സംസ്ഥാന സർക്കാർ നടപ്പിലാക്കുന്ന പ്രിയദർശിനി സൗജന്യ ബസ് യാത്രാ പദ്ധതിക്ക് തൃശൂർ ജില്ലയിൽ വിപുലമായ തുടക്കം. കെഎസ്ആർടിസി ഓർഡിനറി ബസുകളിൽ സ്ത്രീകൾക്ക് സൗജന്യ യാത്ര അനുവദിക്കുന്ന പദ്ധതി, തിരുവനന്തപുരത്ത് മുഖ്യമന്ത്രി വി.ഡി.
സതീശൻ ഉദ്ഘാടനം ചെയ്തതിനു പിന്നാലെയാണ് സംസ്ഥാനവ്യാപകമായി പ്രാബല്യത്തിൽ വന്നത്. പദ്ധതിയുടെ ഭാഗമായി ബസുകളിലെ ടിക്കറ്റിങ് യന്ത്രങ്ങളിൽ ‘സീറോ ടിക്കറ്റ്’ സംവിധാനം സജ്ജമാക്കിയിട്ടുണ്ട്.
ജില്ലയിലെ വിവിധ ഡിപ്പോകളിലും ബസ് സ്റ്റാൻഡുകളിലും കോൺഗ്രസ്, മഹിളാ കോൺഗ്രസ് പ്രവർത്തകരുടെ നേതൃത്വത്തിൽ ആഘോഷപൂർവമായ സ്വീകരണ പരിപാടികൾ സംഘടിപ്പിച്ചു. ബസുകൾ ത്രിവർണ ബലൂണുകളും പൂക്കളും ഉപയോഗിച്ച് അലങ്കരിച്ചിരുന്നു.
‘പ്രിയദർശിനി: സ്ത്രീ സൗജന്യ യാത്ര’ എന്നെഴുതിയ സ്റ്റിക്കറുകൾ ബസുകളിൽ പതിച്ചിട്ടുണ്ട്. തൃശൂർ കെഎസ്ആർടിസി ഡിപ്പോയിൽ നടന്ന ചടങ്ങിൽ മന്ത്രി രമേശ് ചെന്നിത്തല പദ്ധതി ഫ്ലാഗ് ഓഫ് ചെയ്തു.
“കേരള ചരിത്രത്തിലെ സുവർണ നിമിഷമാണിത്. കെഎസ്ആർടിസി നേരിടുന്ന സാമ്പത്തിക ബാധ്യതകൾക്കിടയിലും സ്ത്രീ ശക്തിക്കുള്ള അംഗീകാരമാണ് ഈ പദ്ധതി,” എന്ന് അദ്ദേഹം അഭിപ്രായപ്പെട്ടു.
ഉദ്ഘാടനത്തിന് ശേഷം പാലക്കാട്–തൃശൂർ ബസിൽ തേക്കിൻകാട് മൈതാനം വരെ മന്ത്രി യാത്ര ചെയ്തു. ബസിലുണ്ടായിരുന്ന 30 പുരുഷ യാത്രക്കാരുടെ ടിക്കറ്റ് തുക വനിതാ കണ്ടക്ടർ എ.എസ്.
ശൈലയ്ക്ക് മന്ത്രി നൽകി. എംഎൽഎ രാജൻ ജെ.പല്ലൻ, ഡെപ്യൂട്ടി മേയർ എ.പ്രസാദ്, ഡിടിഒ ടി.എ.
ഉബൈദ്, ഡിസിസി പ്രസിഡന്റ് ജോസഫ് ടാജറ്റ്, ഐഎൻടിയുസി ജില്ലാ പ്രസിഡന്റ് സുന്ദരൻ കുന്നത്തുള്ളി എന്നിവർ സന്നിഹിതരായിരുന്നു. മാള ഡിപ്പോയിലെ ഉദ്ഘാടനം മന്ത്രി ഒ.ജെ.ജനീഷ് നിർവഹിച്ചു.
പദ്ധതിയെക്കുറിച്ച് കേന്ദ്രമന്ത്രി സുരേഷ് ഗോപി നിർണായക അഭിപ്രായം പങ്കുവെച്ചു. “സാമ്പത്തിക ശേഷിയുള്ള സ്ത്രീകൾ ആനുകൂല്യം സ്വമേധയാ വേണ്ടെന്നു വയ്ക്കണം.
സാമ്പത്തികമായി മെച്ചപ്പെട്ട നിലയിലുള്ള സ്ത്രീകൾ ടിക്കറ്റെടുത്ത് യാത്ര ചെയ്യാൻ തയാറാകണം.
അർഹരായവർക്കു മാത്രം സൗജന്യ യാത്രയുടെ ആനുകൂല്യം ലഭ്യമാകുന്ന സാഹചര്യം സൃഷ്ടിക്കണം,” എന്ന് അദ്ദേഹം പറഞ്ഞു. പ്രധാനമന്ത്രി നരേന്ദ്ര മോദി നടപ്പാക്കിയ പാചകവാതക സബ്സിഡി ഉപേക്ഷിക്കാനുള്ള ‘ഗിവ് അപ്’ പദ്ധതിയെ അദ്ദേഹം ഉദാഹരണമായി ചൂണ്ടിക്കാട്ടി.
പദ്ധതിയുടെ പ്രത്യേകതകൾ:
യാത്ര സൗജന്യമാണെങ്കിലും സ്ത്രീകൾ കണ്ടക്ടറിൽ നിന്ന് സീറോ ടിക്കറ്റ് നിർബന്ധമായും കൈപ്പറ്റണം. തിരിച്ചറിയൽ രേഖകളോ പാസുകളോ ആവശ്യമില്ല.
ട്രാൻസ്ജെൻഡേഴ്സിനും ഈ ആനുകൂല്യം ലഭ്യമാണ്. ഇതര സംസ്ഥാനങ്ങളിൽ നിന്നുള്ള സ്ത്രീകൾക്കും സൗജന്യയാത്ര അനുവദിക്കും.
എന്നാൽ ടിക്കറ്റ് എടുക്കാതെ യാത്ര ചെയ്യുന്ന പക്ഷം 500 രൂപ പിഴ ഈടാക്കുമെന്ന് അധികൃതർ അറിയിച്ചു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
