ശ്രീലങ്ക എ ടീമിനെതിരായ അനൗദ്യോഗിക ചതുർദിന ടെസ്റ്റ് മത്സരത്തിന്റെ മൂന്നാം ദിനം പിന്നിടുമ്പോൾ ഇന്ത്യ എ മികച്ച വിജയപ്രതീക്ഷയിൽ. പേസർ ആഖിബ് നബിയുടെ തകർപ്പൻ ബൗളിങ് മികവിലാണ് ഇന്ത്യ കളിയിൽ ആധിപത്യം ഉറപ്പിച്ചത്.
330 റൺസിന് ശ്രീലങ്കയുടെ ഒന്നാം ഇന്നിംഗ്സ് അവസാനിപ്പിച്ച ഇന്ത്യ, 122 റൺസിന്റെ നിർണായക ലീഡ് സ്വന്തമാക്കി. രണ്ടാം ഇന്നിംഗ്സിൽ വിക്കറ്റ് നഷ്ടമില്ലാതെ 48 റൺസെടുത്ത ഇന്ത്യ, നിലവിൽ 170 റൺസിന്റെ ആകെ ലീഡിലാണ്.
മൂന്നാം ദിനം രണ്ട് വിക്കറ്റിന് 113 റൺസ് എന്ന നിലയിൽ ബാറ്റിംഗ് പുനരാരംഭിച്ച ലങ്ക, ഒരു ഘട്ടത്തിൽ അഞ്ച് വിക്കറ്റിന് 300 റൺസ് എന്ന ശക്തമായ നിലയിലായിരുന്നു. അഷെൻ ബണ്ഡാര (70), ക്യാപ്റ്റൻ സഹൻ അരച്ചിഗെ (72) എന്നിവർ ചേർന്നുള്ള 117 റൺസിന്റെ കൂട്ടുകെട്ട് ഇന്ത്യൻ ബൗളർമാരെ പ്രതിരോധത്തിലാക്കി.
എന്നാൽ സ്പിന്നർമാരായ സാരാംശ് ജെയിനും ഹർഷ് ദുബെയും ചേർന്ന് ഈ കൂട്ടുകെട്ട് തകർത്തതോടെ കളി ഇന്ത്യയുടെ നിയന്ത്രണത്തിലായി. ശ്രീലങ്ക 5 വിക്കറ്റിന് 268 റൺസിൽ നിൽക്കെ, ഇന്ത്യൻ നായകൻ ധ്രുവ് ജുറെൽ പുതിയ പന്ത് എടുത്തത് നിർണായകമായി.
തുടർന്ന് 30 റൺസ് വിട്ടുകൊടുക്കുന്നതിനിടെ ലങ്കയുടെ അവസാന അഞ്ച് വിക്കറ്റുകൾ ഇന്ത്യ പിഴുതു. 19.4 ഓവറിൽ 58 റൺസ് വഴങ്ങി 4 വിക്കറ്റ് നേടിയ ആഖിബ് നബിയാണ് ലങ്കൻ ഇന്നിംഗ്സ് 330 റൺസിൽ അവസാനിപ്പിക്കാൻ നേതൃത്വം നൽകിയത്.
മറുപടി ബാറ്റിംഗിൽ ഇന്ത്യയ്ക്ക് ചെറിയ തിരിച്ചടിയേറ്റു. ആദ്യ ഇന്നിംഗ്സിൽ സെഞ്ച്വറി നേടിയ സായ് സുദർശൻ പരിക്കേറ്റ് പുറത്തായെങ്കിലും, ആയുഷ് പാണ്ഡെയും (20*), ദേവ്ദത്ത് പടിക്കലും (20*) ചേർന്ന് രണ്ടാം ഇന്നിംഗ്സിൽ കൂടുതൽ വിക്കറ്റുകൾ നഷ്ടപ്പെടാതെ ദിവസം അവസാനിപ്പിച്ചു.
മത്സരത്തിന്റെ അവസാന ദിനമായ നാളെ, ലഞ്ചിന് മുൻപ് പരമാവധി റൺസ് കണ്ടെത്തി ശ്രീലങ്കയ്ക്ക് മുന്നിൽ 300-ൽ അധികം റൺസിന്റെ വിജയലക്ഷ്യം ഉയർത്താനാണ് ഇന്ത്യ ലക്ഷ്യമിടുന്നത്. ശേഷം ലങ്കയെ ഓൾഔട്ടാക്കി മത്സരം വരുതിയിലാക്കാൻ കഴിയുമെന്ന ആത്മവിശ്വാസത്തിലാണ് ടീം ഇന്ത്യ.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
