സാംസങ് ഗാലക്സി ഫോണുകളിലെ ശബ്ദനിയന്ത്രണം എളുപ്പമാക്കാൻ സൗണ്ട് അസിസ്റ്റന്റ്

ആൻഡ്രോയിഡ് ഫോണുകളിലെ ശബ്ദനിയന്ത്രണവുമായി ബന്ധപ്പെട്ട പ്രശ്നങ്ങൾക്ക് പരിഹാരവുമായി സാംസങ്ങിന്റെ പ്രത്യേക ഫീച്ചർ എത്തുന്നു.

ഗൂഗിൾ പിക്സൽ ഫോണുകളെ അപേക്ഷിച്ച് സാംസങ് ഗാലക്സി ഇസഡ് ഫ്ലിപ് 7 (Samsung Galaxy Z Flip 7) പോലുള്ള മടക്കാവുന്ന ഫോണുകളിൽ മ്യൂസിക് സ്ട്രീമിംഗും ആനിമേഷൻ കാഴ്ചകളും ഏറെ ആസ്വദിക്കാനാകുമെങ്കിലും, ഇതിലെ ചെറിയ വോളിയം റോക്കർ ബട്ടണുകൾ പലപ്പോഴും ബുദ്ധിമുട്ട് സൃഷ്ടിക്കാറുണ്ട്. കോളുകളിൽ നിന്നും സ്ട്രീമിംഗ് പ്ലാറ്റ്‌ഫോമുകളിലേക്ക് മാറുമ്പോൾ ഏത് ആപ്പിന്റെ ശബ്ദമാണ് കൂട്ടേണ്ടതെന്നോ കുറക്കേണ്ടതെന്നോ തിരിച്ചറിയാൻ കഴിയാത്തതും, അബദ്ധത്തിൽ വോളിയം പൂർണ്ണമായി കൂടിപ്പോകുന്നതും പതിവായിരുന്നു.

ഈ പ്രശ്നങ്ങൾക്ക് പരിഹാരമായാണ് വൺ യുഐ (One UI)-ൽ പ്രത്യേക ഫീച്ചറുകൾ ലഭ്യമാക്കിയിട്ടുള്ളത്. ആൻഡ്രോയിഡ് ഫോണുകളിൽ ഇപ്പോൾ നോട്ടിഫിക്കേഷൻ, റിങ്‌ടോൺ, അലാം, മീഡിയ എന്നിവയ്ക്കായി പ്രത്യേകം വോളിയം ക്രമീകരിക്കാനുള്ള സൗകര്യമുണ്ടെങ്കിലും, നിരവധി ആപ്പുകൾ ഒരുമിച്ച് ഉപയോഗിക്കുന്നവർക്ക് ഇത് പൂർണ്ണമായും സഹായകരമാകാറില്ല.

സ്പോട്ടിഫൈയിൽ ഉയർന്ന ശബ്ദവും യൂട്യൂബിൽ കുറഞ്ഞ ശബ്ദവും നൽകാൻ ആഗ്രഹിക്കുമ്പോൾ എല്ലാത്തിനുംകൂടി ഒരൊറ്റ സ്ലൈഡർ ഉപയോഗിക്കുന്നത് ബുദ്ധിമുട്ടാണ്. എന്നാൽ സാംസങ് ഉപകരണങ്ങളിൽ തേർഡ് പാർട്ടി ആപ്പുകളുടെ സഹായമില്ലാതെ തന്നെ ഈ പ്രശ്നം പരിഹരിക്കാൻ സാധിക്കും.

ഇതിനായി ഗുഡ് ലോക്ക് (Good Lock) ആപ്പ് സ്യൂട്ടിലെ സൗണ്ട് അസിസ്റ്റന്റ് (Sound Assistant) എന്ന മൊഡ്യൂൾ ഉപയോഗിക്കാവുന്നതാണ്. ഗാലക്സി ഉപയോക്താക്കൾ പലരും കീബോർഡും ഹോം സ്ക്രീനും മനോഹരമാക്കാൻ ഗുഡ് ലോക്ക് ഉപയോഗിക്കാറുണ്ടെങ്കിലും, സൗണ്ട് അസിസ്റ്റന്റ് പലരും ശ്രദ്ധിക്കാറില്ല.

ഓരോ ആപ്പിനും പ്രത്യേകം വോളിയം ലെവലുകൾ നിശ്ചയിക്കാൻ ഈ മൊഡ്യൂൾ സഹായിക്കുന്നു. സ്പോട്ടിഫൈ, യൂട്യൂബ്, മെസ്സഞ്ചർ, ഇൻസ്റ്റാഗ്രാം തുടങ്ങി വിവിധ മീഡിയ ആപ്പുകൾക്ക് ഇതിലൂടെ പ്രത്യേക സ്ലൈഡറുകൾ നൽകാം.

ഗെയിമുകൾക്ക് ഉയർന്ന ശബ്ദവും സോഷ്യൽ മീഡിയ ആപ്പുകൾക്ക് കുറഞ്ഞ ശബ്ദവും മുൻകൂട്ടി നിശ്ചയിക്കാൻ ഇത് വഴി സാധിക്കും. കൂടാതെ, ഒന്നിലധികം ആപ്പുകൾ പരസ്പരം തടസ്സപ്പെടുത്താതെ ഒരേസമയം ശബ്ദം പുറപ്പെടുവിക്കുകയും ചെയ്യും.

സൗണ്ട് അസിസ്റ്റന്റ് ഉപയോഗിക്കുന്ന വിധം: ആദ്യം ഗുഡ് ലോക്ക് ആപ്പ് ഇൻസ്റ്റാൾ ചെയ്ത ശേഷം അതിനുള്ളിൽ നിന്ന് സൗണ്ട് അസിസ്റ്റന്റ് ഡൗൺലോഡ് ചെയ്യുക. തുടർന്ന് വോളിയം പാനലിന്റെ രൂപഭാവങ്ങൾ മാറ്റാനും ഗ്രേഡിയന്റ് നിറങ്ങൾ നൽകാനും സാധിക്കും.

ആപ്പ് സെറ്റിങ്സിൽ പ്രവേശിച്ച് ആവശ്യമായ മീഡിയ ആപ്പുകൾ ചേർത്ത് ഓരോന്നിനും അനുയോജ്യമായ വോളിയം മുൻഗണനാ ക്രമത്തിൽ സജ്ജീകരിക്കാം. ഗുഡ് ലോക്ക് തുറക്കാതെ തന്നെ പോപ്പ്-അപ്പ് പാനൽ വഴിയും ഇതിനായുള്ള ഷോർട്ട്കട്ട് ഉപയോഗിക്കാവുന്നതാണ്.

ഫോണിലെ വോളിയം റോക്കർ അമർത്തുമ്പോൾ ഏത് ആപ്പാണ് നിയന്ത്രിക്കപ്പെടുന്നതെന്ന ആശങ്ക ഒഴിവാക്കാൻ ഈ ഫീച്ചർ സഹായിക്കുന്നു. ഹെഡ്ഫോണുകൾ വഴി പാട്ടുകൾ കേൾക്കുമ്പോൾ അബദ്ധത്തിൽ ശബ്ദം കൂടിപ്പോകാതിരിക്കാനും ഇത് ഉപകരിക്കുന്നു.

വോളിയം റോക്കർ സാധാരണ റിങ്‌ടോണിന് പകരം മീഡിയ വോളിയം ക്രമീകരിക്കാൻ മാത്രമായി മാറ്റിവെക്കാനുള്ള സൗകര്യവും ഇതിലുണ്ട്. സാംസങ് ഗാലക്സി ഡിവൈസുകളിൽ ലഭ്യമായ ഈ സൗണ്ട് അസിസ്റ്റന്റ് ഫീച്ചർ ഒട്ടേറെ പ്രയോജനകരമാണെങ്കിലും, ഇത്തരം സംവിധാനങ്ങൾ ഗൂഗിളും മറ്റ് ആൻഡ്രോയിഡ് ഫോണുകളിൽ ഭാവിയിൽ ഉൾപ്പെടുത്തുമെന്നാണ് ഉപയോക്താക്കളുടെ പ്രതീക്ഷ.