ഐപിഎൽ സീസണിന് മുന്നോടിയായി താരക്കൈമാറ്റവുമായി സൺറൈസേഴ്‌സും ഡൽഹിയും

ഇന്ത്യൻ പ്രീമിയർ ലീഗിന്‍റെ (ഐപിഎൽ) പുതിയ സീസണിന് മുന്നോടിയായി പ്രധാനപ്പെട്ട താരക്കൈമാറ്റവുമായി സൺറൈസേഴ്‌സ് ഹൈദരാബാദും ഡൽഹി ക്യാപിറ്റൽസും രംഗത്ത്.

ഇടങ്കയ്യൻ പേസർ ടി. നടരാജൻ തന്‍റെ പഴയ തട്ടകമായ സൺറൈസേഴ്‌സ് ഹൈദരാബാദിലേക്ക് തിരിച്ചെത്തിയപ്പോൾ, ലെഗ് സ്പിന്നർ ഷീഷാൻ അൻസാരി സൺറൈസേഴ്സിൽ നിന്ന് ഡൽഹി ക്യാപിറ്റൽസിലേക്ക് ചേക്കേറി.

2025 ലെ ലേലത്തിൽ 10.75 കോടി രൂപയ്ക്കാണ് ഡൽഹി ക്യാപിറ്റൽസ് നടരാജനെ സ്വന്തമാക്കിയിരുന്നത്. എന്നാൽ നിലവിൽ 5 കോടി രൂപയുടെ പുതുക്കിയ പ്രതിഫലത്തിലാണ് നടരാജൻ 2016-ലെ ചാമ്പ്യന്മാരായ ഹൈദരാബാദിലേക്ക് മടങ്ങിയെത്തുന്നത്.

ഐപിഎൽ 2026 സീസണിൽ ഹൈദരാബാദിനായി 10 മത്സരങ്ങളിൽ പന്തെറിഞ്ഞ 26-കാരനായ സീഷാൻ അൻസാരി, തന്‍റെ നിലവിലെ പ്രതിഫലമായ 40 ലക്ഷം രൂപയ്ക്ക് ഡൽഹി ക്യാപിറ്റൽസിൽ ചേരും. ഡെത്ത് ഓവറുകളിലെ അനുഭവസമ്പത്തുള്ള ഒരു ഇന്ത്യൻ പേസറെ തിരികെയെത്തിച്ച് ബൗളിങ് നിര ശക്തമാക്കാൻ ഹൈദരാബാദിനും, സ്പിൻ നിരയിലെ വൈവിധ്യം കൂട്ടാൻ ഡൽഹിക്കും ഈ താരക്കൈമാറ്റം മുതൽക്കൂട്ടാകും.

2020 മുതൽ 2024 വരെയുള്ള അഞ്ച് സീസണുകളിൽ സൺറൈസേഴ്‌സ് നിരയിലെ അവിഭാജ്യ ഘടകമായിരുന്നു ടി. നടരാജൻ.

കൃത്യതയാർന്ന യോർക്കറുകളിലൂടെ ഡെത്ത് ഓവറുകളിൽ ഹൈദരാബാദിന്‍റെ വിശ്വസ്ത ബൗളറായി മാറാൻ നടരാജന് സാധിച്ചിരുന്നു. 2024 സീസണിൽ 19 വിക്കറ്റുകൾ വീഴ്ത്തി ഹൈദരാബാദിനെ ഫൈനലിൽ എത്തിക്കുന്നതിൽ താരം നിർണായക പങ്ക് വഹിച്ചിരുന്നു.

ഇന്ത്യക്കായി ഒരു ടെസ്റ്റിലും രണ്ട് ഏകദിനങ്ങളിലും കളിച്ചിട്ടുള്ള നടരാജൻ, 73 ഐപിഎൽ മത്സരങ്ങളിൽ നിന്ന് 72 വിക്കറ്റുകൾ നേടിയിട്ടുണ്ട്. അതേസമയം, ഡൽഹിക്കെതിരെയുള്ള അരങ്ങേറ്റ മത്സരത്തിൽ തന്നെ 3 വിക്കറ്റുകൾ വീഴ്ത്തി ഐപിഎല്ലിൽ ശ്രദ്ധേയമായ തുടക്കം കുറിച്ച താരമാണ് ഷീഷാൻ അൻസാരി.

മൊത്തം 10 മത്സരങ്ങളിൽ നിന്ന് 6 വിക്കറ്റുകൾ താരം സ്വന്തമാക്കിയിട്ടുണ്ട്. കുൽദീപ് യാദവ് ലക്നൗ സൂപ്പർ ജയൻ്റ്സിലേക്ക് മാറിയ സാഹചര്യത്തിൽ ഡൽഹിയുടെ സ്പിൻ നിരയ്ക്ക് പുതിയ കരുത്തേകാൻ അൻസാരിയുടെ വരവ് സഹായിക്കും.