കെഎസ്ആർടിസിക്ക് ചരിത്രത്തിൽ ആദ്യമായി സ്വകാര്യ വ്യക്തി ബസ് നൽകുന്നു; 40 ലക്ഷം രൂപ സംഭാവന ചെയ്ത് ജോസ്

സംസ്ഥാനത്തെ പൊതുഗതാഗത സംവിധാനമായ കെഎസ്ആർടിസിയെ സഹായിക്കാനായി മാതൃകാപരമായ ചുവടുവെപ്പുമായി രംഗത്തെത്തിയിരിക്കുകയാണ് അങ്കമാലി മുക്കന്നൂർ സ്വദേശിയായ ജോസ്. കോർപ്പറേഷന്റെ ചരിത്രത്തിൽ ആദ്യമായാണ് ഒരു സ്വകാര്യ വ്യക്തി സ്വന്തം നിലയിൽ ബസ് വാങ്ങുന്നതിനായി തുക സംഭാവന ചെയ്യുന്നത്.

മന്ത്രിസഭാ യോ​ഗത്തിന് ശേഷം തിരുവനന്തപുരം മുഖ്യമന്ത്രിയുടെ ചേംബറിൽ നടന്ന ലളിതമായ ചടങ്ങിൽ 40 ലക്ഷം രൂപയുടെ ചെക്ക് ജോസ് മുഖ്യമന്ത്രി വി.ഡി സതീശന് കൈമാറി. ഇതൊരു നല്ല കൈനീട്ടമാകട്ടെയെന്നും കൂടുതൽ സ്വകാര്യ വ്യക്തികളും സ്ഥാപനങ്ങളും കെഎസ്ആർടിസിക്ക് ബസ് വാങ്ങി നൽകാൻ ഇടവരട്ടെയെന്നും പറഞ്ഞാണ് മുഖ്യമന്ത്രി ചെക്ക് ഏറ്റുവാങ്ങി ​ഗതാ​ഗത മന്ത്രി സി.പി ജോണിന് കൈമാറിയത്.

ജോസേട്ടന്റെ തീരുമാനം മാതൃകാപരമാണെന്ന് മന്ത്രി റോജി എം ജോൺ പറഞ്ഞു. ഉന്നത വിദ്യാഭ്യാസ മന്ത്രി റോജി എം ജോണിന്റെ മണ്ഡലത്തിൽ ഹീമാൻ ഓട്ടോ റോബോ പാർക്ക് എന്ന കമ്പനി നടത്തുന്നയാളാണ് ജോസ്.

കെഎസ്ആർടിസിയെ പിന്തുണച്ച് ജനങ്ങൾ രം​ഗത്തുവരണമെന്ന മുഖ്യമന്ത്രിയുടെ ആഹ്വാനം കേട്ട് ബസ് വാങ്ങി നൽകാൻ തീരുമാനിച്ച ജോസ് ഇക്കാര്യം ആദ്യം അറിയിച്ചത് മന്ത്രി റോജി എം ജോണിനെയാണ്. ചൊവ്വാഴ്ച ​ഗതാ​ഗത മന്ത്രി സി.പി ജോണുമായി നടത്തിയ കൂടിക്കാഴ്ചയിലാണ് ജോസിന്റെ ഈ ഉദാരമനസ്സ് മന്ത്രി റോജി എം ജോൺ അറിയിക്കുന്നത്.

തുടർന്ന് ജോസേട്ടനെ നേരിട്ട് വിളിച്ച് തുക കൈമാറാൻ അധികൃതർ സൗകര്യം ഒരുക്കുകയായിരുന്നു. താൻ നൽകുന്ന ബസ് അങ്കമാലി ഡിപ്പോയിൽ നിന്ന് സർവീസ് നടത്തണമെന്നത് മാത്രമാണ് ജോസിന്റെ പ്രധാന ആവശ്യം.

അതിരപ്പിള്ളി വിനോദസഞ്ചാര മേഖലയെ തെക്കൻ കേരളവുമായി ബന്ധിപ്പിക്കുന്ന രീതിയിൽ റൂട്ട് വേണമെന്നും അദ്ദേഹം ​ഗതാ​ഗത മന്ത്രിയോട് ആവശ്യപ്പെട്ടു. സമാനമായ ആവശ്യം റോജി എം ജോണും ഉന്നയിച്ചിട്ടുണ്ട്.

ജോസ് പറയുന്ന റൂട്ടിൽ ബസ് സർവീസ് നടത്തുന്ന കാര്യത്തിൽ ​ഗതാ​ഗത മന്ത്രി ഉറപ്പുനൽകി. കാലിക്കറ്റ് സിറ്റി സഹകരണ ബാങ്ക് നേരത്തെ കെഎസ്ആർടിസിക്ക് ഒരു ബസ് വാങ്ങാൻ തുക സംഭാവന ചെയ്തപ്പോൾ ഈ മാതൃക പിന്തുടരാൻ കൂടുതൽ പേർ വരുമെന്ന് പ്രതീക്ഷിച്ചിരുന്നതായി ​ഗതാ​ഗത മന്ത്രി സി.പി ജോൺ വ്യക്തമാക്കി.

കെഎസ്ആർടിസിയുടെ ചരിത്രത്തിൽ ആദ്യത്തെ സംഭവമാണിതെന്നും കോർപറേഷനെ പിന്തുണയ്ക്കാൻ കൂടുതൽ പേർ മുന്നോട്ട് വരുമെന്ന് പ്രതീക്ഷിക്കുന്നുവെന്നും മുഖ്യമന്ത്രി കൂട്ടിച്ചേർത്തു. ജോസ് നൽകിയ ചെക്ക് ​ഗതാ​ഗത മന്ത്രി കെഎസ്ആർടിസി സിഎംഡി ഡോ.

പി.എസ് പ്രമോജ് ശങ്കറിന് കൈമാറി. സർക്കാരിൻ്റെ നൂറുദിന കർമ്മപദ്ധതിയുടെ ഭാഗമായി, പൊതുഗതാഗത സൗകര്യം മെച്ചപ്പെടുത്തുന്നതിനായാണ് ബസുകൾ സ്പോൺസർ ചെയ്യാൻ കെഎസ്ആർടിസി അവസരമൊരുക്കുന്നത്.

തദ്ദേശ സ്വയംഭരണ സ്ഥാപനങ്ങൾ, സഹകരണ സ്ഥാപനങ്ങൾ, കമ്പനികൾ, ട്രസ്റ്റുകൾ, സന്നദ്ധ സംഘടനകൾ, സിഎസ്ആർ ഫണ്ടുകൾ ഉപയോഗിച്ചും ബസുകൾ നൽകാമെന്ന് ​ഗതാ​ഗത മന്ത്രി അറിയിച്ചു.