ജെമിനി ആപ്പിലേക്ക് പരസ്യങ്ങൾ എത്തുന്നു; നിലപാടിൽ മാറ്റവുമായി ഗൂഗിൾ

ഗൂഗിളിന്റെ ജെമിനി (Gemini) ആപ്പിൽ പരസ്യങ്ങൾ ഉൾപ്പെടുത്തുന്നതുമായി ബന്ധപ്പെട്ട മുൻ നിലപാടിൽ നിന്ന് കമ്പനി വ്യതിചലിക്കുന്നു.

ഭാവിയിൽ ജെമിനിയിൽ പരസ്യങ്ങൾ അവതരിപ്പിക്കുന്നതിനുള്ള സാധ്യതകളെക്കുറിച്ച് ഗൂഗിൾ ഔദ്യോഗികമായി സൂചന നൽകി. 2025 ഡിസംബറിൽ, 2026-ൽ ജെമിനിയിൽ പരസ്യങ്ങൾ ഉൾപ്പെടുത്താൻ പദ്ധതിയുണ്ടെന്ന റിപ്പോർട്ടുകൾ പുറത്തുവന്നിരുന്നു.

എന്നാൽ, ഈ റിപ്പോർട്ടുകൾ തെറ്റാണെന്നായിരുന്നു ഗൂഗിളിന്റെ ഗ്ലോബൽ അഡ്വർടൈസിംഗ് വൈസ് പ്രസിഡന്റ് ഡാൻ ടെയ്ലർ അന്ന് പ്രതികരിച്ചത്. എന്നാൽ, നാല് മാസത്തിന് ശേഷം പുറത്തുവന്ന ഗൂഗിളിന്റെ മാതൃകമ്പനിയായ ആൽഫബെറ്റിന്റെ 2026-ലെ ആദ്യ പാദ വരുമാന റിപ്പോർട്ട് ഇതിൽ നിന്ന് വ്യത്യസ്തമായ സൂചനകളാണ് നൽകുന്നത്.

സെർച്ച് എഐ മോഡിൽ പ്രവർത്തിക്കുന്ന പരസ്യ ഫോർമാറ്റുകൾ ജെമിനി ആപ്പിലേക്കും വിജയകരമായി മാറ്റാൻ കഴിയുമെന്ന് ചീഫ് ബിസിനസ് ഓഫീസർ ഫിലിപ്പ് ഷിൻഡ്‌ലർ നിക്ഷേപകരോട് വ്യക്തമാക്കി. പരസ്യങ്ങൾക്ക് “വളരെ മൂല്യവത്തായതും സഹായകരവുമായ വാണിജ്യ വിവരങ്ങൾ” നൽകാൻ കഴിയുമെന്ന് അദ്ദേഹം അഭിപ്രായപ്പെടുകയുണ്ടായി.

ജെമിനി ആപ്പിന്റെ നിലവിലെ ചാറ്റ് ബോക്സ് ഇന്റർഫേസിൽ പരസ്യങ്ങൾ കടന്നുവരുന്നത് ഉപയോക്താക്കളുടെ സ്വകാര്യതയെയും വിശ്വാസത്തെയും ബാധിക്കുമെന്ന ആശങ്ക ശക്തമാണ്. സാധാരണ സെർച്ച് എഞ്ചിനുകളിൽ നിന്ന് വ്യത്യസ്തമായി, വ്യക്തിപരമായ കാര്യങ്ങളും സെൻസിറ്റീവ് വിവരങ്ങളും ഉപയോക്താക്കൾ ജെമിനിയുമായി പങ്കുവെക്കാറുണ്ട്.

പരസ്യങ്ങൾ കൂടി എത്തുന്നതോടെ ഈ സ്വകാര്യതാ ബോധത്തിന് മങ്ങലേൽക്കുമെന്ന് വിദഗ്ധർ ചൂണ്ടിക്കാട്ടുന്നു. കൂടാതെ, ജെമിനി നൽകുന്ന നിർദ്ദേശങ്ങളുടെ വിശ്വാസ്യതയെയും ഇത് ബാധിക്കാൻ സാധ്യതയുണ്ട്.

ലാർജ് ലാംഗ്വേജ് മോഡലുകളുടെ പ്രവർത്തനച്ചെലവ് വർദ്ധിച്ചുവരുന്ന സാഹചര്യത്തിൽ, വരുമാനം കണ്ടെത്തുന്നതിനായി പരസ്യങ്ങളെ ആശ്രയിക്കുകയല്ലാതെ ഗൂഗിളിന് മറ്റ് മാർഗങ്ങളില്ലെന്നാണ് വിപണി നിരീക്ഷകരുടെ വിലയിരുത്തൽ. എതിരാളികളായ കമ്പനികൾ ഇതിനകം തന്നെ ചാറ്റ്ബോട്ട് സേവനങ്ങളിൽ പരസ്യങ്ങൾ പരീക്ഷിച്ച് തുടങ്ങിയിട്ടുണ്ട്.

ഗൂഗിൾ സേവനങ്ങളിൽ പരസ്യങ്ങൾ നൽകുന്നതിനെതിരെ ഉയർന്നുവരുന്ന വിമർശനങ്ങൾ അവഗണിച്ച്, വരുമാനമാർഗമെന്ന നിലയിൽ എഐ ചാറ്റ്ബോട്ടുകളെ കമ്പനി മാറ്റുകയാണ്.