നാന്നൂറിലധികം യുദ്ധക്കപ്പലുകളുമായി ചൈന; അമേരിക്കയ്ക്ക് പോലും അപ്രാപ്യമായ രീതിയിൽ നാവിക സാന്നിധ്യം ശക്തമാക്കുന്നു

സ്വന്തം തീരങ്ങളുടെ അതിരുകളിൽ മാത്രം ഒതുങ്ങിനിൽക്കാതെ ഏഷ്യയിലെ ഏറ്റവും തിരക്കേറിയ സമുദ്രപാതകളിലേക്കും രാജ്യാന്തര ജലമാർഗങ്ങളിലേക്കും തങ്ങളുടെ പടയോട്ടം വ്യാപിപ്പിച്ച് ചൈന. ദക്ഷിണ ചൈനാ കടൽ മുതൽ ജപ്പാൻ, തായ്‌വാൻ എന്നിവയോട് ചേർന്നുകിടക്കുന്ന സമുദ്രമേഖലകളിൽ വരെ ദിനംപ്രതി നൂറിലധികം ചൈനീസ് നാവിക യുദ്ധക്കപ്പലുകളാണ് നിലയുറപ്പിച്ചിട്ടുള്ളതെന്നാണ് പുതിയ വിവരങ്ങൾ വ്യക്തമാക്കുന്നത്.

ചൈനയുടെ ഈ ദ്രുതഗതിയിലുള്ള സൈനിക മുന്നേറ്റം പെന്റഗണിലെ അമേരിക്കൻ സൈനിക ഉദ്യോഗസ്ഥരിൽ കടുത്ത ആശങ്കയാണ് സൃഷ്ടിച്ചിരിക്കുന്നത്. നിലവിൽ അമേരിക്കയേക്കാൾ ഉയർന്ന അളവിൽ യുദ്ധക്കപ്പലുകൾ സ്വന്തമായുള്ള രാജ്യമായി ചൈന മാറി.

അമേരിക്കൻ നാവികസേനയ്ക്ക് സങ്കൽപ്പിക്കാൻപോലും കഴിയാത്ത വേഗതയിലാണ് തങ്ങളുടെ കപ്പൽപ്പടയെ അവർ വികസിപ്പിച്ചുകൊണ്ടിരിക്കുന്നത്. പ്രമുഖ മാധ്യമമായ ദ് വാൾ സ്ട്രീറ്റ് ജേർണലിന്റെ റിപ്പോർട്ട് അനുസരിച്ച്, അമേരിക്കൻ ഔദ്യോഗിക കണക്കുകളിൽ ചൈനീസ് നാവികസേനയുടെ പക്കൽ ഇപ്പോൾ നാന്നൂറിലധികം യുദ്ധക്കപ്പലുകളും അന്തർവാഹിനികളുമാണ് ഉള്ളത്.

എണ്ണത്തിന്റെ കാര്യത്തിൽ അമേരിക്കൻ നാവികസേനയേക്കാൾ ഏകദേശം 35 ശതമാനം വർധനവാണ് ഇത് കാണിക്കുന്നത്. നിലവിൽ മൂന്ന് വിമാനവാഹിനിക്കപ്പലുകൾ വിജയകരമായി സർവീസ് നടത്തുമ്പോൾ, നാലാമതൊരു കപ്പലിന്റെ നിർമാണ പ്രവർത്തനങ്ങൾ അന്തിമഘട്ടത്തിലാണ്.

ആധുനിക ചരിത്രത്തിൽ ലോകത്ത് വലിയ യുദ്ധങ്ങളൊന്നുമില്ലാത്ത സമാധാനകാലത്ത് സംഭവിക്കുന്ന ഏറ്റവും വലിയ നാവിക ശക്തിയുടെ വിപുലീകരണമാണിത്. തായ്‌വാനു ചുറ്റുമുള്ള സമുദ്രമേഖലയിൽ ഏതുസമയത്തും ആറോളം ചൈനീസ് യുദ്ധക്കപ്പലുകളുടെ സാന്നിധ്യം ഉണ്ടാകാറുണ്ടെന്ന് സുരക്ഷാ വിദഗ്ധർ ചൂണ്ടിക്കാണിക്കുന്നു.

രാജ്യത്തിന്റെ പ്രത്യേക സൈനികാഭ്യാസ പ്രകടനങ്ങൾ നടക്കുന്ന വേളകളിൽ ഈ കപ്പലുകളുടെ എണ്ണം പലമടങ്ങ് വർധിക്കാറുണ്ട്. ഫിലിപ്പീൻസുമായും വിയറ്റ്നാമുമായും ശക്തമായ തർക്കങ്ങൾ നിലനിൽക്കുന്ന ദക്ഷിണ ചൈനാ കടലിൽ ഇതിന്റെ മൂന്നിരട്ടിയിലേറെ കപ്പലുകളാണ് ചൈന വിന്യസിപ്പിച്ചിട്ടുള്ളത്.

തർക്ക പ്രദേശങ്ങളിലെ തങ്ങളുടെ അവകാശവാദങ്ങൾ ഊർജിതമാക്കുക, തീരമേഖലകളുടെ പൂർണ നിയന്ത്രണം പിടിച്ചെടുക്കുക, ഭാവിയിൽ ഉണ്ടാകാനിടയുള്ള ഏത് യുദ്ധസാഹചര്യങ്ങളിലും അമേരിക്കൻ സൈന്യത്തിന്റെ ഇടപെടലുകളെ ഫലപ്രദമായി പ്രതിരോധിക്കുക എന്നിവയാണ് ഈ നീക്കങ്ങൾക്ക് പിന്നിലെ പ്രധാന ലക്ഷ്യങ്ങൾ. ചൈന കൈവരിച്ച ഈ വൻ നാവിക വളർച്ചയ്ക്ക് അടിത്തറയായി പ്രവർത്തിക്കുന്നത് അവരുടെ അതിബൃഹത്തായ കപ്പൽ നിർമാണ വ്യവസായമാണ്.

ലോകത്തിൽ ഏറ്റവുമധികം കപ്പലുകൾ നിർമിക്കുന്ന രാഷ്ട്രമെന്ന നിലയിൽ, ആഗോളതലത്തിലുള്ള വാണിജ്യ കപ്പലുകളുടെ പകുതിയിലേറെയും പണിയുന്നത് ചൈനയിലാണ്. ഭീമാകാരമായ കണ്ടെയ്നർ വെസലുകൾ മുതൽ അത്യാധുനിക പ്രകൃതിവാതക വാഹകർ വരെ നിർമിക്കുന്ന അതേ കപ്പൽശാലകളാണ് ഇപ്പോൾ അതിവേഗത്തിൽ വൻതോതിൽ യുദ്ധക്കപ്പലുകൾ നിർമിക്കാനും ഉപയോഗിക്കുന്നത്.

2013-ൽ രാജ്യത്തിന്റെ ഭരണസാരഥ്യം ഏറ്റെടുത്ത വേളയിൽത്തന്നെ, ചൈനയെ ലോകം വിറപ്പിക്കുന്ന ഒരു സമുദ്ര ശക്തിയായി മാറ്റണമെന്ന് ഷി ജിൻപിങ് ഭരണകൂടത്തിനും കമ്യൂണിസ്റ്റ് പാർട്ടി നേതാക്കൾക്കും കശന നിർദേശം നൽകിയിരുന്നു.