ന്യൂസിലൻഡിനെതിരെ തകർപ്പൻ റെക്കോർഡുമായി രോഹിത് ശർമ്മ; രണ്ടാം ഏകദിനത്തിൽ ഇന്ത്യക്ക് ജയം

വെല്ലിംഗ്ടണിൽ നടന്ന രണ്ടാം ഏകദിന മത്സരത്തിനിടെ ചരിത്രനേട്ടമാണ് മുൻ ഇന്ത്യൻ ക്യാപ്റ്റൻ രോഹിത് ശർമ്മ സ്വന്തമാക്കിയത്. ഏകദിന ക്രിക്കറ്റിൽ കിവീസിനെതിരെ ഏറ്റവും കൂടുതൽ സിക്സറുകൾ നേടുന്ന ബാറ്ററെന്ന പാകിസ്ഥാൻ മുൻ താരം ഷാഹിദ് അഫ്രീദിയുടെ റെക്കോർഡാണ് രോഹിത് മറികടന്നത്.

മഴ തടസ്സപ്പെടുത്തിയ മത്സരത്തിൽ 28 പന്തുകൾ നേരിട്ട രോഹിത് 23 റൺസാണ് നേടിയത്.

രണ്ട് ഫോറുകളും രണ്ട് സിക്സറുകളും അടങ്ങുന്നതായിരുന്നു രോഹിതിന്‍റെ ഇന്നിംഗ്സ്. മത്സരത്തിൽ രണ്ട് സിക്സറുകൾ കൂടി നേടിയതോടെ ഏകദിനത്തിൽ ന്യൂസിലൻഡിനെതിരെ രോഹിതിന്‍റെ ആകെ സിക്സർ നേട്ടം 51 ആയി ഉയർന്നു.

വെറും 34 ഇന്നിംഗ്സുകളിൽ നിന്നാണ് താരം ഈ നേട്ടത്തിലേക്ക് എത്തിയത്. 35 ഇന്നിംഗ്സുകളിൽ നിന്ന് 50 സിക്സറുകൾ നേടിയ ഷാഹിദ് അഫ്രീദിയെയാണ് രോഹിത് ഈ പ്രകടനത്തിലൂടെ പിന്നിലാക്കിയത്.

45 സിക്സറുകളുമായി വെസ്റ്റ് ഇൻഡീസ് ഇതിഹാസം ക്രിസ് ഗെയ്‌ൽ ആണ് ഈ പട്ടികയിൽ മൂന്നാമത് നിൽക്കുന്നത്. സനത് ജയസൂര്യ (41), ജോസ് ബട്‌ലർ (29), വിരാട് കോലി (29) എന്നിവരാണ് രോഹിത്തിന് പിന്നിലെ മറ്റ് താരങ്ങൾ.

ഈ റെക്കോർഡിന് പുറമെ, അന്താരാഷ്ട്ര ക്രിക്കറ്റിലെ എല്ലാ ഫോർമാറ്റുകളിലുമായി (ടെസ്റ്റ്, ഏകദിനം, ടി20) ന്യൂസിലൻഡിനെതിരെ ഏറ്റവും കൂടുതൽ സിക്സറുകൾ നേടിയ ക്രിസ് ഗെയ്‌ലിന്‍റെ സർവ്വകാല റെക്കോർഡിന് തൊട്ടടുത്തെത്താനും രോഹിത്തിനായി. അന്താരാഷ്ട്ര തലത്തിൽ ഗെയ്‌ൽ 87 സിക്സറുകൾ നേടിയിട്ടുള്ളപ്പോൾ രോഹിതിന് നിലവിൽ 85 സിക്സറുകളാണുള്ളത്.

ഇനി മൂന്ന് സിക്സറുകൾ കൂടി നേടിയാൽ ഗെയ്‌ലിനെയും മറികടന്ന് ഈ പട്ടികയിലും ഒന്നാമതെത്താൻ രോഹിതിന് സാധിക്കും. ഈ പട്ടികയിൽ 64 സിക്സറുകളോടെ അഫ്രീദി മൂന്നാമതും ഓയിൻ മോർഗൻ (53), ഫഖർ സമൻ (52) എന്നിവർ തൊട്ടടുത്ത സ്ഥാനങ്ങളിലുമുണ്ട്.

മഴ കാരണം തടസപ്പെട്ട മത്സരത്തിൽ ഡിഎൽഎസ് നിയമപ്രകാരം നാല് റൺസിനാണ് ഇന്ത്യ ന്യൂസിലൻഡിനെ തോല്‍പ്പിച്ചത്.

ആദ്യം ബാറ്റ് ചെയ്യാൻ ഇറങ്ങിയ ന്യൂസിലൻഡ് 134 റൺസിന് ഓൾ ഔട്ടാവുകയായിരുന്നു. 10 ഓവറിൽ 30 റൺസ് മാത്രം വഴങ്ങി നാല് വിക്കറ്റ് വീഴ്ത്തിയ ഗുർനൂർ ബ്രാറാണ് കിവീസ് ബാറ്റിംഗ് നിരയെ തകർത്തത്.

104 പന്തിൽ 55 റൺസെടുത്ത ഡാരിൽ മിച്ചലാണ് ന്യൂസിലൻഡിന്റെ ടോപ് സ്‌കോറർ. മറുപടി ബാറ്റിംഗിനിറങ്ങിയ ഇന്ത്യ 26 ഓവറിൽ ഏഴ് വിക്കറ്റിന് 113 റൺസ് എടുത്ത് നിൽക്കെ മഴ കളി തടസ്സപ്പെടുത്തുകയായിരുന്നു.

ജയിക്കാൻ 66 പന്തിൽ 22 റൺസ് വേണമെന്നിരിക്കെ കളി ഉപേക്ഷിച്ചെങ്കിലും ഡിഎൽഎസ് കണക്കുകൂട്ടൽ പ്രകാരം ഇന്ത്യ നാല് റൺസിന് മുന്നിലായിരുന്നു. ഈ വിജയത്തോടെ അഞ്ച് മത്സരങ്ങളടങ്ങിയ പരമ്പരയിൽ ഇന്ത്യ 2-0 ന് മുന്നിലെത്തി.