ഗൂഗിൾ കീപ്പിൽ പുതിയ ‘ഫൈൻഡ് ഇൻ നോട്ട്’ ഫീച്ചർ എത്തി; ഉപയോക്താക്കൾക്ക് ഇനി വിവരങ്ങൾ എളുപ്പത്തിൽ കണ്ടെത്താം

പ്രധാനപ്പെട്ട നോട്ട് മേക്കിംഗ് ആപ്പായ ഗൂഗിൾ കീപ്പിൽ പുതിയ അപ്‌ഡേറ്റുകൾ എത്താറുണ്ട്.

ഉപയോക്താക്കളുടെ സൗകര്യാർത്ഥം നിരവധി മാറ്റങ്ങളാണ് ആപ്പിൽ വരുത്തിക്കൊണ്ടിരിക്കുന്നത്. ആപ്ലിക്കേഷന്റെ പ്രവർത്തനം കൂടുതൽ എളുപ്പമാക്കുന്നതിന്റെ ഭാഗമായി ഗൂഗിൾ പുതിയൊരു ഫീച്ചർ കൂടി അവതരിപ്പിച്ചു.

നീളമേറിയ കുറിപ്പുകളിലും ലിസ്റ്റുകളിലും ആവശ്യമായ വിവരങ്ങൾ വേഗത്തിൽ കണ്ടെത്താൻ സഹായിക്കുന്ന ‘ഫൈൻഡ് ഇൻ നോട്ട്’ ഫീച്ചറാണ് ഇപ്പോൾ ലഭ്യമാക്കിയിരിക്കുന്നത്. മുൻകാലങ്ങളിൽ ആപ്പിലെ സെർച്ച് ബാർ ഉപയോഗിച്ച് ഒരു പ്രത്യേക നോട്ട് മാത്രമാണ് കണ്ടെത്താൻ സാധിച്ചിരുന്നത്.

എന്നാൽ നോട്ടിനുള്ളിലെ വലിയ ലേഖനങ്ങളിൽ നിന്നോ കുറിപ്പുകളിൽ നിന്നോ കൃത്യമായ വരികൾ കണ്ടെത്താൻ ഉപയോക്താക്കൾ ഏറെ ബുദ്ധിമുട്ടിയിരുന്നു. നീളമേറിയ മീറ്റിംഗ് നോട്ടുകളോ യാത്രാ വിവരങ്ങളോ തിരയുമ്പോൾ ഈ പുതിയ ഫീച്ചർ വലിയ രീതിയിൽ സമയം ലാഭിക്കാൻ സഹായിക്കുന്നു.

ബ്രാൻഡ് പേരുകൾ, പാചകക്കുറിപ്പുകളിലെ അളവുകൾ, മറ്റ് പ്രധാന വിവരങ്ങൾ എന്നിവ വേഗത്തിൽ പരിശോധിക്കാൻ ഇത് ഉപകാരപ്രദമാണ്. ഫീച്ചർ ഉപയോഗിക്കുന്നതിനുള്ള ലളിതമായ വഴികൾ:
* ആദ്യം ഗൂഗിൾ കീപ്പിലെ ഏതെങ്കിലും ഒരു നോട്ട് തുറക്കുക.
* താഴെ വലതുഭാഗത്തുള്ള മൂന്ന് ഡോട്ടുകളുടെ മെനുവിൽ ടാപ്പ് ചെയ്യുക.
* റിമൈൻഡറിന് താഴെയായി കാണുന്ന ‘ഫൈൻഡ് ഇൻ നോട്ട്’ എന്ന ഓപ്ഷൻ തിരഞ്ഞെടുക്കുക.
* ആവശ്യമായ കീവേഡ് ടൈപ്പ് ചെയ്ത് മാച്ചുകൾ പരിശോധിക്കുക.

ഈ ഫീച്ചർ സാധാരണ ടെക്സ്റ്റ് നോട്ടുകളിലും ലിസ്റ്റുകളിലും ഒരുപോലെ പ്രവർത്തിക്കും. ഈ പുതിയ അപ്‌ഡേറ്റ് ലഭിക്കാത്തവർ ആപ്പ് വേർഷൻ 5.26.3xx അല്ലെങ്കിൽ അതിനുശേഷമുള്ള പതിപ്പുകളിലേക്ക് അപ്‌ഡേറ്റ് ചെയ്യേണ്ടതാണ്.

അപ്പോഴും ഫീച്ചർ കാണുന്നില്ലെങ്കിൽ ആപ്പ് ഫോഴ്സ് സ്റ്റോപ്പ് ചെയ്ത് കാഷെ ക്ലിയർ ചെയ്യാവുന്നതാണ്. 2026 ഓഗസ്റ്റ് ആദ്യം മുതൽ പരിമിതമായ രീതിയിൽ റോൾ ഔട്ട് ചെയ്തു തുടങ്ങിയ ഈ ഫീച്ചർ ഇപ്പോൾ കൂടുതൽ ഉപയോക്താക്കൾക്ക് ലഭ്യമായിക്കൊണ്ടിരിക്കുകയാണ്.