ന്യൂയോർക്കിലെ മെറ്റ്ലൈഫ് സ്റ്റേഡിയത്തിൽ നടന്ന ആവേശകരമായ ലോകകപ്പ് ഫൈനലിൽ സ്പെയിനിനോട് തോൽവി വഴങ്ങിയതോടെ നിലവിലെ ചാമ്പ്യന്മാരായ അർജന്റീനയ്ക്ക് കിരീടം നഷ്ടമായി. എക്സ്ട്രാ ടൈമിന്റെ 106-ാം മിനിറ്റിൽ ബാഴ്സലോണ താരം ഫെറാൻ ടോറസ് നേടിയ ഗോളിലൂടെയാണ് സ്പെയിൻ (1-0) വിജയം സ്വന്തമാക്കിയത്.
ഇതോടെ 2010-ന് ശേഷം സ്പെയിൻ തങ്ങളുടെ രണ്ടാമത്തെ ലോകകപ്പ് കിരീടം സ്വന്തമാക്കി. ലയണൽ മെസ്സിയുടെ കരിയറിലെ അവസാന ലോകകപ്പ് മത്സരം ഇതോടെ കണ്ണീരിലവസാനിച്ചു.
മത്സരത്തിലുടനീളം സ്പെയിൻ സമ്പൂർണ്ണ ആധിപത്യം പുലർത്തി. സ്പാനിഷ് മുന്നേറ്റങ്ങളെ ഫൗളുകളിലൂടെ തടയാനാണ് അർജന്റീന ശ്രമിച്ചത്.
120 മിനിറ്റ് നീണ്ട പോരാട്ടത്തിൽ സ്പെയിൻ ഗോൾപോസ്റ്റിലേക്ക് ഒരൊറ്റ ഷോട്ട് പോലും ഉതിർക്കാൻ അർജന്റീനയ്ക്ക് സാധിച്ചില്ല എന്നത് അവരുടെ പ്രകടനത്തിലെ പോരായ്മകൾ എടുത്തുകാണിക്കുന്നു.
വിജയഗോളടിച്ച ശേഷം ഫെറാൻ ടോറസ് പ്രതികരിച്ചത് ഇങ്ങനെയാണ്: “ഈ ഗോൾ എന്റേതോ അല്ലെങ്കിൽ ടീമിലെ 26 കളിക്കാരുടേതോ മാത്രമല്ല, 4.7 കോടി വരുന്ന സ്പാനിഷ് ജനതയുടേതാണ്. ഫൈനലിൽ മെസിക്കെതിരെ കളിക്കുമ്പോൾ ചെറിയൊരു ഭയമുണ്ടാകുക സ്വാഭാവികമാണ്, എന്നാൽ ഞങ്ങളുടെ ഫുട്ബോളിൽ ഞങ്ങൾക്ക് പൂർണ്ണ വിശ്വാസമുണ്ടായിരുന്നു.” മത്സരത്തിനിടെ സ്പാനിഷ് ഡിഫൻഡർ പോ ക്യൂബാർസിയെ ഫൗൾ ചെയ്തതിന് അർജന്റീന മധ്യനിര താരം എൻസോ ഫെർണാണ്ടസ് ചുവപ്പ് കാർഡ് കണ്ട് പുറത്തായിരുന്നു.
എന്നാൽ, ഫൈനൽ വിസിലിന് ശേഷമുണ്ടായ നാടകീയ രംഗങ്ങളാണ് മൈതാനത്തെ യുദ്ധക്കളമാക്കി മാറ്റിയത്. പരാജയത്തിന്റെ നിരാശയിലായിരുന്ന അർജന്റീന താരങ്ങൾ സ്പാനിഷ് ബെഞ്ചിന് നേരെ തിരിയുകയായിരുന്നു.
ഇതിനിടെ അർജന്റീന താരം ലിയാൻഡ്രോ പാരെഡെസ് സ്പെയിനിന്റെ എറിക് ഗാർസിയ, ഗാവി എന്നിവരെ തള്ളിമാറ്റുകയും ഒരു സ്പാനിഷ് താരത്തിന്റെ കഴുത്തിൽ കുത്തിപ്പിടിക്കുകയും ചെയ്തു. ഇതിനെത്തുടർന്ന് റഫറി പാരെഡെസിന് നേരിട്ട് ചുവപ്പ് കാർഡ് നൽകി.
മൈതാനത്തെ ഈ ബഹളങ്ങൾക്കിടയിൽ പലരും ഈ രണ്ടാമത്തെ ചുവപ്പ് കാർഡ് ശ്രദ്ധിച്ചിരുന്നില്ല. അർജന്റീന കോച്ച് ലയണൽ സ്കലോണി സ്പാനിഷ് നിരയ്ക്ക് നേരെ ആക്രോശിച്ചുകൊണ്ട് പാഞ്ഞടുത്തെങ്കിലും സ്പാനിഷ് താരം അദ്ദേഹത്തെ തടഞ്ഞുനിർത്തി.
തുടർന്ന് അർജന്റീന പ്രതിരോധ താരം നിക്കോളാസ് ഒറ്റാമെൻഡി സ്പാനിഷ് താരം റോഡ്രിയുമായി വാക് പോരിലേർപ്പെടുകയും ചെയ്തു. മത്സരശേഷം നിരാശനായി മൈതാനത്ത് ഇരുന്ന ലയണൽ മെസ്സിയെ സ്പെയിനിന്റെ 19 കാരനായ യുവതാരം ലാമിൻ യമാൽ അരികിലെത്തി ആശ്വസിപ്പിച്ച കാഴ്ച കായികലോകത്തിന്റെ ശ്രദ്ധ നേടി.
യുഎസ് പ്രസിഡന്റ് ഡൊണാൾഡ് ട്രംപ് ഉൾപ്പെടെ 80,663 കാണികളാണ് സ്റ്റേഡിയത്തിൽ ഈ ഫൈനലിന് സാക്ഷ്യം വഹിച്ചത്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
