കൊച്ചിയിലെ പ്രമുഖ പൊതുഇടങ്ങളായ ക്വീൻസ്‌ വോക്‌വേയിലും ഗോശ്രീ-ചാത്യാത്ത് റോഡിലും വികസന പ്രവർത്തനങ്ങൾ നടപ്പിലാക്കാനും കിയോസ്കുകൾ നിർമ്മിക്കാനുമുള്ള സമ്പൂർണ്ണ അധികാരം ഗോശ്രീ ദ്വീപ് വികസന അതോറിറ്റിക്ക് (ജിഡ) ഉണ്ടെന്ന് ഹൈക്കോടതി ഡിവിഷൻ ബെഞ്ച് വ്യക്തമാക്കി. കിയോസ്കുകളുടെ നിർമ്മാണം തടഞ്ഞുകൊണ്ട് നേരത്തെ പുറപ്പെടുവിച്ച സിംഗിൾ ബെഞ്ച് ഉത്തരവാണ് ജസ്റ്റിസ് ഡോ.
എ.കെ.ജയശങ്കരൻ നമ്പ്യാർ, ജസ്റ്റിസ് എ.കെ.പ്രീത എന്നിവരുൾപ്പെട്ട ഡിവിഷൻ ബെഞ്ച് റദ്ദാക്കിയത്.
സിംഗിൾ ബെഞ്ച് ഉത്തരവിനെതിരെ ജിഡയും നിർമാണക്കരാർ ലഭിച്ച സി.ജേക്കബ് ആൻഡ് കമ്പനിയും സമർപ്പിച്ച അപ്പീലുകളിലാണ് ഈ നിർണ്ണായക ഉത്തരവ് ഉണ്ടായിരിക്കുന്നത്. ത്രിത്വം അപ്പാർട്മെന്റ് ഓണേഴ്സ് അസോസിയേഷൻ നൽകിയ ഹർജിയെ തുടർന്നായിരുന്നു സിംഗിൾ ബെഞ്ചിന്റെ മുൻ ഉത്തരവ്.
എറണാകുളം വില്ലേജിൽ ജിഡയ്ക്ക് പതിച്ചുനൽകിയ 25 ഹെക്ടർ ഭൂമിയിലാണ് പ്രസ്തുത റോഡും വോക്‌വേയും സ്ഥിതിചെയ്യുന്നതെന്നും, ഈ പ്രദേശത്തിന്റെ സമഗ്രമായ വികസനച്ചുമതല പൂർണ്ണമായും അതോറിറ്റിക്കാണെന്നും കോടതി എടുത്തുപറഞ്ഞു. വൈപ്പിൻ ബ്രിജസ് പദ്ധതിയുടെയും പ്രദേശത്തിന്റെ പൊതുവികസനത്തിന്റെയും ഭാഗമായാണ് ഈ 25 ഹെക്ടർ ഭൂമി ജിഡയ്ക്ക് കൈമാറിയത്.
പ്രസ്തുത ഭൂമിയുടെ അവകാശം കൊച്ചി കോർപറേഷനിൽ നിക്ഷിപ്തമായിട്ടില്ലെന്നും കോടതി വ്യക്തമാക്കി. അതേസമയം, കാൽനടയാത്രക്കാർക്ക് യാതൊരുവിധ അസൗകര്യങ്ങളും ഉണ്ടാകാത്ത വിധത്തിൽ 2.5 മീറ്റർ വീതിയിൽ പ്രത്യേക പാത വേർതിരിക്കുമെന്നും സുരക്ഷയ്ക്കായി കൈവരികൾ നിർമ്മിക്കുമെന്നും ജിഡ കോടതിക്ക് ഉറപ്പുനൽകി.
പുതുതായി സമർപ്പിച്ച പ്ലാൻ പ്രകാരം കിയോസ്കുകൾ സ്ഥാപിക്കുന്നത് കാൽനടയാത്രക്കാരുടെ മൗലികാവകാശങ്ങളുടെ ലംഘനമാകില്ലെന്നും കോടതി നിരീക്ഷിച്ചു. വൈപ്പിൻ പാലം പദ്ധതിയുടെ ഭാഗമായി മറൈൻ ഡ്രൈവിൽ 25 ഹെക്ടർ ഭൂമി നികത്തി വികസിപ്പിക്കുന്നതിനും, ആവശ്യമായ റോഡ് ശൃംഖലകളും പാലങ്ങളും നിർമ്മിക്കുന്നതിനുമാണ് സർക്കാർ ഈ ഭൂമി ജിഡയ്ക്ക് അനുവദിച്ചതെന്ന് കോടതി ചൂണ്ടിക്കാണിച്ചു.
ജിഡയ്ക്കായി സീനിയർ അഭിഭാഷകൻ ജോർജ് പൂന്തോട്ടം കോടതിയിൽ ഹാജരായി വാദങ്ങൾ അവതരിപ്പിച്ചു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
