കോക്രോച്ച് ജനതാ പാർട്ടി സ്ഥാപകൻ അഭിജീത് ദിപ്കെയ്ക്ക് എൻഡിഎയിലേക്ക് ക്ഷണം; അഭ്യർത്ഥനയുമായി കേന്ദ്രമന്ത്രി രാംദാസ് അത്തേവാലെ

ദേശീയ തലത്തിൽ പുതിയ രാഷ്ട്രീയ നീക്കങ്ങൾക്ക് കളമൊരുങ്ങുന്നു. കോക്രോച്ച് ജനതാ പാർട്ടി (സി ജെ പി) സ്ഥാപകൻ അഭിജീത് ദിപ്കെയെ എൻ ഡി എ സഖ്യത്തിലേക്ക് ഔദ്യോഗികമായി ക്ഷണിച്ച് കേന്ദ്രമന്ത്രി രാംദാസ് അത്തേവാലെ രംഗത്തെത്തി.

ഭരണപക്ഷമായ എൻഡിഎയുടെ ഭാഗമായ റിപ്പബ്ലിക്കൻ പാർട്ടി ഓഫ് ഇന്ത്യയിലേക്ക് (ആർ പി ഐ – എ) ദിപ്കെയെ അദ്ദേഹം സ്വാഗതം ചെയ്തു. ഡോ.

ബി ആർ അംബേദ്കർ വിഭാവനം ചെയ്ത ലക്ഷ്യങ്ങളും സ്വപ്നങ്ങളും യാഥാർത്ഥ്യമാക്കുന്നതിനായി അഭിജീത് ദിപ്കെ തന്റെ പാർട്ടിയിൽ ലയിക്കണമെന്നാണ് രാംദാസ് അത്തേവാലെയുടെ പ്രധാന ആവശ്യം. ഊർജസ്വലനായ ഒരു യുവനേതാവ് എന്ന നിലയിൽ ദിപ്കെയുടെ സാന്നിധ്യം മുന്നണിക്കും സമൂഹത്തിനും മുതൽക്കൂട്ടാകുമെന്നും അദ്ദേഹം കൂട്ടിച്ചേർത്തു.

തെറ്റുകൾ ചെയ്യുന്നവർ എന്തുതന്നെയായാലും കർശനമായ ശിക്ഷാനടപടികൾ നേരിടേണ്ടിവരുമെന്ന നിലപാടാണ് കേന്ദ്ര സർക്കാർ സ്വീകരിക്കുന്നതെന്ന് രാംദാസ് അത്തേവാലെ വ്യക്തമാക്കി. നീറ്റ് പരീക്ഷാ ചോദ്യപേപ്പർ ചോർച്ചയുമായി ബന്ധപ്പെട്ട് ദില്ലി ജന്തർ മന്തറിൽ വിദ്യാർത്ഥികൾ നടത്തിയ പ്രതിഷേധത്തെയും തുടർന്ന് കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ രാജിവെച്ചതിനെയും പരോക്ഷമായി സൂചിപ്പിച്ചുകൊണ്ടായിരുന്നു മന്ത്രിയുടെ ഈ പ്രസ്താവന.

മന്ത്രിയുടെ ഈ ക്ഷണത്തോട് അഭിജീത് ദിപ്കെ ഇതുവരെ ഔദ്യോഗികമായി പ്രതികരിച്ചിട്ടില്ല. എന്നാൽ, തനിക്ക് തിരഞ്ഞെടുപ്പ് രാഷ്ട്രീയത്തിൽ പ്രവേശിക്കാൻ യാതൊരുവിധ താൽപ്പര്യവുമില്ലെന്ന് അദ്ദേഹം ഇതിനുമുമ്പ് വ്യക്തമാക്കിയിട്ടുള്ളതാണ്.

സി ജെ പിയെ കേവലം ഒരു തിരഞ്ഞെടുപ്പ് രാഷ്ട്രീയ പാർട്ടിയായല്ല, മറിച്ച് ശക്തമായ ഒരു ജനകീയ പ്രസ്ഥാനമായി വളർത്തിക്കൊണ്ടുവരാനാണ് താൻ ആഗ്രഹിക്കുന്നതെന്നും അദ്ദേഹം കൂട്ടിച്ചേർത്തിരുന്നു. പൊതുജനങ്ങൾക്ക് നിലവിലുള്ള രാഷ്ട്രീയ സംവിധാനങ്ങളിലും തിരഞ്ഞെടുപ്പ് പ്രക്രിയയിലും പൂർണ്ണമായും വിശ്വാസം നഷ്ടപ്പെട്ടിരിക്കുന്നതായി മുൻപ് നൽകിയ ഒരു അഭിമുഖത്തിൽ അഭിജീത് ദിപ്കെ ചൂണ്ടിക്കാണിച്ചിരുന്നു.

കേന്ദ്ര അന്വേഷണ ഏജൻസികളെ ദുരുപയോഗം ചെയ്ത് രാഷ്ട്രീയ പാർട്ടികളെ പിളർത്തുന്ന പ്രവണതയും വോട്ടർമാരുടെ പേരുകൾ കൃത്രിമായി പട്ടികയിൽ നിന്ന് ഒഴിവാക്കുന്ന സാഹചര്യവും നിലനിൽക്കെ, മറ്റൊരു രാഷ്ട്രീയ പാർട്ടി കൂടി രൂപീകരിക്കുന്നതുകൊണ്ട് യാതൊരു പ്രയോജനവുമില്ലെന്നും രാജ്യത്തിന് ഇന്ന് അടിയന്തിരമായി ആവശ്യമുള്ളത് ശക്തമായ ഒരു പൊതുജന പ്രസ്ഥാനമാണെന്നും അദ്ദേഹം വ്യക്തമാക്കിയിരുന്നു.