തൃണമൂൽ കോൺഗ്രസ് വിമത എംപിമാരുടെ നീക്കം: എൻസിപിഐ എന്ന അപ്രസക്ത പാർട്ടിയിലേക്ക് ചേക്കേറാൻ തീരുമാനം

തൃണമൂൽ കോൺഗ്രസ് നേതൃത്വവുമായി ഇടഞ്ഞുനിൽക്കുന്ന 20 എംപിമാർ പുതിയ രാഷ്ട്രീയ താവളം തേടുന്നു. പശ്ചിമ ബംഗാൾ കേന്ദ്രമായി പ്രവർത്തിക്കുന്ന നാഷണലിസ്റ്റ് സിറ്റിസൺസ് പാർട്ടി ഓഫ് ഇന്ത്യ (എൻസിപിഐ) എന്ന രാഷ്ട്രീയ പാർട്ടിയെയാണ് ഇവർ ലയനത്തിനായി തെരഞ്ഞെടുത്തിരിക്കുന്നത്.

എന്നാൽ, തെരഞ്ഞെടുപ്പ് രാഷ്ട്രീയത്തിൽ കാര്യമായ സ്വാധീനമോ അടിത്തറയോ ഇല്ലാത്ത ഈ പാർട്ടിയിലേക്ക് മുതിർന്ന ജനപ്രതിനിധികൾ ചേക്കേറുന്നത് രാഷ്ട്രീയ കേന്ദ്രങ്ങളിൽ കൗതുകമുണർത്തുന്നു. രജിസ്ട്രേഷനും പശ്ചാത്തലവും
2023 ഫെബ്രുവരി 20-നാണ് എൻസിപിഐ തെരഞ്ഞെടുപ്പ് കമ്മീഷനിൽ ‘രജിസ്റ്റേർഡ് അൺറെക്കഗ്നൈസ്ഡ് പൊളിറ്റിക്കൽ പാർട്ടി’യായി അംഗീകാരം നേടിയത്.

ബംഗാളിലെ ഹൗറ ജില്ലയിലെ ബനിപൂരിലാണ് പാർട്ടിയുടെ രജിസ്റ്റേർഡ് വിലാസം. തെരഞ്ഞെടുപ്പ് കമ്മീഷന്റെ ഔദ്യോഗിക രേഖകൾ പ്രകാരം, പാർട്ടിയുടെ ആകെ സംഭാവനയായി രേഖപ്പെടുത്തിയിരിക്കുന്നത് 1.13 ലക്ഷം രൂപ മാത്രമാണ്.

ഉട്ടിയ കുണ്ടു പ്രസിഡന്റായ പാർട്ടിയിൽ അദ്ദേഹത്തിന്റെ ഭാര്യ ഷൗളി കുണ്ടു ആണ് ട്രഷറർ സ്ഥാനം വഹിക്കുന്നത്. ഷൗളി കുണ്ടു തന്നെയാണ് ഇതേ വിലാസത്തിൽ പ്രവർത്തിക്കുന്ന ബിശ്വബസാർ പ്രൈവറ്റ് ലിമിറ്റഡ്, പശ്ചിം ബംഗ അസംഘടിത മഹിള കർമ അസോസിയേഷൻ എന്നീ സംഘടനകളുടെയും ഡയറക്ടർ.

ഉട്ടിയ കുണ്ടു സോഷ്യൽ മീഡിയയിൽ പങ്കുവെച്ച ചിത്രങ്ങളിൽ പശ്ചിമ ബംഗാൾ മുഖ്യമന്ത്രി സുവേന്ദു അധികാരിക്കൊപ്പമുള്ള അദ്ദേഹത്തിന്റെ സാന്നിധ്യം ശ്രദ്ധേയമാണ്. ത്രിപുരയിലെ പ്രകടനം
രജിസ്റ്റർ ചെയ്തതിന് തൊട്ടുപിന്നാലെ 2023-ലെ ത്രിപുര നിയമസഭാ തെരഞ്ഞെടുപ്പിൽ എൻസിപിഐ മത്സരിച്ചിരുന്നു.

ഏഴ് സീറ്റുകളിൽ മത്സരിക്കാൻ നാമനിർദേശപത്രിക നൽകിയെങ്കിലും നാലെണ്ണം തള്ളപ്പെട്ടു. മത്സരരംഗത്തുണ്ടായിരുന്ന രണ്ട് സ്ഥാനാർത്ഥികൾക്ക് ആകെ ലഭിച്ചത് 822 വോട്ടുകൾ മാത്രം.

സ്വതന്ത്ര സ്ഥാനാർത്ഥികളുടെ വോട്ടുകൾ കൂടി കണക്കാക്കിയാൽ പാർട്ടിയുടെ ആകെ വോട്ടുവിഹിതം 1,198 ആയി ചുരുങ്ങി. തെരഞ്ഞെടുപ്പിന് ശേഷം പാർട്ടി നേതൃത്വവുമായി ബന്ധപ്പെടാൻ സാധിച്ചിട്ടില്ലെന്നും ഓഫീസ് പ്രവർത്തനം നിർത്തിയെന്നും അന്ന് മത്സരിച്ച സ്ഥാനാർത്ഥികൾ വെളിപ്പെടുത്തിയിരുന്നതായി ദേശീയ മാധ്യമമായ എൻഡിടിവി റിപ്പോർട്ട് ചെയ്തിരുന്നു.

നിലവിൽ ത്രിപുരയിൽ പാർട്ടിക്ക് സംസ്ഥാന പ്രസിഡന്റ് പോലുമില്ലാത്ത അവസ്ഥയാണുള്ളത്. ലയനവും തുടർനടപടികളും
ബംഗാളിലെ തദ്ദേശ തെരഞ്ഞെടുപ്പിലോ ഈ വർഷം നടന്ന നിയമസഭാ തെരഞ്ഞെടുപ്പിലോ എൻസിപിഐ ഒരു സ്വാധീനവും ചെലുത്തിയിട്ടില്ല.

ഇത്തരമൊരു രാഷ്ട്രീയ പാർട്ടിയുടെ പതാകയ്ക്ക് താഴേക്ക് തൃണമൂൽ കോൺഗ്രസിലെ മൂന്നിൽ രണ്ട് എംപിമാർ മാറുന്നത് അപ്രതീക്ഷിതമാണ്. ലയന നടപടികളുടെ ഭാഗമായി എംപിമാർ ലോക്സഭാ സ്പീക്കർ ഓം ബിർലയെ നേരിൽ കണ്ട് ചർച്ച നടത്തിയിട്ടുണ്ട്.

പാർലമെന്റിൽ തങ്ങൾക്കായി പ്രത്യേക ഇരിപ്പിടങ്ങൾ അനുവദിക്കണമെന്നും ഇവർ ആവശ്യപ്പെട്ടിട്ടുണ്ട്.