പശ്ചിമേഷ്യയിൽ യുദ്ധഭീതി; ക്രൂഡ് ഓയിൽ വില കുതിക്കുന്നു, സ്വർണവിലയിൽ കനത്ത ഇടിവ്

സമാധാനം പുനഃസ്ഥാപിക്കുമെന്ന് പ്രതീക്ഷിച്ചിരുന്ന പശ്ചിമേഷ്യ വീണ്ടും സംഘർഷത്തിലേക്ക്. ഹോർമുസ് കടലിടുക്കിന് സമീപം യുഎസ് സൈന്യത്തിന്റെ അപ്പാച്ചെ ഹെലികോപ്റ്റർ ഇറാൻ വെടിവച്ചിട്ടതോടെ മേഖലയിൽ യുദ്ധസമാന സാഹചര്യം ഉടലെടുത്തു.

ഈ നടപടിയിൽ കടുത്ത അതൃപ്തി രേഖപ്പെടുത്തിയ യുഎസ് പ്രസിഡന്റ് ഡോണൾഡ് ട്രംപ് തിരിച്ചടി ഉറപ്പിച്ചു. പിന്നാലെ, ഇറാനിലെ വിവിധ കേന്ദ്രങ്ങളിൽ യുഎസ് സേന വ്യോമാക്രമണം നടത്തി.

ഇറാൻ പ്രതിരോധ കേന്ദ്രങ്ങളിൽ വൻ സ്ഫോടനങ്ങൾ ഉണ്ടായതായി റിപ്പോർട്ടുകൾ വ്യക്തമാക്കുന്നു. പ്രത്യാക്രമണമായി ബഹ്‌റൈനിലെ യുഎസ് നാവിക കപ്പലിന് നേരെയും ഇറാൻ ആക്രമണം നടത്തിയിട്ടുണ്ട്.

തങ്ങളുടെ ഭാഗത്തുനിന്നുണ്ടായ ആക്രമണം മനഃപൂർവമല്ലെന്ന് ഇറാൻ അവകാശപ്പെടുന്നുണ്ടെങ്കിലും, യുഎസിന്റെ ഭാഗത്തുനിന്ന് പ്രകോപനം തുടർന്നാൽ ശക്തമായി തിരിച്ചടിക്കുമെന്ന മുന്നറിയിപ്പും അവർ നൽകിയിട്ടുണ്ട്. പശ്ചിമേഷ്യൻ പ്രതിസന്ധി പരിഹരിക്കപ്പെടുമെന്നും സമാധാന ചർച്ചകൾ ഉടൻ ആരംഭിക്കുമെന്നും കരുതിയെങ്കിലും, സാഹചര്യങ്ങൾ അതിവേഗം വഷളാവുകയായിരുന്നു.

ക്രൂഡ് ഓയിൽ വിപണിയിൽ പ്രത്യാഘാതം
സംഘർഷം കടുത്തതോടെ ആഗോള വിപണിയിൽ ക്രൂഡ് ഓയിൽ വിലയിൽ വർധനവ് രേഖപ്പെടുത്തി. ബാരലിന് 87 ഡോളർ നിലവാരത്തിലായിരുന്ന യുഎസ് ക്രൂഡ് വില 1.21 ശതമാനം ഉയർന്ന് 89.27 ഡോളറിലെത്തി.

ബ്രെന്റ് ക്രൂഡ് വില 1.26 ശതമാനം വർധിച്ച് 92.60 ഡോളറിലുമെത്തി. സ്വർണവിലയിൽ ഇടിവ്
യുഎസ് ഡോളർ സൂചിക 100-ലേക്ക് ഉയർന്നതും പണപ്പെരുപ്പം സംബന്ധിച്ച ആശങ്കകളും സ്വർണവിപണിക്ക് തിരിച്ചടിയായി.

രാജ്യാന്തര വിപണിയിൽ സ്വർണവില ഔൺസിന് 158.54 ഡോളർ കുറഞ്ഞ് 4181.02 ഡോളറിലെത്തി. ഇതിന്റെ പ്രതിഫലനം കേരളത്തിലെ സ്വർണവിപണിയിലും പ്രകടമാകുമെന്ന് സാമ്പത്തിക വിദഗ്ധർ വിലയിരുത്തുന്നു.

ഓഹരി വിപണിയിലെ തളർച്ച
ഏഷ്യൻ വിപണികളിലും യുദ്ധഭീതിയുടെ നിഴലുണ്ട്. ദക്ഷിണ കൊറിയയുടെ കോസ്പി സൂചിക 2 ശതമാനം ഇടിഞ്ഞു.

ജപ്പാനിലെ നിക്കേയ് 0.71 ശതമാനവും നഷ്ടം രേഖപ്പെടുത്തി. ഹോങ്കോങ്, ചൈനീസ് ഓഹരി വിപണികളിലും സമാനമായ മാന്ദ്യം പ്രകടമാണ്.

ഇന്ത്യൻ വിപണിയിലും ജാഗ്രത തുടരുകയാണ്. ആഗോള പണപ്പെരുപ്പം
ചൈനയുടെ മൊത്തവില പണപ്പെരുപ്പം നാല് വർഷത്തെ ഉയർന്ന നിരക്കായ 3.9 ശതമാനത്തിലെത്തി.

യുഎസിലെ പണപ്പെരുപ്പ കണക്കുകൾ ഇന്ന് പുറത്തുവരാനിരിക്കെ, ഫെഡറൽ റിസർവ് പലിശ നിരക്കുകളിൽ മാറ്റം വരുത്തുമോ എന്ന ആശങ്കയും വിപണിയെ സ്വാധീനിക്കുന്നുണ്ട്. 4.2 ശതമാനത്തിൽ പണപ്പെരുപ്പം തുടരുകയാണെങ്കിൽ ആഗോള സാമ്പത്തിക മേഖലയിൽ അത് വലിയ ചലനങ്ങൾ സൃഷ്ടിക്കുമെന്നാണ് സാമ്പത്തിക നിരീക്ഷകരുടെ വിലയിരുത്തൽ.