രാജ്യത്ത് ഇലക്ട്രിക് വാഹന ചാർജിങ് സൗകര്യങ്ങൾ വർദ്ധിപ്പിക്കാൻ ഹ്യുണ്ടായിയും ജിയോ-ബിപിയും കൈകോർക്കുന്നു

ഇന്ത്യയിലെ ഇലക്ട്രിക് വാഹന ചാർജിങ് മേഖല കൂടുതൽ ശക്തമാക്കുന്നതിന്റെ ഭാഗമായി ഹ്യുണ്ടായ് മോട്ടോർ ഇന്ത്യയും ജിയോ-ബിപിയും ഔദ്യോഗികമായി ഒന്നിക്കുന്നു. രാജ്യത്തുടനീളമുള്ള ഇലക്ട്രിക് വാഹന ഉപയോക്താക്കൾക്ക് കൂടുതൽ ചാർജിങ് സ്റ്റേഷനുകൾ എളുപ്പത്തിൽ കണ്ടെത്താനും തടസ്സമില്ലാതെ ഉപയോഗിക്കാനും സഹായകരമാകുന്നതാണ് ഈ പുതിയ പങ്കാളിത്തം.

റിലയൻസ് ഇൻഡസ്ട്രീസും ബി.പിയും ചേർന്നുള്ള സംയുക്ത സംരംഭമായ റിലയൻസ് ബി.പി മൊബിലിറ്റിയുടെ കീഴിൽ പ്രവർത്തിക്കുന്ന ബ്രാൻഡാണ് ഇലക്ട്രിക് വാഹന ചാർജിങ് സേവനങ്ങൾ നൽകുന്ന ജിയോ-ബിപി. ഈ സഹകരണത്തിന്റെ ഭാഗമായി ജിയോ-ബിപിയുടെ പൾസ് ചാർജിങ് ശൃംഖല ഹ്യുണ്ടായിയുടെ മൈഹ്യുണ്ടായ് ആപ്പുമായി സംയോജിപ്പിക്കും.

ഇതോടെ ആപ്പ് വഴി ജിയോ-ബിപി ചാർജിങ് സ്റ്റേഷനുകൾ എളുപ്പത്തിൽ കണ്ടെത്താനും, അവയുടെ ലഭ്യത തത്സമയം പരിശോധിക്കാനും, ചാർജിങ് സേവനം പ്രയോജനപ്പെടുത്താനും സാധിക്കും. ജിയോ-ബിപിയുടെ ശൃംഖല കൂടി ഉൾപ്പെടുത്തിയതോടെ മൈഹ്യുണ്ടായ് ആപ്പിലൂടെ ലഭ്യമാകുന്ന ഇലക്ട്രിക് വാഹന ചാർജിങ് പോയിന്റുകളുടെ എണ്ണം 37,000 കവിഞ്ഞു.

ഇതിനുപുറമെ, ഹ്യുണ്ടായിയുടെ ഉയർന്ന ശേഷിയുള്ള ചാർജറുകൾ ഘട്ടംഘട്ടമായി ജിയോ-ബിപി പൾസ് ചാർജ് പ്രോ ആപ്പിലും ഉൾപ്പെടുത്തും. രാജ്യത്തെ 300ലധികം നഗരങ്ങളിലായി വ്യാപിച്ചുകിടക്കുന്ന 7,000ൽ അധികം സജീവ ചാർജിങ് പോയിന്റുകളാണ് ജിയോ-ബിപി ഈ ശൃംഖലയിലൂടെ ലഭ്യമാക്കുന്നത്.

രാജ്യത്തെ പ്രധാന ദേശീയപാതകളുടെ സമീപത്തും ജിയോ-ബിപിയുടെ നിരവധി ചാർജിങ് സ്റ്റേഷനുകൾ ഇതിനോടകം പ്രവർത്തിക്കുന്നുണ്ട്. ഇത് ദീർഘദൂര യാത്ര നടത്തുന്ന ഇലക്ട്രിക് വാഹന ഉടമകൾക്ക് കൂടുതൽ ആത്മവിശ്വാസം നൽകുമെന്നാണ് കമ്പനികളുടെ വിലയിരുത്തൽ.

ജിയോ-ബിപിയുടെ ശൃംഖലയിൽ 60 കിലോവാട്ട് മുതൽ 480 കിലോവാട്ട് വരെ ശേഷിയുള്ള ഡിസി അതിവേഗ ചാർജറുകൾ ഉൾപ്പെടുത്തിയിട്ടുണ്ട്. വാഹനങ്ങളുടെ പരമാവധി ചാർജിങ് ശേഷിയോട് അടുത്ത വേഗതയിൽ ബാറ്ററി റീചാർജ് ചെയ്യാൻ ഇത്തരം സംവിധാനങ്ങൾ സഹായിക്കും.

കൂടാതെ, ജിയോ-ബിപിയുടെ ശൃംഖല 96 ശതമാനം പ്രവർത്തനക്ഷമത നിലനിർത്തുന്നതായും കമ്പനി വ്യക്തമാക്കിയിട്ടുണ്ട്. മൈഹ്യുണ്ടായ് ആപ്പിലെ ഈ ചാർജിങ് സൗകര്യം ഉപയോഗപ്പെടുത്താൻ ഹ്യുണ്ടായിയുടെ വാഹനം തന്നെ വേണമെന്നില്ല എന്നത് മറ്റൊരു പ്രത്യേകതയാണ്.

ഏത് വാഹന നിർമാതാവിന്റെ ഇലക്ട്രിക് വാഹനമുള്ളവർക്കും ഈ ആപ്പിലൂടെ ലഭ്യമായ പൊതു ചാർജിങ് പോയിന്റുകൾ കണ്ടെത്താനും ഉപയോഗിക്കാനും സാധിക്കും. ഒറ്റ ഡിജിറ്റൽ സംവിധാനത്തിലൂടെ വിവിധ കമ്പനികളുടെ ചാർജിങ് സ്റ്റേഷനുകൾ കണ്ടെത്താൻ സാധിക്കുന്നത് ഇലക്ട്രിക് വാഹന ഉടമകൾക്ക് വലിയ ആശ്വാസമാകും.

സ്വന്തം ചാർജിങ് ശൃംഖലയും ഹ്യുണ്ടായ് വലിയ തോതിൽ വിപുലീകരിച്ചുവരികയാണ്. നിലവിൽ 183 ഡിസി അതിവേഗ ചാർജിങ് സ്റ്റേഷനുകളാണ് കമ്പനി രാജ്യത്ത് പ്രവർത്തിപ്പിക്കുന്നത്.

2030ഓടെ ഈ ശൃംഖല 600 സ്റ്റേഷനുകളായി ഉയർത്താനാണ് ലക്ഷ്യമിടുന്നത്. ഇലക്ട്രിക് വാഹനങ്ങളുടെ എണ്ണം വർധിച്ചുവരുന്ന സാഹചര്യത്തിൽ ചാർജിങ് സൗകര്യങ്ങളുടെ ലഭ്യതയും വിശ്വാസ്യതയും മെച്ചപ്പെടുത്തുകയാണ് ഈ പങ്കാളിത്തത്തിന്റെ പ്രധാന ലക്ഷ്യം.

ഇലക്ട്രിക് വാഹന ഉപയോക്താക്കളുടെ ആശങ്ക ഇപ്പോൾ വാഹനത്തിന്റെ മൈലേജിൽ നിന്ന് ചാർജിങ് സൗകര്യത്തിന്റെ ലഭ്യതയിലേക്കാണ് മാറുന്നതെന്ന് ഹ്യുണ്ടായ് മോട്ടോർ ഇന്ത്യയുടെ കോർപ്പറേറ്റ് പ്ലാനിങ് വിഭാഗം എക്സിക്യൂട്ടീവ് ഡയറക്ടറും ഫംഗ്ഷൻ മേധാവിയുമായ ഹ്യുൻ സൂപ് ലീ വ്യക്തമാക്കി. ഈ സാഹചര്യത്തിൽ ജിയോ-ബിപിയുമായുള്ള പങ്കാളിത്തം ഇന്ത്യയിലെ ഇലക്ട്രിക് വാഹന അടിസ്ഥാനസൗകര്യം ശക്തിപ്പെടുത്തുന്നതിനുള്ള സുപ്രധാന ചുവടുവയ്പ്പാണെന്നും അദ്ദേഹം കൂട്ടിച്ചേർത്തു.