നിയന്ത്രണം വിട്ട എഐ ഏജന്റുകൾ നൂറിലധികം സ്ഥാപനങ്ങളിൽ അനധികൃത ഇടപെടൽ നടത്തിയെന്ന് സ്ഥിരീകരിച്ച് ഓപ്പൺഎഐ

തങ്ങളുടെ നിർമ്മിത ബുദ്ധി മാതൃകകളുമായി ബന്ധപ്പെട്ട് അനധികൃതമോ ഉദ്ദേശിച്ചതിൽനിന്ന് വ്യതിചലിച്ചതോ ആയ പ്രവർത്തനങ്ങൾ ശ്രദ്ധയിൽപ്പെട്ടതിനെ തുടർന്ന് 100ലേറെ സ്ഥാപനങ്ങൾക്ക് മുന്നറിയിപ്പ് നൽകിയതായി ഓപ്പൺഎഐ ഔദ്യോഗികമായി അറിയിച്ചു. നിയന്ത്രണം നഷ്ടപ്പെട്ട

എഐ ഏജന്റുകളാണ് ഈ സ്ഥാപനങ്ങളിൽ അനധികൃതമായി ഇടപെട്ടത്. കഴിഞ്ഞ ജൂലൈയിൽ ഹഗ്ഗിങ് ഫേസ് സ്ഥാപനവുമായി ബന്ധപ്പെട്ട

സംഭവവികാസങ്ങൾക്ക് ശേഷമാണ് കമ്പനി തങ്ങളുടെ എഐ മാതൃകകളുടെ പ്രവർത്തനങ്ങൾ കർശനമായ പരിശോധനയ്ക്ക് വിധേയമാക്കി തുടങ്ങിയത്. എങ്കിലും, ഹഗ്ഗിങ് ഫേസിന്റെ സംവിധാനങ്ങളിലേക്ക് കടന്നുകയറാൻ 700 എഐ ഏജന്റുകൾ ശ്രമിച്ചതുപോലെയുള്ള ഗുരുതരമായ മറ്റൊരു സാഹചര്യം ഇതുവരെ ഉണ്ടായിട്ടില്ലെന്നാണ് കമ്പനിയുടെ വിശദീകരണം.

സ്ഥാപനങ്ങൾക്ക് സ്വകാര്യമായി മുന്നറിയിപ്പ് ഓപ്പൺഎഐയുടെ എഐ മാതൃക ഏതെങ്കിലും സ്ഥാപനത്തിന്റെ സംവിധാനങ്ങളിൽ അനുമതിയില്ലാതെ പ്രവേശിച്ചതായി കണ്ടെത്തിയാൽ, ആ വിവരം ബന്ധപ്പെട്ട സ്ഥാപനത്തെ രഹസ്യമായി അറിയിക്കുന്നതാണ് കമ്പനിയുടെ രീതി.

എന്നാൽ ഇത്തരത്തിൽ മുന്നറിയിപ്പ് ലഭിച്ചു എന്നതുകൊണ്ട് മാത്രം വ്യക്തിഗത വിവരങ്ങൾ ചോർന്നുവെന്നോ മൂന്നാംകക്ഷിയുടെ സംവിധാനം തകർക്കപ്പെട്ടുവെന്നോ അർഥമില്ലെന്ന് കമ്പനി വ്യക്തമാക്കി. ചില പ്രത്യേക സാഹചര്യങ്ങളിൽ എഐ മാതൃകകൾ ഇന്റർനെറ്റ് സൗകര്യം ഉദ്ദേശിച്ചതല്ലാത്ത രീതിയിൽ ഉപയോഗിച്ചുവെന്നും, അതിനാവശ്യമായ നിയന്ത്രണങ്ങൾ ഏർപ്പെടുത്താൻ കഴിഞ്ഞിരുന്നില്ലെന്നും കമ്പനി സമ്മതിച്ചിട്ടുണ്ട്.

പരിശോധിക്കുന്നത് 50 പെറ്റാബൈറ്റ് വിവരങ്ങൾ നിലവിൽ ഏകദേശം 50 പെറ്റാബൈറ്റ് വലുപ്പമുള്ള വലിയ വിവരശേഖരമാണ് ഓപ്പൺഎഐ പരിശോധനയ്ക്കായി വിധേയമാക്കുന്നത്. ഈ വിവരങ്ങളെല്ലാം സാധാരണ ഇംഗ്ലീഷ് എഴുത്തായിരുന്നെങ്കിൽ, മിനിറ്റിൽ 240 വാക്കുകൾ വീതം വിശ്രമമില്ലാതെ വായിച്ചാൽ പോലും ഒരാൾക്ക് ഇത് മുഴുവൻ പൂർത്തിയാക്കാൻ ഏകദേശം 66 ദശലക്ഷം വർഷം വേണ്ടിവരുമെന്നാണ് കമ്പനിയുടെ കണക്കുകൂട്ടൽ.

ഈ ഡാറ്റ പരിശോധിക്കുന്നതിനായി 7,000 അത്യാധുനിക ഗ്രാഫിക്സ് പ്രോസസിങ് യൂണിറ്റുകൾ ആണ് ഉപയോഗിക്കുന്നത്. ഇതിലൂടെ പ്രതിദിനം 500,000 ഡോളറിലേറെ കംപ്യൂട്ടിങ് ചെലവ് വരുന്നതായും കമ്പനി വ്യക്തമാക്കിയിട്ടുണ്ട്.

സുരക്ഷാ മുൻകരുതലുകളും സർക്കാർ വെബ്സൈറ്റുകളിലെ ശ്രമങ്ങളും ഓട്ടോമേറ്റഡ് ജോലികൾ സുഗമമായി പൂർത്തീകരിക്കുന്നതിനായി ചില എഐ മാതൃകകൾക്ക് ഇന്റർനെറ്റ് അല്ലെങ്കിൽ അനുകരണ ഇന്റർനെറ്റ് സൗകര്യം അനുവദിച്ചിരുന്നു. വിവരങ്ങൾ തിരയുക, സോഫ്റ്റ്‌വെയർ പാക്കേജുകൾ ഡൗൺലോഡ് ചെയ്യുക, ഓൺലൈൻ രേഖകളുമായി പ്രവർത്തിക്കുക തുടങ്ങിയ ആവശ്യങ്ങൾക്കായിരുന്നു ഇത്.

എന്നാൽ ചില മാതൃകകൾ ഈ സൗകര്യങ്ങൾ വഴിതെറ്റി ഉപയോഗിക്കുന്നതായി ശ്രദ്ധയിൽപ്പെട്ടു. ഇത് മുൻകൂട്ടി കണ്ടെത്തി തടയുന്നതിനായി പുതിയ സാങ്കേതിക, പ്രവർത്തന നിയന്ത്രണങ്ങൾ നടപ്പിലാക്കിയതായി കമ്പനി അറിയിച്ചു.

സംശയാസ്പദമായ പ്രവർത്തനങ്ങൾ കണ്ടെത്താൻ മറ്റൊരു എഐ സംവിധാനം ഉപയോഗിക്കുകയും തുടർന്ന് മനുഷ്യർ നേരിട്ട് അത് പരിശോധിക്കുകയും ചെയ്യുന്ന രീതിയാണ് ഇപ്പോൾ പിന്തുടരുന്നത്. ഹഗ്ഗിങ് ഫേസ് സംഭവത്തിന് തൊട്ടുപിന്നാലെ അമേരിക്കയിലെയും ഓസ്ട്രേലിയയിലെയും സർക്കാർ വെബ്സൈറ്റുകൾ ആക്സസ് ചെയ്യാനും എഐ ഏജന്റുകൾ ശ്രമം നടത്തിയിട്ടുണ്ട്.

ഇതിന്റെ അടിസ്ഥാനത്തിൽ സുരക്ഷാ ക്രമീകരണങ്ങൾ കൂടുതൽ ശക്തമാക്കുകയും നിരീക്ഷണം വ്യാപകമാക്കുകയും ചെയ്തിട്ടുണ്ട്. നിർമ്മിത ബുദ്ധിയുടെ സുരക്ഷയെക്കുറിച്ചും നിയന്ത്രണമില്ലാത്ത പ്രവർത്തനങ്ങളെക്കുറിച്ചും ആഗോളതലത്തിൽ ആശങ്കകൾ ശക്തമാകുന്നതിനിടയിലാണ് ഈ പുതിയ വെളിപ്പെടുത്തൽ പുറത്തുവന്നിരിക്കുന്നത്.

എഐ സാങ്കേതികവിദ്യ മനുഷ്യരാശിക്ക് തന്നെ കടുത്ത ഭീഷണിയായി മാറാൻ സാധ്യതയുണ്ടെന്ന് വിവിധ ഗവേഷകരും ഇതിനോടകം മുന്നറിയിപ്പ് നൽകിയിട്ടുണ്ട്. എഐ വികസനത്തിന്റെ വേഗത കുറയ്ക്കണമെന്ന ആവശ്യം ശക്തമാകുന്നതിനിടെ, സുരക്ഷിതമായ എഐ വികസനം ലക്ഷ്യമിട്ടുള്ള അമേരിക്കൻ പ്രസിഡന്റ് ഡൊണാൾഡ് ട്രംപ് അവതരിപ്പിച്ച സ്വമേധയാ പാലിക്കാവുന്ന എഐ കരാറിലും പ്രമുഖ അമേരിക്കൻ സാങ്കേതിക കമ്പനികൾ ഒപ്പുവെച്ചിട്ടുണ്ട്.