ആഗോള സമാധാനത്തിന് കടുത്ത ഭീഷണി; പാക്കിസ്ഥാനെതിരെ തുറന്നടിച്ച് എസ്. ജയശങ്കർ

ആഗോളതലത്തിൽ സമാധാനാന്തരീക്ഷം തകർക്കുന്നതിൽ ഭീകരവാദം വലിയൊരു ആപത്തായി തുടരുന്നുവെന്ന് ഇന്ത്യൻ വിദേശകാര്യ മന്ത്രി എസ്. ജയശങ്കർ വ്യക്തമാക്കി.

ന്യൂയോർക്ക് നഗരത്തിൽ നടന്ന ഐക്യരാഷ്ട്ര സംഘടന പൊതുസഭയുടെ 81ാം സമ്മേളനത്തെ അഭിസംബോധന ചെയ്ത് സംസാരിക്കവെയാണ് അദ്ദേഹം ഇക്കാര്യം വ്യക്തമാക്കിയത്. ഭരണകൂടങ്ങളുടെ പിന്തുണയോടെ അതിർത്തി കടന്നുള്ള ഭീകരപ്രവർത്തനങ്ങൾ നടത്തുന്ന പാക്കിസ്ഥാനെതിരെ പരോക്ഷമായും എന്നാൽ ശക്തമായുമാണ് അദ്ദേഹം ആഞ്ഞടിച്ചത്.

രാജ്യസുരക്ഷ ഉറപ്പാക്കുന്നതിനായി തീവ്രവാദത്തിനെതിരെ സ്വയം പ്രതിരോധിക്കാനുള്ള എല്ലാ അവകാശങ്ങളും ഇന്ത്യ പൂർണ്ണമായി വിനിയോഗിക്കുമെന്ന് അദ്ദേഹം ആഗോള സമൂഹത്തിന് മുന്നിൽ വ്യക്തമാക്കുകയുണ്ടായി. ഭീകരവാദ ഭീഷണികളെ നേരിടുന്ന കാര്യത്തിൽ യാതൊരുവിധ വിട്ടവീഴ്ചയ്ക്കും രാജ്യം തയ്യാറല്ലെന്ന് എസ്.

ജയശങ്കർ ഉറപ്പിച്ചു പറഞ്ഞു. ഭീകരതയോട് ഒട്ടും സഹിഷ്ണുത കാണിക്കാത്ത ‘സീറോ ടോളറൻസ്’ നയം കർശനമായി പാലിക്കപ്പെടണമെന്നും, ഇത്തരം ശക്തികളെ തുറന്നുകാട്ടി ചെറുത്തുതോൽപ്പിക്കണമെന്നും അദ്ദേഹം ആവശ്യപ്പെട്ടു.

രാജ്യങ്ങളുടെ ഔദ്യോഗിക നയങ്ങളുടെ ഭാഗമായി ഭീകരവാദത്തെ ഒരു ആയുധമായി ഉപയോഗിക്കുന്ന പ്രവണതകൾ പൂർണ്ണമായി അവസാനിപ്പിക്കണമെന്നും അദ്ദേഹം ഓർമ്മിപ്പിച്ചു. ഐക്യരാഷ്ട്ര സംഘടന പൊതുസഭയുടെ സമ്മേളനത്തിനിടയിൽ ഇന്ത്യക്കെതിരെ അടിസ്ഥാനരഹിതമായ ചോദ്യം ഉന്നയിച്ച പാക്കിസ്ഥാൻ മാധ്യമ പ്രവർത്തകന് എസ്.

ജയശങ്കർ നൽകിയ ചുട്ട മറുപടി ശ്രദ്ധേയമായിരുന്നു.

‘ഇന്ത്യ എപ്പോഴാണ് പാക്കിസ്ഥാനിൽ ഭീകരവാദം സ്പോൺസർ ചെയ്യുന്നത് അവസാനിപ്പിക്കുക?’ എന്നായിരുന്നു പാക്ക് റിപ്പോർട്ടറുടെ ചോദ്യം. ഇതിന് മറുപടിയായി ‘ഒരു ഭീകരവാദ രാജ്യമാണോ എന്നോട് ഈ ചോദ്യം ചോദിക്കുന്നത്?’ എന്നാണ് അദ്ദേഹം തിരിച്ചടിച്ചത്.

ലൈബീരിയൻ വിദേശകാര്യമന്ത്രി സാറ ബെയ്സോളോ ന്യാൻതിയ്ക്കൊപ്പം നടത്തിയ വാർത്താസമ്മേളനത്തിലാണ് ഈ സംഭവങ്ങൾ അരങ്ങേറിയത്. പാക്ക് മാധ്യമപ്രവർത്തകൻ തെറ്റായ പ്രചാരണങ്ങളും ആരോപണങ്ങളും ആവർത്തിച്ചതിനെ തുടർന്ന് മന്ത്രിയും സംഘവും യോഗസ്ഥലത്തുനിന്ന് ഇറങ്ങിപ്പോവുകയും ചെയ്തു.