നഗരവാസികളിൽ സെൻസസ് സംബന്ധമായ അവബോധം സൃഷ്ടിക്കുന്നതിനായി കാഞ്ഞങ്ങാട് നഗരസഭയിലെ ഉദ്യോഗസ്ഥർ തയാറാക്കിയ ബോധവൽക്കരണ വിഡിയോ ശ്രദ്ധേയമാകുന്നു. ‘എണ്ണത്തിൽപെടണം’ എന്ന് പേരിട്ടിരിക്കുന്ന ഈ വിഡിയോ സമാഹരിച്ചത് റവന്യു ഇൻസ്പെക്ടർ സുജിത്ത് നമ്പ്യാരുടെ നേതൃത്വത്തിലാണ്.
ടൊവിനോ തോമസ് നായകനായ എആർഎം ഉൾപ്പെടെയുള്ള ചലച്ചിത്രങ്ങളുടെ തിരക്കഥാകൃത്താണ് നീലേശ്വരം ചിറപ്പുറം സ്വദേശിയായ ഇദ്ദേഹം. സെൻസസ് പ്രക്രിയയെക്കുറിച്ചുള്ള പൊതുജനങ്ങളുടെ ആശങ്കകളും സംശയങ്ങളും പരിഹരിക്കുക എന്ന ലക്ഷ്യത്തോടെയാണ് ഇത്തരമൊരു സംരംഭത്തിന് രൂപം നൽകിയതെന്ന് സുജിത്ത് നമ്പ്യാർ വ്യക്തമാക്കി.
കാഞ്ഞങ്ങാട് നഗരസഭയിലെ അപ്രന്റിസ് ട്രെയ്നിയായ ടി.എം.എ.തഫ്സീറ, മാലിന്യമുക്ത കേരളം പദ്ധതി ജീവനക്കാരി ഉണ്ണിമായ നമ്പ്യാർ എന്നിവരാണ് സംവിധാന സഹായികളായി പ്രവർത്തിച്ചത്. നഗരസഭയിലെ ടൈപ്പിസ്റ്റായ രജിതയാണ് വിഡിയോയിൽ അധ്യാപികയുടെ വേഷം കൈകാര്യം ചെയ്തത്.
എആർഎം, ആൻഡ്രോയിഡ് കുഞ്ഞപ്പൻ എന്നീ സിനിമകളിലൂടെ പ്രേക്ഷകർക്ക് സുപരിചിതയായ മോനാച്ചയിലെ തമ്പായിയമ്മയും മകൻ ദിനേശനും വിഡിയോയിൽ പ്രധാന വേഷങ്ങളിൽ എത്തുന്നു. കാഞ്ഞങ്ങാട് നഗരസഭയിലെ ജീവനക്കാരൻ കൂടിയാണ് ദിനേശൻ.
ഷിജു നൊസ്റ്റാൾജിയ, വിജിൻ അമ്പലത്തറ എന്നിവരാണ് ഛായാഗ്രഹണം നിർവഹിച്ചത്. പൃഥ്വിരാജിനെ നായകനാക്കി ഒരുങ്ങുന്ന പുതിയ ചലച്ചിത്രത്തിന്റെ തിരക്കഥാ രചനയുടെ തിരക്കിലാണ് നിലവിൽ സുജിത്ത് നമ്പ്യാർ.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
