ബംഗ്ലാദേശിൽ ദിവസങ്ങളായി തുടരുന്ന അതിശക്തമായ കാലവർഷം രാജ്യത്തിന്റെ തെക്കുകിഴക്കൻ മേഖലകളിൽ കനത്ത നാശനഷ്ടങ്ങൾ വിതയ്ക്കുന്നു. തുടർച്ചയായി പെയ്യുന്ന മഴയെത്തുടർന്നുണ്ടായ പ്രളയത്തിലും ഉരുൾപൊട്ടലിലും പെട്ട് പ്രായപൂർത്തിയാകാത്തവരടക്കം 44 പേർ ഇതിനോടകം മരണപ്പെട്ടതായി ഔദ്യോഗിക കണക്കുകൾ വ്യക്തമാക്കുന്നു.
പത്ത് ലക്ഷത്തിലധികം ജനങ്ങൾ പ്രളയക്കെടുതിയിൽ അകപ്പെട്ട് ദുരിതമനുഭവിക്കുകയാണ്. ദുരന്തസാഹചര്യം നേരിടാൻ സർക്കാർ തലത്തിൽ നടപടികൾ ഊർജ്ജിതമാക്കിയിട്ടുണ്ട്.
രക്ഷാപ്രവർത്തനവും ദുരിതാശ്വാസ വിതരണവും വേഗത്തിലാക്കിയതായി ബംഗ്ലാദേശ് ദുരന്ത നിവാരണ മന്ത്രാലയം അറിയിച്ചു. ചറ്റോഗ്രാം, കോക്സ് ബസാർ, ബന്ദർബൻ, രംഗമതി, ഖഗ്രാച്ചാരി, മൗലവിബസാർ, ഹബിഗഞ്ച് എന്നീ ഏഴ് ജില്ലകളിലാണ് സ്ഥിതി അതീവ ഗുരുതരമായി തുടരുന്നത്.
ഏകദേശം 2,67,918 കുടുംബങ്ങൾ പൂർണ്ണമായും ഒറ്റപ്പെട്ട അവസ്ഥയിലാണ്.
ഗതാഗത മാർഗങ്ങൾ തകർന്നതും പാലങ്ങൾ ഒലിച്ചുപോയതും വൈദ്യുതി-ആശയവിനിമയ സംവിധാനങ്ങൾ താറുമാറായതും രക്ഷാപ്രവർത്തനങ്ങൾക്ക് വലിയ വെല്ലുവിളിയാണ് ഉയർത്തുന്നത്. വെള്ളപ്പൊക്കം മൂലം വീടുകളിൽ കുടുങ്ങിയവർക്ക് ഭക്ഷണം പാകം ചെയ്യാൻ കഴിയാത്ത സാഹചര്യമാണ്.
അവൽ, മലർ, ബിസ്കറ്റ് തുടങ്ങിയ ഉണങ്ങിയ ഭക്ഷണസാധനങ്ങളെയാണ് നിലവിൽ ജനങ്ങൾ ആശ്രയിക്കുന്നത്. ദുരിതബാധിതർക്ക് ആവശ്യമായ മരുന്നുകളും കുടിവെള്ളവും ഭക്ഷ്യവസ്തുക്കളും എത്തിക്കാൻ ബംഗ്ലാദേശ് സൈന്യവും നാവികസേനയും ബോട്ടുകൾ ഉപയോഗിച്ചുള്ള പ്രവർത്തനങ്ങൾ ശക്തമാക്കിയിട്ടുണ്ട്.
അതേസമയം, കോക്സ് ബസാറിലെ രോഹിങ്ക്യൻ അഭയാർത്ഥി ക്യാമ്പുകളിൽ ഉണ്ടായ ഉരുൾപൊട്ടലിൽ സ്ത്രീകളും കുട്ടികളുമടക്കം 16 പേർക്ക് ജീവൻ നഷ്ടമായി. വനനശീകരണം മൂലം ബലഹീനമായ കുന്നിൻചരിവുകളിൽ താൽക്കാലിക ഷെൽട്ടറുകളിൽ കഴിയുന്ന പത്ത് ലക്ഷത്തിലധികം രോഹിങ്ക്യൻ അഭയാർത്ഥികൾ കടുത്ത സുരക്ഷാ ഭീഷണിയിലാണ്.
ആഗോള കാലാവസ്ഥാ വ്യതിയാനത്തിന്റെ പശ്ചാത്തലത്തിൽ ഇത്തരം പ്രകൃതിദുരന്തങ്ങളുടെ തീവ്രതയും ആവൃത്തിയും വർദ്ധിച്ചുവരികയാണെന്ന് ശാസ്ത്രജ്ഞർ മുന്നറിയിപ്പ് നൽകുന്നു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
