ഗൂഗിളുമായി ചേർന്ന് സാംസങ്; വിപണി കീഴടക്കാൻ പുതിയ ‘ഇന്റലിജന്റ് ഐവെയർ’ വരുന്നു

സ്മാർട്ട് ഗ്ലാസ് വിപണിയിലേക്ക് ചുവടുവെക്കാനൊരുങ്ങി സാംസങ്. ഗൂഗിൾ, പ്രമുഖ ഐവെയർ നിർമ്മാതാക്കളായ വാർബി പാർക്കർ, ജെന്റിൽ മോൺസ്റ്റർ എന്നിവരുമായി സഹകരിച്ചാണ് സാംസങ് തങ്ങളുടെ പുതിയ ‘ഇന്റലിജന്റ് ഐവെയർ’ അവതരിപ്പിക്കുന്നത്.

ഈ വർഷം അവസാനത്തോടെ വിപണിയിലെത്തുമെന്ന് പ്രതീക്ഷിക്കുന്ന ഈ ഉൽപ്പന്നത്തിന്റെ ആദ്യഘട്ട വിവരങ്ങൾ കമ്പനി ഔദ്യോഗികമായി പുറത്തുവിട്ടു.

വാർബി പാർക്കർ, ജെന്റിൽ മോൺസ്റ്റർ എന്നീ ബ്രാൻഡുകളുമായി ചേർന്ന് രണ്ട് വ്യത്യസ്ത ഡിസൈനുകളിലാണ് ഈ ഗ്ലാസുകൾ വികസിപ്പിച്ചിരിക്കുന്നത്. ക്യാമറ, തത്സമയ എഐ ട്രാൻസ്‌ലേഷൻ, ടെക്സ്റ്റ് സംഗ്രഹിക്കാനുള്ള സൗകര്യം, എവിടെനിന്നും ജെമിനിയിലേക്കുള്ള പ്രവേശനം എന്നിവയ്ക്കൊപ്പം ഗാലക്സി ഇക്കോസിസ്റ്റവുമായും ഇവ ബന്ധിപ്പിച്ചിരിക്കുന്നു.

ഗൂഗിൾ നേരത്തെ എംഡബ്ല്യുസി 2026-ൽ അവതരിപ്പിച്ച ഹെഡ്‌സ്-അപ്പ് നാവിഗേഷൻ സംവിധാനവും ഇതിലുണ്ടാകും. എന്നാൽ സ്ക്രീൻ ലെൻസുകളിൽ ഉണ്ടാകില്ലെന്നും, മറിച്ച് ഓഡിയോ അധിഷ്ഠിതമായാണ് ഈ സംവിധാനം പ്രവർത്തിക്കുകയെന്നുമാണ് നിലവിലെ സൂചനകൾ.

ഈ പുതിയ നീക്കത്തെക്കുറിച്ച് സാംസങ് മൊബൈൽ എക്സ്പീരിയൻസ് (MX) ബിസിനസ്സ്, കസ്റ്റമർ എക്സ്പീരിയൻസ് ഓഫീസ് എക്സിക്യൂട്ടീവ് വൈസ് പ്രസിഡന്റും മേധാവിയുമായ ജയ് കിം വ്യക്തമാക്കിയത് ഇങ്ങനെയാണ്: “This intelligent eyewear marks an important step in Samsung’s vision for AI. With this new AI form factor, we are further expanding the Galaxy device ecosystem, where each device is optimized to deliver unique AI experiences that best fit each form.” ഡിസൈനിന്റെ കാര്യത്തിൽ വാർബി പാർക്കറിന്റെ മോഡലുകൾ കട്ടിയുള്ള റിമ്മുകളും കീഹോൾ ബ്രിഡ്ജുമുള്ള ക്ലാസിക് ശൈലിയിലാണ് രൂപകൽപ്പന ചെയ്തിരിക്കുന്നത്.

ജെന്റിൽ മോൺസ്റ്ററിന്റെ മോഡലുകൾ അവരുടെ സിഗ്നേച്ചർ ശൈലിയായ വിശാലമായ ഓവൽ ആകൃതിയിലാണ് ഒരുക്കിയിരിക്കുന്നത്. ഗൂഗിൾ ഐ/ഒ 2026-നോടനുബന്ധിച്ചാണ് സാംസങ് ഇതിന്റെ ആദ്യ വിവരങ്ങൾ പങ്കുവെച്ചത്.

തിരഞ്ഞെടുത്ത വിപണികളിൽ ഈ വർഷം അവസാനത്തോടെ ഉൽപ്പന്നം ലഭ്യമാകുമെന്നാണ് കമ്പനി അറിയിക്കുന്നത്. റേ-ബാൻ മെറ്റാ സ്മാർട്ട് ഗ്ലാസുകൾക്ക് നേരിട്ടുള്ള വെല്ലുവിളിയാകും സാംസങ്ങിന്റെ പുതിയ ഉൽപ്പന്നം.