ഉന്നതപഠനത്തിന് ഫ്രാൻസിലേക്ക് ചേക്കേറുന്ന ഇന്ത്യൻ വിദ്യാർത്ഥികൾ; ഫീസ് വർദ്ധനവ് ആശങ്കയാകുന്നു

കാനഡ, യുണൈറ്റഡ് കിങ്ഡം, യുണൈറ്റഡ് സ്റ്റേറ്റ്സ് തുടങ്ങിയ രാജ്യങ്ങൾ വിസ നിബന്ധനകൾ കർശനമാക്കിയതോടെ, ഇന്ത്യൻ വിദ്യാർത്ഥികൾ തങ്ങളുടെ ഉപരിപഠന ലക്ഷ്യസ്ഥാനമായി ഫ്രാൻസിനെ പരിഗണിച്ചു തുടങ്ങിയിരിക്കുന്നു. വേഗത്തിലുള്ള വിസ ലഭ്യത, ഇംഗ്ലീഷ് മാധ്യമത്തിലുള്ള വിപുലമായ കോഴ്സുകൾ, പഠനശേഷമുള്ള മികച്ച തൊഴിൽ സാധ്യതകൾ എന്നിവയാണ് ഫ്രാൻസിനെ ആകർഷകമാക്കുന്നത്.

എന്നിരുന്നാലും, 2026-27 അധ്യയന വർഷം മുതൽ യൂറോപ്യൻ യൂണിയന് പുറത്തുനിന്നുള്ള വിദ്യാർത്ഥികളുടെ ട്യൂഷൻ ഫീസ് വർദ്ധിപ്പിക്കാനുള്ള ഫ്രഞ്ച് സർക്കാരിന്റെ തീരുമാനം വലിയ ആശങ്കയ്ക്ക് വഴിവെച്ചിട്ടുണ്ട്. വിദേശ രാജ്യങ്ങളിലെ ജീവിതച്ചെലവ് വർദ്ധിച്ചതും രൂപയുടെ മൂല്യത്തകർച്ചയും ഇന്ത്യൻ കുടുംബങ്ങളെ വലിയ സാമ്പത്തിക പ്രതിസന്ധിയിലാക്കുന്നുണ്ട്.

സർവകലാശാലകളുടെ റാങ്കിംഗിനെക്കാൾ ഉപരിയായി, വിസ നിയമങ്ങളിലെ സ്ഥിരതയ്ക്കും തൊഴിൽ സുരക്ഷിതത്വത്തിനുമാണ് നിലവിൽ വിദ്യാർത്ഥികൾ മുൻഗണന നൽകുന്നത്. കാനഡയിലും യുകെയിലും വിസ ചട്ടങ്ങളിൽ എപ്പോൾ വേണമെങ്കിലും മാറ്റങ്ങൾ സംഭവിക്കാം എന്ന അനിശ്ചിതത്വം നിലനിൽക്കുമ്പോൾ, ഫ്രാൻസ് നൽകുന്ന വിസ സുസ്ഥിരത വിദ്യാർത്ഥികളെ ഏറെ ആകർഷിക്കുന്നുണ്ട്.

2030-ഓടെ ഇന്ത്യൻ വിദ്യാർത്ഥികളുടെ എണ്ണം 30,000 ആയി ഉയർത്താനാണ് ഫ്രാൻസ് ലക്ഷ്യമിടുന്നത്. എങ്കിലും, ട്യൂഷൻ ഫീസ് വർദ്ധന മധ്യവർഗ കുടുംബങ്ങൾക്ക് കനത്ത തിരിച്ചടിയാകും.

ഫീസ് കൂടാതെ താമസസൗകര്യം കണ്ടെത്താനുള്ള ബുദ്ധിമുട്ട്, യാത്രാക്കൂലി, നിത്യനിദാന ചെലവുകൾ എന്നിവയും വിദ്യാർത്ഥികൾക്ക് വലിയ സാമ്പത്തിക ഭാരമാണ്. വരാനിരിക്കുന്ന മാറ്റങ്ങളോടെ, ഫ്രാൻസ് ഉയർന്ന സാമ്പത്തികശേഷിയുള്ളവർക്ക് മാത്രമായുള്ള ഒരു ‘പ്രീമിയം’ പഠനകേന്ദ്രമായി മാറുമെന്ന വിലയിരുത്തലുകളും ശക്തമാണ്.

ഈ സാഹചര്യത്തിൽ, ജർമ്മനി, അയർലൻഡ്, കിഴക്കൻ യൂറോപ്യൻ രാജ്യങ്ങൾ തുടങ്ങിയ ബദൽ മാർഗ്ഗങ്ങളിലേക്ക് വിദ്യാർത്ഥികൾ ശ്രദ്ധ കേന്ദ്രീകരിക്കാൻ സാധ്യതയുണ്ട്. ജർമ്മനിയിലെ പബ്ലിക് യൂണിവേഴ്സിറ്റികളിൽ ട്യൂഷൻ ഫീസ് ഇല്ലാത്തതും, അയർലൻഡിലെ ഐടി മേഖലയിലെ തൊഴിലവസരങ്ങളും ഇതിന് കാരണമാണ്.

അതേസമയം, ലക്ഷ്വറി മാനേജ്മെന്റ്, ഹോസ്പിറ്റാലിറ്റി, ബിസിനസ്, സസ്‌റ്റൈനബിലിറ്റി, എയറോസ്പേസ്, ആർട്ടിഫിഷ്യൽ ഇന്റലിജൻസ് എന്നീ മേഖലകളിൽ ഫ്രാൻസ് ഇപ്പോഴും പ്രിയപ്പെട്ട ഇടമായി തുടരുന്നു.

വിദേശപഠനത്തെ ദീർഘകാല നിക്ഷേപമായി കാണുന്ന വിദ്യാർത്ഥികൾക്ക് ഫ്രാൻസിലെ തൊഴിൽ വിപണിയിൽ നിലയുറപ്പിക്കാൻ ഫ്രഞ്ച് ഭാഷാ പരിജ്ഞാനം അത്യന്താപേക്ഷിതമാണെന്ന ബോധ്യവും ഇപ്പോൾ ശക്തമായിട്ടുണ്ട്.