ചാമ്പ്യൻസ് ബോട്ട് ലീഗ്: താഴത്തങ്ങാടി വള്ളംകളിയിൽ അരോമ ചുണ്ടന് കിരീടം

കേരള ടൂറിസം വകുപ്പിന്‍റെ ആഭിമുഖ്യത്തിൽ സംഘടിപ്പിച്ച ചാമ്പ്യൻസ് ബോട്ട് ലീഗിന്റെ (സി.ബി.എൽ) ഭാഗമായി കോട്ടയം താഴത്തങ്ങാടിയിൽ നടന്ന ആവേശകരമായ മത്സരവള്ളംകളിയിൽ അരോമ ചുണ്ടൻ ജേതാക്കളായി. ശക്തമായ പോരാട്ടം നടന്ന ഫൈനൽ മത്സരത്തിൽ കൊല്ലം പരവൂർ അരോമ ബോട്ട് ക്ലബ്ബിന്റെ തുഴച്ചിൽക്കാരായ അരോമ ചുണ്ടൻ, മൂന്നു മിനിറ്റ് 21.227 സെക്കൻഡ് സമയത്തിൽ ഒന്നാം സ്ഥാനത്ത് ഫിനിഷ് ചെയ്യുകയായിരുന്നു.

പള്ളാത്തുരുത്തി ബോട്ട് ക്ലബ്ബിന്റെ മേൽപ്പടം ചൂണ്ടൻ (മൂന്നു മിനിറ്റ് 21.802 സെക്കൻഡ്), നിരണം ബോട്ട് ക്ലബ്ബിന്റെ നിരണം ചുണ്ടൻ (മൂന്നു മിനിറ്റ് 21.925 സെക്കൻഡ്) എന്നിവർ യഥാക്രമം രണ്ടും മൂന്നും സ്ഥാനങ്ങൾ കരസ്ഥമാക്കി. മത്സരത്തിൽ വീയപുരം, ചെറുതന, ആർപ്പൂക്കര, പുണ്യാളൻ നിരണം, നടുഭാഗം, തലവടി എന്നീ ബോട്ട് ക്ലബ്ബുകൾ നാലു മുതൽ ഒൻപതു വരെയുള്ള സ്ഥാനങ്ങൾ നേടി.

ഇതിനുപുറമെ വിവിധ വിഭാഗങ്ങളിൽ നടന്ന മത്സരങ്ങളിൽ പുത്തൻപറമ്പ് (ഇരുട്ടുകുത്തി ബി ഗ്രേഡ്), ചാമ്പ്യൻ (വെപ്പ് ബി ഗ്രേഡ്), മൂഴി (ചുരുളൻ വിഭാഗം), മൂന്നുതൈയ്ക്കൻ (ഇരുട്ടുകുത്തി എ ഗ്രേഡ്) എന്നിവരും വിജയികളായി. മത്സരങ്ങളുടെ സമാപനത്തോടനുബന്ധിച്ച് നടന്ന ചടങ്ങിൽ ജില്ലാ പൊലീസ് മേധാവി കെ.എം.

സാബു മാത്യു വിജയികൾക്കുള്ള സമ്മാനദാനം നിർവഹിച്ചു. സി.ബി.എൽ മത്സരത്തിൽ ഒന്നാം സ്ഥാനം നേടിയ അരോമ ബോട്ട് ക്ലബ്ബിന് അഞ്ചു ലക്ഷം രൂപയും, രണ്ടാം സ്ഥാനം നേടിയ പള്ളാത്തുരുത്തി ബോട്ട് ക്ലബ്ബിന് മൂന്നു ലക്ഷം രൂപയും, മൂന്നാം സ്ഥാനത്തെത്തിയ നിരണം ബോട്ട് ക്ലബ്ബിന് ഒരു ലക്ഷം രൂപയും സമ്മാനത്തുകയായി ലഭിക്കും.