അർജന്റീന ഫുട്ബോൾ ടീമിനെ കേരളത്തിലെത്തിക്കുന്നതുമായി ബന്ധപ്പെട്ട് കൂടുതൽ ചട്ടലംഘനങ്ങൾ പുറത്തുവന്നു. ഔദ്യോഗിക അനുമതി ലഭിക്കുന്നതിന് മുൻപ് സ്പോൺസർ കമ്പനി അർജന്റീന ഫുട്ബോൾ അസോസിയേഷനുമായി (എഎഫ്എ) കരാർ ഒപ്പിട്ടതായും, ഇതിൽ സർക്കാരിന്റെ വിവരങ്ങൾ അനധികൃതമായി ഉപയോഗിച്ചതായും വ്യക്തമായിട്ടുണ്ട്.
തിരുവനന്തപുരം കേന്ദ്രീകരിച്ചാണ് ഈ വിവാദങ്ങൾ ശക്തമായിരിക്കുന്നത്. കരാർ പ്രകാരം പണം കൈമാറുന്നതിൽ കാലതാമസം നേരിട്ടതിനെ തുടർന്ന്, സ്പോൺസറുമായുള്ള കരാർ രണ്ടുതവണ എഎഫ്എ റദ്ദാക്കിയിരുന്നതായും രേഖകൾ വ്യക്തമാക്കുന്നു.
2024 ഡിസംബർ 20നാണ് എഎഫ്എയുമായി സ്പോൺസർ കരാറിലെത്തിയത്. എന്നാൽ ഇതിനുള്ള സർക്കാർ അനുമതി നേടിയെടുത്തത് 18 ദിവസത്തിനുശേഷം മാത്രമാണെന്ന വിവരം ഇതിനകം പുറത്തുവന്നിട്ടുണ്ട്.
ഈ വിഷയം സർക്കാരിനെ മുൻകൂട്ടി അറിയിച്ചിരുന്നില്ല. അർജന്റീന സന്ദർശനവുമായി ബന്ധപ്പെട്ട് സ്പോൺസറും സംസ്ഥാന സർക്കാരും തമ്മിൽ ഇതുവരെ കരാറോ ധാരണാപത്രമോ ഒപ്പുവച്ചിട്ടില്ലെന്നാണ് കായികവകുപ്പിന്റെ കണ്ടെത്തൽ.
സംസ്ഥാന സർക്കാരിന്റെ സഹകരണത്തോടെയുള്ള പദ്ധതി എന്ന അവകാശവാദത്തോടെയാണ് സ്പോൺസർ എഎഫ്എയുമായി കരാർ ഒപ്പിട്ടിരിക്കുന്നത്. ഈ രേഖകൾ കായികവകുപ്പിൽനിന്ന് മറച്ചുവെച്ച സ്പോൺസർ, പിന്നീട് രണ്ടുതവണ കരാർ പുതുക്കിയപ്പോഴും ഇക്കാര്യം സർക്കാരിനെ രേഖാമൂലം അറിയിച്ചില്ല.
അനുമതിയില്ലാതെ സ്വകാര്യ സ്ഥാപനം സർക്കാരിനെ പ്രതിനിധീകരിച്ച് കരാറിൽ ഒപ്പുവെച്ചതും വലിയ വിവാദമായിട്ടുണ്ട്. കരാറിൽ മുൻ കായികമന്ത്രി വി.
അബ്ദുറഹിമാന്റെ ഔദ്യോഗിക ഇമെയിൽ വിലാസം ഉൾപ്പെടുത്തിയത് ദുരൂഹത വർദ്ധിപ്പിക്കുന്നുണ്ട്. ആശയവിനിമയങ്ങൾക്കായി സ്പോൺസർ കൈമാറിയ രണ്ട് വിലാസങ്ങളിൽ ഒന്നാണിത്.
കരാറിൽ സാക്ഷിയായത് അന്നത്തെ കേരള സ്പോർട്സ് കൗൺസിൽ പ്രസിഡന്റ് യു. ഷറഫലിയാണ്.
റിപ്പോർട്ടർ ബ്രോഡ്കാസ്റ്റിംഗ് കമ്പനി എംഡി ആന്റോ അഗസ്റ്റിന് പുറമെ കേരളത്തിൽനിന്ന് കരാറിൽ ഒപ്പുവെച്ചത് യു. ഷറഫലി മാത്രമാണ്.
ഷറഫലിയെ ഇതിനായി ചുമതലപ്പെടുത്തിയത് ആരെant എന്ന ചോദ്യവും ഉയരുന്നുണ്ട്. അർജന്റീന ടീമിന് കായിക വകുപ്പ് സുരക്ഷ ഒരുക്കുമെന്നും കരാറിൽ അവകാശപ്പെടുന്നുണ്ട്.
ഔദ്യോഗിക അനുമതി ലഭിക്കുന്നതിന് മുൻപ് ഈ ഉറപ്പ് ആരുനൽകി എന്നതിലും വ്യക്തതയില്ല. അതേസമയം, കരാർ പ്രകാരമുള്ള പണം അടയ്ക്കാൻ വൈകിയതിന് സ്പോൺസർ കമ്പനിക്ക് എഎഫ്എ 40 ലക്ഷം യുഎസ് ഡോളർ പിഴ ചുമത്തിയിരുന്നു.
ഈ പിഴ ഒഴിവാക്കി നൽകാൻ ഇടപെടണമെന്നാവശ്യപ്പെട്ട് അർജന്റീനയിലെ ഇന്ത്യൻ അംബാസഡർക്ക് കഴിഞ്ഞവർഷം ജൂലൈയിൽ കായികവകുപ്പ് അയച്ച കത്ത് പുറത്തുവന്നു. മുൻ കായികമന്ത്രി വി.
അബ്ദുറഹിമാന്റെ നിർദേശപ്രകാരം അന്നത്തെ സെക്രട്ടറി എ.പി.എം. മുഹമ്മദ് ഹനീഷ് ആണ് ഈ കത്തെഴുതിയത്.
സംസ്ഥാനത്തിന്റെ സാമ്പത്തിക താൽപര്യങ്ങൾ സംരക്ഷിക്കണമെന്നാവശ്യപ്പെടുന്ന കത്തിൽ, അർജന്റീന ടീമിന്റെ സന്ദർശനം സംസ്ഥാന സർക്കാർ ഉൾപ്പെട്ടിട്ടുള്ള കരാറാണെന്നും പരാമർശിച്ചിട്ടുണ്ട്. സർക്കാർ ആരുമായും കരാർ ഒപ്പുവെച്ചിട്ടില്ലെന്ന മുൻ മന്ത്രിയുടെ വാദം പൂർണ്ണമായും തള്ളുന്നതാണ് ഈ കത്തിടപാടുകൾ.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
