മുണ്ടക്കൈ-ചൂരൽമല പുനരധിവാസം: മുഴുവൻ പദ്ധതികളും വേഗത്തിൽ പൂർത്തിയാക്കുമെന്ന് മന്ത്രി അഡ്വ. ടി സിദ്ദീഖ്

മുണ്ടക്കൈ-ചൂരൽമല ഉരുൾപൊട്ടൽ ദുരന്തബാധിതരുടെ പുനരധിവാസവുമായി ബന്ധപ്പെട്ട എല്ലാ പ്രവർത്തനങ്ങളും സമയബന്ധിതമായി പൂർത്തീകരിക്കുമെന്ന് കൃഷി വകുപ്പ് മന്ത്രി അഡ്വ.

ടി സിദ്ദീഖ് വ്യക്തമാക്കി. അതിജീവിതരുടെ ഉപജീവനമാർഗ്ഗങ്ങൾ ലക്ഷ്യമിട്ട് കുടുംബശ്രീ മിഷന്റെ സഹകരണത്തോടെ നടപ്പിലാക്കുന്ന മൈക്രോ പ്ലാൻ പദ്ധതിയുടെ ഭാഗമായി, മുഖ്യമന്ത്രിയുടെ ദുരിതാശ്വാസ നിധിയിൽ നിന്നും അനുവദിച്ച അധിക ധനസഹായത്തിന്റെ വിതരണോദ്ഘാടനം കൽപ്പറ്റ ചന്ദ്രഗിരി ഓഡിറ്റോറിയത്തിൽ നിർവഹിച്ച് സംസാരിക്കുകയായിരുന്നു അദ്ദേഹം.

ദുരന്തത്തിൽ വീടും സർവ്വസ്വവും നഷ്ടപ്പെട്ടവരുടെ ഗുണഭോക്തൃ പട്ടിക കൃത്യസമയത്ത് തന്നെ തയ്യാറാക്കുമെന്ന് മന്ത്രി അറിയിച്ചു. ഇതിനുപുറമെ, ഉരുൾപൊട്ടലിൽ തകർന്ന കച്ചവട

സ്ഥാപനങ്ങൾ, കെട്ടിട ഉടമകൾ എന്നിവർക്കുള്ള നഷ്ടപരിഹാരം നൽകുന്ന പ്രക്രിയയും, ബാങ്ക് വായ്പകൾ ഏറ്റെടുക്കുന്നതുൾപ്പെടെയുള്ള നടപടികളും വേഗത്തിലാക്കും.

കൃഷിഭൂമി വീണ്ടും കൃഷിയോഗ്യമാക്കുന്നതിനുള്ള പ്രത്യേക പദ്ധതികളും സമയബന്ധിതമായി നടപ്പിലാക്കുമെന്നും അദ്ദേഹം കൂട്ടിച്ചേർത്തു. ദുരന്തബാധിതരായ ജനങ്ങൾക്ക് സമൂഹത്തിന്റെ പിന്തുണയോടെ ആത്മവിശ്വാസത്തോടെ മുന്നോട്ട് പോകാനുള്ള എല്ലാ സാഹചര്യങ്ങളും സർക്കാരും ജില്ലാ ഭരണകൂടവും തദ്ദേശ സ്വയംഭരണ സ്ഥാപനങ്ങളും ചേർന്ന് ഉറപ്പാക്കുന്നുണ്ട്.

ആദ്യഘട്ടത്തിൽ ഉപജീവനത്തിനായുള്ള മൈക്രോ പ്ലാനുകൾക്കായി 1.98 കോടി രൂപയാണ് അനുവദിച്ചത്. തുടർന്ന് രണ്ടാം ഘട്ടമായി 2.31 കോടി രൂപയുടെ പദ്ധതികൾ കൂടി ആവിഷ്കരിക്കുകയുണ്ടായി.

മന്ത്രിസഭാ ഉപസമിതിയുടെ നേതൃത്വത്തിൽ നടത്തിയ കൂടിയാലോചനകൾക്ക് ശേഷമാണ് ഉപജീവന മാർഗ്ഗങ്ങൾ കണ്ടെത്തുന്നതിനായി രണ്ടു ലക്ഷം രൂപ വീതം അനുവദിക്കാൻ തീരുമാനിച്ചത്. ഇതിനായി മുഖ്യമന്ത്രിയുടെ ദുരിതാശ്വാസ നിധിയിൽ നിന്നും ആകെ 5.11 കോടി രൂപയാണ് വകയിരുത്തിയത്.

വയനാട് ജില്ലയിലെ കാലാവസ്ഥാ വ്യതിയാനങ്ങൾ കൃത്യമായി നിരീക്ഷിക്കുന്നതിനും മുൻകരുതലുകൾ സ്വീകരിക്കുന്നതിനുമായി അത്യാധുനിക ഡോപ്ലർ റഡാർ ഈ വരുന്ന ഡിസംബറോടെ പ്രവർത്തനക്ഷമമാകും. ദുരന്തനിവാരണ രംഗത്ത് മികച്ച അവബോധമുള്ള ഒരു സമൂഹത്തെ ജില്ലയിൽ വാർത്തെടുക്കുകയാണ് സർക്കാരിന്റെ പ്രധാന ലക്ഷ്യമെന്നും ഇതിനായി എല്ലാവിധ പിന്തുണയും നൽകുമെന്നും മന്ത്രി വ്യക്തമാക്കി.

ചടങ്ങിൽ എം.എൽ.എ ഐ.സി ബാലകൃഷ്ണൻ അധ്യക്ഷത വഹിച്ചു. കാലാവസ്ഥാ വ്യതിയാനം മൂലമുണ്ടാകുന്ന ദുരന്തങ്ങളെ ഫലപ്രദമായി പ്രതിരോധിക്കുന്നതിനുള്ള സമഗ്ര മാസ്റ്റർ പ്ലാനുമായി ജില്ലാ ഭരണകൂടം മുന്നോട്ട് പോവുകയാണെന്ന് അദ്ദേഹം പറഞ്ഞു.

കൽപ്പറ്റ ചന്ദ്രഗിരി ഓഡിറ്റോറിയത്തിൽ സംഘടിപ്പിച്ച ചടങ്ങിൽ ജില്ലാ പഞ്ചായത്ത് പ്രസിഡന്റ് ചന്ദ്രിക കൃഷ്ണൻ, ജില്ലാ കളക്ടർ ഡി.ആർ മേഘശ്രീ, കൽപ്പറ്റ നഗരസഭാ ചെയർപേഴ്സൺ പി വിശ്വനാഥൻ, ജില്ലാ പഞ്ചായത്ത് വൈസ് പ്രസിഡന്റ് ടി. ഹംസ, കൽപ്പറ്റ ബ്ലോക്ക് പഞ്ചായത്ത് പ്രസിഡന്റ് കെ.കെ ഹനീഫ, തദ്ദേശ സ്വയംഭരണ വകുപ്പ് ജോയിന്റ് ഡയറക്ടർ പി.സി മജീദ്, കാലിക്കറ്റ് സർവകലാശാല മുൻ വൈസ് ചാൻസലർ കെ.കെ.എൻ കുറുപ്പ്, ഗ്രാമപഞ്ചായത്ത് അസോസിയേഷൻ സെക്രട്ടറി ജാസർ പാലക്കൽ, ബ്ലോക്ക് പഞ്ചായത്ത് അംഗം സി ശിഹാബ്, കുടുംബശ്രീ ജില്ലാ മിഷൻ കോ-ഓർഡിനേറ്റർ കെ.പി ജയചന്ദ്രൻ, എ.ഡി.എം.സി കെ.എം സലീന, ജില്ലാ പ്രോഗ്രാം മാനേജ‌ർ പി ഹുദൈഫ് എന്നിവർക്കൊപ്പം വിവിധ ജനപ്രതിനിധികളും രാഷ്ട്രീയ പാർട്ടി പ്രതിനിധികളും ഉദ്യോഗസ്ഥരും സന്നിഹിതരായിരുന്നു.