മാസപ്പടി കേസ്: പിണറായി വിജയനെതിരെ രംഗത്തു വന്നു മാത്യു കുഴൽനാടൻ

മാസപ്പടി വിവാദവുമായി ബന്ധപ്പെട്ട് താൻ ഉന്നയിച്ച ആരോപണങ്ങൾ സത്യമാണെന്ന് തെളിയുമ്പോൾ നേരിടേണ്ടി വന്നത് കടുത്ത ആക്ഷേപങ്ങളും പരിഹാസങ്ങളുമാണെന്ന് മാത്യു കുഴൽനാടൻ എംഎൽഎ കോട്ടയത്ത് വ്യക്തമാക്കി. പിണറായി വിജയൻ, മുഹമ്മദ് റിയാസ് എന്നിവർക്കെതിരെ അഴിമതി നിരോധന നിയമ പ്രകാരം കേസെടുക്കണമെന്നാണ് എൻഫോഴ്സ്മെന്റ് ഡയറക്ടറേറ്റ് (ഇ.ഡി) ആവശ്യപ്പെട്ടിരിക്കുന്നത്.

മുഖ്യമന്ത്രി പിണറായി വിജയനെതിരെ വിജിലൻസ് കേസെടുത്ത് അന്വേഷണം നടത്താൻ സംസ്ഥാന സർക്കാർ ഇപ്പോൾ നിർബന്ധിതമായിരിക്കുകയാണെന്നും, ആവശ്യമായ തെളിവുകൾ കൈമാറാൻ താൻ പൂർണ്ണമായും തയ്യാറാണെന്നും അദ്ദേഹം വ്യക്തമാക്കി. കഴിഞ്ഞ പത്ത് വർഷത്തിനിടയിൽ വിവിധ കമ്പനികളിൽ നിന്നും പണം കൈപ്പറ്റിയ ശേഷം പിണറായി വിജയൻ അത് വിദേശത്തേക്ക് കടത്തിയെന്നാണ് വിവരം.

സമ്പത്തിന്റെ വലിയൊരു ഭാഗം രാജ്യത്തിന് പുറത്താണ് സൂക്ഷിച്ചിട്ടുള്ളത്. ഈ കേസിൽ താൻ നടത്തിയ നിയമപോരാട്ടം അത്ര എളുപ്പമുള്ള ഒന്നായിരുന്നില്ല.

പലരും സംശയത്തോടെ നോക്കിക്കാണുകയും തന്റെ വഴി തെറ്റിപ്പോയെന്ന് കുറ്റപ്പെടുത്തുകയും ചെയ്തിരുന്നു. സുപ്രീം കോടതി കേസ് തള്ളിയ ഘട്ടത്തിൽ പോലും സഹപ്രവർത്തകരും പാർട്ടി നേതാക്കളും താൻ പറഞ്ഞ കാര്യങ്ങളുടെ നിജസ്ഥിതിയെക്കുറിച്ച് സംശയം പ്രകടിപ്പിച്ചിരുന്നുവെന്നും അദ്ദേഹം കൂട്ടിച്ചേർത്തു.

സമൂഹത്തോടും സ്വന്തം രാഷ്ട്രീയ പ്രസ്ഥാനത്തോടും പിണറായി വിജയൻ പച്ചക്കള്ളമാണ് പറഞ്ഞിട്ടുള്ളത്. തന്നെ മാത്രം ഒറ്റപ്പെടുത്തി ആക്രമിക്കാനാണ് ശ്രമിച്ചതെന്നും വിജിലൻസിനെ ഉപയോഗിച്ച് രാഷ്ട്രീയ പ്രതികാര നടപടികളാണ് സ്വീകരിച്ചതെന്നും അദ്ദേഹം കുറ്റപ്പെടുത്തി.

എന്നാൽ ആ കേസിൽ ഒരു കുറ്റപത്രം (ചാർജ്ഷീറ്റ്) സമർപ്പിക്കാൻ പോലും വിജിലൻസിന് സാധിച്ചിട്ടില്ല. കരിമണൽ കമ്പനിക്ക് അനുകൂലമായി വഴിവിട്ട

സഹായങ്ങൾ ചെയ്തതിന്റെ പ്രത്യുപകാരമാണ് എക്സാലോജിക് കമ്പനിയിലൂടെ മകൾ വീണയ്ക്ക് ലഭിച്ചതെന്നും അദ്ദേഹം ആരോപിച്ചു. മാസപ്പടി കേസിൽ മുഖ്യമന്ത്രി പിണറായി വിജയന് സംരക്ഷണം തീർക്കുന്നത് സിപിഎമ്മാണ്.

മികച്ച പാരമ്പര്യവും ഇച്ഛാശക്തിയുമുള്ള സിപിഎം അദ്ദേഹത്തിന് വേണ്ടി പരസ്യമായി രംഗത്തിറങ്ങുകയായിരുന്നു. സിപിഎം പ്രവർത്തകരും ഡിവൈഎഫ്ഐ, എസ്എഫ്ഐ സംഘടനകളും പിണറായിക്കുവേണ്ടിയാണ് രംഗത്തിറങ്ങിയത്.

എന്നാൽ കഴിഞ്ഞ തിരഞ്ഞെടുപ്പിൽ സിപിഎമ്മിന് നേരിടേണ്ടി വന്ന കനത്ത പരാജയത്തിന് കാരണം ഇത്തരം അഴിമതികൾക്ക് കുടപിടിച്ചതാണെന്നും അദ്ദേഹം വിമർശിച്ചു.