റിവൈവ് പദ്ധതി സംസ്ഥാനത്തെ വിദ്യാഭ്യാസ മേഖലയ്ക്ക് മുതൽക്കൂട്ടാകും: മന്ത്രി എൻ ഷംസുദ്ദീൻ

അടിസ്ഥാന ഗണിതശേഷിയിലും മലയാളം, ഇംഗ്ലീഷ് ഭാഷാവിജ്ഞാനത്തിലും പിന്നാക്കം നിൽക്കുന്ന വിദ്യാർഥികൾക്ക് പ്രത്യേക പിന്തുണ ഉറപ്പാക്കുന്ന റിവൈവ് പദ്ധതി കേരളത്തിലെ വിദ്യാർഥികൾക്ക് വലിയ നേട്ടമാകുമെന്ന് പൊതുവിദ്യാഭ്യാസ വകുപ്പ് മന്ത്രി എൻ ഷംസുദ്ദീൻ വ്യക്തമാക്കി. ഭാഷാ-ഗണിത ശേഷികൾ മെച്ചപ്പെടാതെ ഒരു കുട്ടിയെയും ഇനി ഏഴാം ക്ലാസിലേക്ക് ജയിപ്പിച്ചു വിടില്ലെന്നും അദ്ദേഹം പറഞ്ഞു.

പൊതുവിദ്യാഭ്യാസ വകുപ്പും സമഗ്ര ശിക്ഷാ കേരളവും സംയുക്തമായി നടപ്പാക്കുന്ന പദ്ധതിയുടെ സംസ്ഥാനതല സാക്ഷാത്കാര പ്രഖ്യാപനം തിരുവനന്തപുരം പട്ടം സെന്റ് മേരീസ് എച്ച് എസ് എസിൽ നിർവഹിക്കുകയായിരുന്നു മന്ത്രി. നൂറുദിന കർമപരിപാടിയുടെ ഭാഗമായി പൊതുവിദ്യാഭ്യാസ വകുപ്പ് പ്രഖ്യാപിച്ച 16 പദ്ധതികളും വിജയകരമായി നടപ്പിലാക്കിയതായി അദ്ദേഹം അറിയിച്ചു.

സംസ്ഥാനത്തെ എല്ലാ ഏകാധ്യാപക വിദ്യാലയങ്ങളും എൽ പി സ്‌കൂളുകളായി ഉയർത്തുകയും അധ്യാപകരുടെ ദീർഘകാല പ്രശ്നങ്ങൾ പരിഹരിക്കുകയും ചെയ്തിട്ടുണ്ട്. ഹൈസ്‌കൂൾ തലത്തിൽ ആർട്ടിഫിഷ്യൽ ഇന്റലിജൻസ് പഠനം ആരംഭിച്ചതിനൊപ്പം എല്ലാ എൽ പി, യു പി സ്‌കൂളുകളിലും ഡിജിറ്റൽ സ്‌ക്വയറുകൾ സ്ഥാപിച്ചു.

ഹയർ സെക്കൻഡറി തലത്തിൽ പുതിയ ബാച്ചുകൾ ആരംഭിച്ചതോടൊപ്പം കുട്ടികൾക്ക് നീന്തൽ പരിശീലനം നൽകുന്ന ‘അക്വാഫിറ്റ്’, ആദിവാസി-തീരദേശ മേഖലകളിൽ സ്‌കൂളിൽ നിന്ന് കൊഴിഞ്ഞുപോയ കുട്ടികളെ തിരികെ എത്തിക്കുന്ന ‘കൂടെ’ പദ്ധതികളും നടപ്പിലാക്കി കഴിഞ്ഞു. കേന്ദ്രഫണ്ട് ലഭിക്കുന്നതിൽ ചില കുറവുകളുണ്ടെങ്കിലും സംസ്ഥാന സർക്കാരിന്റെ ആവശ്യമായ സാമ്പത്തിക പിന്തുണയോടെ സമഗ്ര ശിക്ഷാ കേരളത്തിന്റെ പദ്ധതികൾ തടസ്സമില്ലാതെ മുന്നോട്ട് കൊണ്ടുപോകുമെന്നും മന്ത്രി വ്യക്തമാക്കി.

ഭാവിയെ രൂപപ്പെടുത്തുന്നതിന് ഗണിത-ഭാഷാ അറിവുകൾക്ക് നിർണായക പ്രാധാന്യമുണ്ടെന്നും ആത്മവിശ്വാസത്തോടെ സംസാരിക്കുന്നതിനും സാമൂഹിക ഇടപെടലുകൾ നടത്തുന്നതിനും ഇത് സഹായിക്കുമെന്നും ചടങ്ങിൽ അധ്യക്ഷനായ ആരോഗ്യവകുപ്പ് മന്ത്രി കെ മുരളീധരൻ അഭിപ്രായപ്പെട്ടു. എൽ പി, യു പി ക്ലാസ്സുകളിൽ മലയാളം, ഇംഗ്ലീഷ്, ഗണിതം എന്നീ വിഷയങ്ങളിൽ കുട്ടികൾ നേരിടുന്ന പ്രയാസങ്ങൾ ദൂരീകരിക്കുകയാണ് റിവൈവ് പദ്ധതിയിലൂടെ ലക്ഷ്യമിടുന്നത്.

പാഠ്യപദ്ധതി ചട്ടക്കൂടിനുള്ളിൽനിന്ന് കുട്ടികളിലെ പ്രത്യേക പഠന പിന്നാക്കാവസ്ഥകൾ തിരിച്ചറിയാനും ഫലപ്രദമായ ബോധനരീതികൾ നടപ്പിലാക്കാനും ഇതിലൂടെ സാധിക്കും. പഠനനേട്ടങ്ങൾ വിലയിരുത്താനും ക്ലാസ് റൂം തെളിവുകൾ അടിസ്ഥാനമാക്കി അധ്യാപന രീതികൾ നിരന്തരം മെച്ചപ്പെടുത്താനും പദ്ധതി വലിയ തോതിൽ ഉപകരിക്കുമെന്ന് വിലയിരുത്തപ്പെടുന്നു.

ചടങ്ങിൽ സമഗ്ര ശിക്ഷാ കേരളം സ്റ്റേറ്റ് പ്രോജക്ട് ഡയറക്ടർ ഡോ. കെ മോഹനകുമാർ, തിരുവനന്തപുരം എസ് പി ഒ ഇൻചാർജ് വി കെ അബ്ദുറഹിമാൻ, ജില്ലാ പ്രോജക്ട് കോർഡിനേറ്റർ പനവൂർ നിസാമുദീൻ, വിദ്യാഭ്യാസ ഡെപ്യൂട്ടി ഡയറക്ടർ ബിജു ആർ, ഡയറ്റ് പ്രിൻസിപ്പൽ ഗീതാ നായർ, പട്ടം സെന്റ് മേരീസ് എച്ച്എസ്എസ് പ്രിൻസിപ്പൽ ഫാദർ നെൽസൺ വലിയവീട്ടിൽ, ഹെഡ്മാസ്റ്റർ റെജി ലൂക്കോസ്, പി ടി എ പ്രസിഡന്റ് മനോജ് കെ ബി തുടങ്ങിയ പ്രമുഖർ സന്നിഹിതരായിരുന്നു.