കേരളത്തെ പ്രമുഖ ബിസിനസ് ഹബ്ബാക്കി മാറ്റണം: ടി.എസ്.കല്യാണരാമൻ

കേരളത്തെ വ്യവസായ സൗഹൃദ കേന്ദ്രമാക്കി മാറ്റേണ്ടത് അനിവാര്യമാണെന്നും അതിനായി സംസ്ഥാനത്ത് ആവശ്യമായ അടിസ്ഥാന സൗകര്യങ്ങളും അനുകൂല സാഹചര്യങ്ങളും നിലവിലുണ്ടെന്നും കല്യാൺ ജ്വല്ലേഴ്സ് മാനേജിങ് ഡയറക്ടർ ടി.എസ്.കല്യാണരാമൻ വ്യക്തമാക്കി. കൊച്ചിയിൽ നടന്ന ബിസിനസ് സമ്മിറ്റ് ഉദ്ഘാടനം ചെയ്ത് സംസാരിക്കവെയാണ് അദ്ദേഹം ഈ അഭിപ്രായം പങ്കുവെച്ചത്.

കേരളം വെറുമൊരു ഉപഭോക്തൃ സംസ്ഥാനം മാത്രമാണെന്നും പ്രവാസികളുടെ നാടാണെന്നുമുള്ള തെറ്റായ പ്രചാരണങ്ങൾ ഒഴിവാക്കി, ലഭ്യമായ സാധ്യതകൾ പരമാവധി പ്രയോജനപ്പെടുത്താൻ പുതിയ സംരംഭകർ മുന്നോട്ടുവരണമെന്ന് അദ്ദേഹം ആഹ്വാനം ചെയ്തു. ഏത് രാഷ്ട്രീയ മുന്നണി അധികാരത്തിൽ വന്നാലും വ്യവസായങ്ങൾ ആരംഭിക്കുന്നതിനായി കിൻഫ്ര പോലുള്ള വ്യവസായ പാർക്കുകളും അനുബന്ധ സൗകര്യങ്ങളും സർക്കാർ സംവിധാനങ്ങൾ ഒരുക്കിയിട്ടുണ്ടെന്ന് അദ്ദേഹം ചൂണ്ടിക്കാട്ടി.

കേന്ദ്ര സർക്കാർ കേരളത്തിലെ മൂന്ന് ജില്ലകളിൽ വ്യവസായങ്ങൾക്കായി 1000 മുതൽ 1500 ഏക്കർ വരെ ഭൂമി അനുവദിച്ചിട്ടുണ്ടെന്നാണ് റിപ്പോർട്ടുകൾ സൂചിപ്പിക്കുന്നത്. എന്നാൽ, സംസ്ഥാനത്ത് തുടർച്ചയായി സമരങ്ങൾ നടക്കുമെന്ന തരത്തിലുള്ള വ്യാജ പ്രചാരണങ്ങൾ മാത്രമാണ് പലരെയും സംരംഭങ്ങളിൽ നിന്ന് പിന്നോട്ട് വലിക്കുന്നത്.

അർഹമായ വേതനവും നിയമപരമായ ആനുകൂല്യങ്ങളും നൽകിയാൽ തൊഴിലാളികൾ മികച്ച രീതിയിൽ ജോലി ചെയ്യുമെന്നും നിലവിൽ ഇവിടെ യാതൊരുവിധ സമരങ്ങളും ഉണ്ടാകുന്നില്ലെന്നും അദ്ദേഹം വ്യക്തമാക്കി. ഇന്നത്തെ കാലത്ത് എല്ലാ ബാങ്കുകളും വായ്പ നൽകാൻ സന്നദ്ധരായി മുന്നോട്ട് വരുന്നുണ്ടെങ്കിലും, ഒരു ബിസിനസ് സുരക്ഷിതമായി കെട്ടിപ്പടുക്കാൻ സംരംഭകർ 25 മുതൽ 30 ശതമാനം വരെ സ്വന്തം മൂലധനം കണ്ടെത്തണമെന്ന് അദ്ദേഹം ഓർമ്മിപ്പിച്ചു.

ആത്മാർത്ഥതയോടെയും സത്യസന്ധതയോടെയും പ്രവർത്തിച്ചാൽ ഏത് സംരംഭവും വിജയം കാണും. ഉൽപ്പന്നങ്ങളുടെ ഗുണമേന്മയിൽ ഒട്ടും വിട്ടുവീഴ്ച ചെയ്യാതെ ഉയർന്ന വിറ്റുവരവിലൂടെ ലാഭവിഹിതം ഉയർത്താൻ സാധിക്കുമെന്നും അദ്ദേഹം കൂട്ടിച്ചേർത്തു.

ആർട്ടിഫിഷ്യൽ ഇന്റലിജൻസിന്റെ ഈ കാലഘട്ടത്തിൽ ഡിജിറ്റൽ മാർക്കറ്റിങ്, ഓൺലൈൻ എഡ്യൂക്കേഷൻ തുടങ്ങിയ ഐടി അധിഷ്ഠിത സംരംഭങ്ങൾ ചെറിയ ഓഫീസുകളിൽ നിന്ന് പോലും ആഗോളതലത്തിൽ വിജയകരമായി നടത്താൻ സാധിക്കും. സോളാർ പ്ലാന്റുകൾ, ഇവി ചാർജിങ് സ്റ്റേഷനുകൾ എന്നിവയുടെ നിർമ്മാണത്തിലും വിപണനത്തിലും വലിയ അവസരങ്ങളാണ് ഉള്ളത്.

വെൽനസ് ഹോമുകൾ, ആയുർവേദ ഉൽപ്പന്ന നിർമ്മാണ യൂണിറ്റുകൾ തുടങ്ങിയവയിലൂടെ ടൂറിസം മേഖലയ്ക്ക് വലിയ ഉത്തേജനം നൽകാനാകും. വരും വർഷങ്ങളിൽ രാജ്യത്തെ പ്രമുഖ തുറമുഖങ്ങളിൽ ഒന്നായി മാറാൻ പോകുന്ന വിഴിഞ്ഞം പദ്ധതിയിലൂടെ വെയർഹൗസിങ്, ട്രാൻസ്പോർട്ടേഷൻ, കയറ്റുമതി-ഇറക്കുമതി മേഖലകളിൽ വിപുലമായ തൊഴിലവസരങ്ങളാണ് തുറക്കപ്പെടുന്നത് എന്നും അദ്ദേഹം എടുത്തുപറഞ്ഞു.

ഉദ്ഘാടനച്ചടങ്ങിൽ സുപ്ര പസിഫിക് ഫിനാൻഷ്യൽ സർവീസസ് സിഇഒ മനോജ് രവി, ഹോംസ് ഇക്വിറ്റീസ് എം.ഡി ഷെറിൻ ഡേവിസ്, മാർക്കറ്റിങ് വൈസ് പ്രസിഡന്റ് വർഗീസ് ചാണ്ടി, എഡിറ്റർ ഇൻ ചാർജ് എസ്. രാജശ്രീ തുടങ്ങിയ പ്രമുഖർ സംബന്ധിച്ചു.