് വാങ്ങാൻ പറ്റുന്നില്ല'; ശ്രദ്ധേയമായി പോസ്റ്റ്

<p>സ്വന്തമായി ഒരു വീട് ഏറെക്കുറെ എല്ലാവരുടേയും സ്വപ്നമാണ്. എന്നാൽ, സ്ഥലത്തിന്റെയും വീട് പണിയാനുള്ള ചെലവിന്റെയും, അതുപോലെ വീടുകളുടെ വിലയുടേയും കുതിച്ചുചാട്ടം കാണുമ്പോൾ പലരുടേയും സ്വപ്നം സ്വപ്നമായി തന്നെ അവശേഷിക്കാറാണ് പതിവ്. ഇന്ത്യയിലെ പല ന​ഗരങ്ങളിലും വീട് വാങ്ങാനാണെങ്കിലും വീടെടുക്കുന്നതിനായി സ്ഥലം വാങ്ങുന്നതിനാണെങ്കിലും വലിയ ചെലവ് തന്നെ വരും എന്നതാണ് അവസ്ഥ.</p><p>വലിയ ശമ്പളമുണ്ട് എങ്കിൽ പോലും മിക്കവർക്കും ഇപ്പോഴും ഒരു വീട് സ്വന്തമാക്കാനാവുന്നില്ല എന്നതാണ് സത്യം. അത്തരം ഒരു അനുഭവം പറയുന്ന പോസ്റ്റാണ് ഇപ്പോൾ എക്സിൽ (ട്വിറ്റർ) ശ്രദ്ധിക്കപ്പെടുന്നത്.</p><p>പോസ്റ്റ് പങ്കുവച്ചിരിക്കുന്നത് അഖിലേഷ് എന്നൊരു ടെക് പ്രൊഫഷണലാണ്. തന്റെ സുഹൃത്തിന്റെ അനുഭവമാണ് അഖിലേഷ് പോസ്റ്റിൽ പങ്കുവച്ചിരിക്കുന്നത്. മാസം 1.2 ലക്ഷം രൂപ ശമ്പളം വാങ്ങുന്ന തന്റെ സുഹൃത്ത് ​ഗുരു​ഗ്രാമിൽ ഒരു സൗകര്യമുള്ള ഒരു വീട് വാങ്ങിക്കഴിഞ്ഞാൽപ്പിന്നെ കിട്ടുന്ന ശമ്പളം അയാൾക്ക് കഷ്ടിച്ച് ജീവിച്ച് പോകാനേ തികയൂ എന്നാണ് പോസ്റ്റിൽ പറയുന്നത്.</p><p>ഗുഡ്ഗാവിലുള്ള ഒരു സുഹൃത്തുമായി സംസാരിക്കുകയായിരുന്നു. അവന് സി.ടി.സി 20 ലക്ഷമാണ്. ടാക്സ്, ഇ.പി.എഫ്, ഡിഡക്ഷൻ എന്നിവയ്ക്ക് ശേഷം പ്രതിമാസം ഏകദേശം 1.2 ലക്ഷം രൂപയാണ് കയ്യിൽ കിട്ടുക. അവൻ ഒരുപാട് പണം ചെലവഴിക്കുന്ന ആളല്ല. കാറില്ല. കുട്ടികളില്ല എന്നും പോസ്റ്റിൽ പറയുന്നു.</p><p>&nbsp;</p><p>was having a discussion with a friend in gurgaon. his ctc is 20 lakh. his in-hand is around 1.2 lakh per month after taxes, epf, and deductions. he doesn’t splurge. no car. no kids. just a waifu.every project he visits starts at 2.5 crore. the brochures talk about infinity…</p><p>— akhilesh (@akhileshutup) June 5, 2025</p><p>&nbsp;</p><p>എന്നാൽ, പോയിക്കാണുന്ന എല്ലാ വീടുകൾക്കും 2.5 കോടി ഒക്കെയാണ് പറയുന്നത്. ബ്രോക്കർമാരെല്ലാം ഇൻഫിനിറ്റി പൂളിനെ കുറിച്ചും ഇറ്റാലിയൻ മാർബിളിനെ കുറിച്ചും ഒക്കെയാണ് പറയുന്നത്. ആ വീട് വാങ്ങിക്കഴിഞ്ഞാൽ സുഹൃത്തിന് കിട്ടിയ ശമ്പളത്തിന് കഷ്ടിച്ച് ജീവിക്കാനേ പറ്റൂ. വെക്കേഷന് പോവാനോ എന്തെങ്കിലും അത്യാവശ്യം വന്നാൽ എടുക്കാനോ ഒന്നും പണം കാണില്ല എന്നും യുവാവിന്റെ പോസ്റ്റിൽ പറയുന്നു.</p><p>ഇത്രയും സമ്പാദിക്കുന്ന ഒരാൾക്ക് പോലും ഇന്ത്യയിൽ ഒരു വീട് വയ്ക്കാൻ സാധിക്കുന്നില്ല എന്നാണ് യുവാവ് തന്റെ പോസ്റ്റിൽ പറയുന്നത്.</p><p>നിരവധിപ്പേരാണ് പോസ്റ്റിന് കമന്റുകളുമായി എത്തിയിരിക്കുന്നത്. ഇന്ത്യയിലെ മിക്ക ന​ഗരങ്ങളിലും ഇത് തന്നെയാണ് അവസ്ഥ എന്നും പലർക്കും ശമ്പളം കൊണ്ട് വീട് വാങ്ങാൻ തികയുന്നില്ല എന്നും പലരും അഭിപ്രായപ്പെട്ടു.</p>



…