ആലുവയിൽ ഗതാഗത നിയന്ത്രണം കർശനമാക്കി; ദേശീയപാതയിലെ രണ്ട് പാലങ്ങൾ ഇന്ന് മുതൽ അടയ്ക്കും

ആലുവയിൽ ദേശീയപാതയിലെ മാർത്താണ്ഡവർമ പാലവും ദേശം പറമ്പയം പാലവും പത്തു ദിവസത്തെ അറ്റകുറ്റപ്പണികളുടെ ഭാഗമായി ഇന്ന് മുതൽ താൽക്കാലികമായി അടയ്ക്കും. ഇതിന്റെ പശ്ചാത്തലത്തിൽ കർശനമായ ഗതാഗത നിയന്ത്രണങ്ങൾ ഏർപ്പെടുത്തുന്നതിനുള്ള തയ്യാറെടുപ്പുകൾ പൊലീസ് പൂർത്തിയാക്കി.

സുരക്ഷാക്രമീകരണങ്ങളുടെ ഭാഗമായി കളമശേരി എആർ ക്യാംപിൽ നിന്ന് 60 പൊലീസുകാരെയും ആലുവ ട്രാഫിക് സ്റ്റേഷനിലെ ഉദ്യോഗസ്ഥരെയും കൂടാതെ കരാറുകാരുടെ സെക്യൂരിറ്റി ജീവനക്കാരെയും ഡ്യൂട്ടിക്കായി നിയോഗിച്ചിട്ടുണ്ട്. പുളിഞ്ചോട് കവല മുതൽ പറമ്പയം കവല വരെയുള്ള ഭാഗങ്ങളിലാണ് ഇവർ സേവനം അനുഷ്ഠിക്കുക.

വാഹനയാത്രികർക്ക് മുൻകൂട്ടി വിവരം നൽകുന്നതിനായി കളമശേരിയിലും അങ്കമാലിയിലും പ്രത്യേക മുന്നറിയിപ്പ് ബോർഡുകളും സ്ഥാപിക്കും. ഇന്നത്തെ യാത്രാത്തിരക്ക് വിലയിരുത്തിയ ശേഷം, ആവശ്യമാണെങ്കിൽ മുൻകൂട്ടി നിശ്ചയിച്ച ഗതാഗത ക്രമീകരണങ്ങളിൽ മാറ്റങ്ങൾ വരുത്തിയേക്കാമെന്ന് അധികൃതർ വ്യക്തമാക്കി.

കൂടാതെ, ആലുവ ടൗണിൽ ഏതുസമയത്തും ഒറ്റവഴിയാക്കിയുള്ള (വൺവേ) ഗതാടകം നടപ്പിലാക്കാനും സാധ്യതയുണ്ടെന്ന് പൊലീസ് മുന്നറിയിപ്പ് നൽകിയിട്ടുണ്ട്. മെട്രോ സ്റ്റേഷൻ സ്ഥിതി ചെയ്യുന്ന ബൈപാസ് കവലയിൽ ദേശീയപാത അധികൃതരുടെ നേതൃത്വത്തിൽ റോഡിന്റെ മീഡിയനുകൾ വിവിധ ഭാഗങ്ങളിൽ പൊളിച്ചുനീക്കിയിട്ടുണ്ട്.

സർവീസ് റോഡുകളിലെ കാടുകളും മാലിന്യങ്ങളും നീക്കം ചെയ്യുന്ന ജോലികളും പൂർത്തിയായി. മാർത്താണ്ഡവർമയുടെ പുതിയ പാലത്തിലൂടെ ഇരുവശത്തുനിന്നുമുള്ള വാഹനങ്ങൾ ഒരേസമയം കടത്തിവിടുമ്പോൾ അവയെല്ലാം എത്തിച്ചേരുന്നത് ബൈപാസ് കവലയിലാണ്.

പണിനടക്കുന്ന ദിവസങ്ങളിൽ ദേശീയപാതയിലും നഗരത്തിലെ പ്രധാന പാതകളിലും അനധികൃതമായി വാഹനം പാർക്ക് ചെയ്യുന്നത് കർശനമായി തടയുമെന്ന് പൊലീസ് അറിയിച്ചു. ഇന്ന് പുലർച്ചെ മുതലാണ് പഴയ മാർത്താണ്ഡവർമ പാലം പൂർണമായി അടച്ച് പുതിയ പാലത്തിലൂടെ ഗതാഗതം തിരിച്ചുവിട്ടു തുടങ്ങിയത്.

മാർത്താണ്ഡവർമ പാലം പൊതുജനങ്ങൾക്കിടയിൽ സുപരിചിതമാണെങ്കിലും, അറ്റകുറ്റപ്പണി നടക്കുന്ന ദേശം പാലം ഏതാണെന്ന കാര്യത്തിൽ ഇനിയും വ്യക്തത വരാത്തവരുണ്ട്. ദേശീയപാതയിലെ മംഗലപ്പുഴ പാലമാണ് ഇതെന്ന് പലരും തെറ്റിദ്ധരിച്ചിരിക്കുകയാണ്.

എന്നാൽ, പറമ്പയം കവലയ്ക്കും ദേശം കവലയ്ക്കും ഇടയിലുള്ള ‘ദേശം മേജർ ബ്രിജി’ലാണ് ഇപ്പോൾ അറ്റകുറ്റപ്പണികൾ നടക്കുന്നത്. ഈ പാലം നാട്ടുകാർക്കിടയിൽ പറമ്പയം പാലം എന്നാണ് അറിയപ്പെടുന്നത്.