മുംബൈയിലെ ചെമ്പൂരിൽ കനത്ത മഴയ്ക്കിടെ സ്കൂൾ ബസിനു മുകളിലേക്ക് മരം ഒടിഞ്ഞുവീണുണ്ടായ അപകടത്തിൽ വിദ്യാർഥിക്ക് ദാരുണാന്ത്യം. ഇന്ന് ഉച്ചയോടെ ചെമ്പൂരിലെ റോഡ് നമ്പർ 11-ൽ വെച്ചാണ് അപകടം സംഭവിച്ചത്.
അപകടസമയത്ത് ബസിനുള്ളിൽ 13 വിദ്യാർഥികളാണ് ഉണ്ടായിരുന്നത്. സംഭവത്തിൽ പത്തോളം കുട്ടികൾക്ക് പരിക്കേറ്റു.
പരിക്കേറ്റവരെ ഉടൻ തന്നെ സമീപത്തെ ജെയിൻ ആശുപത്രിയിൽ പ്രവേശിപ്പിച്ചു. ഇതിൽ ഗുരുതരാവസ്ഥയിലുള്ള നാല് കുട്ടികൾ നിലവിൽ സെൻ ആശുപത്രിയിൽ ചികിത്സയിലാണ്.
ബസിനുള്ളിൽ ഒരു കുട്ടി കൂടി കുടുങ്ങിക്കിടക്കുന്നതായാണ് റിപ്പോർട്ടുകൾ സൂചിപ്പിക്കുന്നത്. ഇയാളെ പുറത്തെടുക്കാനായി അഗ്നിശമനസേനയും രക്ഷാപ്രവർത്തകരും മരം മുറിച്ചുമാറ്റി തീവ്രമായ രക്ഷാപ്രവർത്തനം തുടരുകയാണ്.
മേഖലയിലെ അപകടാവസ്ഥയിലുള്ള മരങ്ങൾ മുറിച്ചുമാറ്റണമെന്ന് ആവശ്യപ്പെട്ട് മുൻസിപ്പൽ കോർപ്പറേഷന് നിരവധി തവണ പരാതി നൽകിയിരുന്നതായി പ്രദേശവാസികൾ ആരോപിച്ചു. മുൻപും സമാനമായ രീതിയിൽ ഇവിടെ മരങ്ങൾ വീണിട്ടുണ്ടെന്നും, തുടർച്ചയായ മുന്നറിയിപ്പുകൾ നൽകിയിട്ടും അധികൃതർ യാതൊരു നടപടിയും സ്വീകരിച്ചില്ലെന്നും നാട്ടുകാർ കുറ്റപ്പെടുത്തി.
അപകടത്തിനു പിന്നാലെ, മുംബൈയിലും പ്രാന്തപ്രദേശങ്ങളിലും ഇന്ന് കനത്ത മഴയ്ക്കും ഇടിമിന്നലിനും സാധ്യതയുണ്ടെന്ന് കാലാവസ്ഥാ വകുപ്പ് മുന്നറിയിപ്പ് നൽകിയിട്ടുണ്ട്. ഇത് നിലവിലെ രക്ഷാപ്രവർത്തനത്തെ പ്രതികൂലമായി ബാധിക്കുമോ എന്ന ആശങ്കയും ശക്തമാണ്.
