കാഞ്ഞിരപ്പാറ ജംക്‌ഷനിലെ കൊടും വളവ് ഡ്രൈവർമാരുടെ നെഞ്ചിടിപ്പേറ്റുന്നു
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
കാഞ്ഞിരപ്പാറ ∙ വാഴൂർ – ചങ്ങനാശേരി റോഡിലെ കാഞ്ഞിരപ്പാറ ജംക്‌ഷനിലെ കൊടും വളവ് ഡ്രൈവർമാരുടെ പേടിസ്വപ്നമാവുന്നു. ചങ്ങനാശേരി – വാഴൂർ റോഡും കാനം – ചാമംപതാൽ റോഡും സംഗമിക്കുന്നതു കാഞ്ഞിരപ്പാറ ജംക്‌ഷനിലാണ്. ചങ്ങനാശേരി നിന്നു കാനം ഭാഗത്തേക്കു വരുന്ന വാഹനങ്ങൾ ജംക്‌ഷനിലെ വളവ് കടന്നു കിട്ടാൻ ബുദ്ധിമുട്ടുന്നു.
∙ ‘ എൽ ’ ഷേപ് വളവ്
ചങ്ങനാശേരി – വാഴൂർ റോഡിലെ വലിയ വളവുകളിലൊന്നാണ് കാഞ്ഞിരപ്പാറയിലേത്. ഇവിടെ നിന്നാണ് കാനം, ചാമംപതാൽ ഭാഗത്തേക്ക് തിരിയുന്നതും. ചങ്ങനാശേരി ഭാഗത്തു നിന്നും എത്തുന്ന വാഹനങ്ങൾ കാനം റോഡിലേക്ക് പ്രവേശിക്കുമ്പോഴാണ് പതിവായി അപകടം ഉണ്ടാകുന്നത്. അതോടൊപ്പം കാനം റോഡിൽ നിന്ന് വാഴൂർ റോഡിലേക്ക് പ്രവേശിക്കുമ്പോഴും അപകടം പതിവാണ്. വളവായതിനാൽ എതിർദിശയിൽ വരുന്ന വാഹനങ്ങൾ കാണാൻ കഴിയാത്തതാണ് പ്രശ്നം.
∙ സ്ഥലം ഏറ്റെടുക്കണം
കാഞ്ഞിരപ്പാറ വളവ് നിവർത്താൻ സ്ഥലം ഏറ്റെടുക്കുകയാണ് ഏക പോംവഴി. പിഡബ്ല്യുഡി റോഡ് വിഭാഗം ഇതിനുള്ള നടപടി എടുക്കണമെന്ന് ആവശ്യപ്പെട്ട് പൗരസമിതി നിവേദനം നൽകിയിട്ടുണ്ട്. സ്വകാര്യ വ്യക്തികൾ സ്ഥലം വിട്ടു നൽകിയാൽ വളവ് നിവർത്താമെന്ന് പിഡബ്ല്യുഡി റോഡ് വിഭാഗം പറയുന്നു. വില നൽകിയാൽ സ്ഥലം നൽകാമെന്ന് സ്വകാര്യ വ്യക്തി പറഞ്ഞതായി വാഴൂർ പഞ്ചായത്ത് 16–ാം വാർഡംഗം പി.ജെ.ശോശാമ്മ പറഞ്ഞു.
