അരുവിത്തുറ തിരുനാൾ: അവലോകന യോഗം ചേർന്നു

അരുവിത്തുറ ∙ അരുവിത്തുറ സെന്റ് ജോർജ് ഫൊറോന പള്ളിയിൽ ഏപ്രിൽ 12 മുതൽ മേയ് 2 വരെ നടക്കുന്ന വിശുദ്ധ ഗീവർഗീസ് സഹദായുടെ തിരുനാള്‍ നടത്തിപ്പുമായി ബന്ധപ്പെട്ട് ജനപ്രതിനിധികളുടെയും വിവിധ സർക്കാർ ഉദ്യോഗസ്ഥരുടെയും പള്ളി അധികൃതരുടെയും യോഗം ചേർന്നു. പൂഞ്ഞാർ എംഎൽഎ അഡ്വ. സെബാസ്റ്റ്യൻ കുളത്തിങ്കൽ യോഗം ഉദ്ഘാടനം ചെയ്തു. വികാരി ഫാ. സെബാസ്റ്റ്യൻ വെട്ടുകല്ലേൽ അധ്യക്ഷത വഹിച്ചു. ചടങ്ങിൽ തിരുനാള്‍ നോട്ടിസിന്റെ പ്രകാശനം വികാരി ഫാ. സെബാസ്റ്റ്യൻ വെട്ടുകല്ലേൽ അഡ്വ. സെബാസ്റ്റ്യൻ കുളത്തിങ്കലിന് നൽകി നിർവഹിച്ചു.

ഡെപ്യൂട്ടി തഹസിൽദാർ ശ്യാമളകുമാരി, ജില്ലാ പഞ്ചായത്തംഗം ഷോൺ ജോർജ്, നഗരസഭാധ്യക്ഷ സുഹറ അബ്ദുൽ ഖാദർ, നഗരസഭാ ഉപാധ്യക്ഷൻ അൻസർ പുള്ളോലിൽ, മുൻസിപ്പൽ സെക്രട്ടറി ബിപിൻ കുമാർ, പൊലീസ് സ്റ്റേഷൻ ഇൻചാർജ് ബിനു, വ്യാപാരി വ്യവസായി ഏകോപന സമിതി പ്രസിഡന്റ് അബ്ദുൽ ഖാദർ, നഗരസഭ കൗൺസിലർ ലീനാ സണ്ണി എന്നിവർ പ്രസംഗിച്ചു. അഗ്നിരക്ഷാസേന, കെഎസ്ഇബി, ജലഅതോറിറ്റി, റവന്യു, ആരോഗ്യം, പൊതുമരാമത്ത്, ഭക്ഷ്യസുരക്ഷ, എക്സൈസ് വിഭാഗങ്ങള്‍, താലൂക്ക് സപ്ലൈ വകുപ്പ്, വില്ലേജ് ഓഫിസ്, കെഎസ്ആർടിസി, ബസ് ഓണേഴ്സ് അസോസിയേഷൻ എന്നിവിടങ്ങളിലെ ഉദ്യോഗസ്ഥർ പങ്കെടുത്തു.

എല്ലാവരും ജാഗ്രതയോടെയും ഒരുമയോടെയും പ്രവർത്തിക്കാനും വിശ്വാസികൾക്കും യാത്രക്കാർക്കും ബുദ്ധിമുട്ട് ഉണ്ടാകാത്ത വിധത്തിൽ സൗകര്യങ്ങളൊരുക്കാനും യോഗത്തിൽ തീരുമാനിച്ചു. തിരുനാൾ ദിവസങ്ങളിൽ ഗതാഗത നിയന്ത്രണം ഏർപ്പെടുത്താനും വാഹന പാർക്കിങ് ക്രമീകരണം നടത്താനും ഹോട്ടലുകളിൽ ഭക്ഷ്യസുരക്ഷാ വിഭാഗത്തിന്റെ നേതൃത്വത്തിലും ലഹരിക്കെതിരെ എക്സൈസിന്റെ നേതൃത്വത്തിലും പരിശോധന നടത്താനും തീരുമാനമായി. മുടക്കമില്ലാതെ വൈദ്യുതി ലഭ്യമാക്കുന്നതിനും കൂടുതൽ ബസ് സർവീസ് നടത്താനും തീരുമാനിച്ചു.