ലോക അത്ലറ്റിക്സ് വേദിയില് പുതിയ ചരിത്രമെഴുതി ശ്രീലങ്കയുടെ യുവതാരം റുമേഷ് തരംഗ പതിരഗെ. റോമില് നടന്ന ഡയമണ്ട് ലീഗ് മത്സരത്തിലാണ് 23 വയസ്സുകാരനായ ഈ താരം ജാവലിന് ത്രോയില് സ്വര്ണ്ണ മെഡല് കരസ്ഥമാക്കിയത്.
വ്യാഴാഴ്ച നടന്ന പോരാട്ടത്തില് 92.62 മീറ്റര് ദൂരത്തേക്ക് ജാവലിന് പായിച്ചാണ് റുമേഷ് കായികലോകത്തിന്റെ ശ്രദ്ധ പിടിച്ചുപറ്റിയത്. ഈ നേട്ടത്തോടെ പുരുഷന്മാരുടെ ജാവലിന് ത്രോയില് 90 മീറ്റര് എന്ന മാന്ത്രിക ദൂരം പിന്നിടുന്ന നാലാമത്തെ മാത്രം ഏഷ്യന് അത്ലറ്റായി റുമേഷ് തരംഗ പതിരഗെ മാറി.
ചൈനീസ് തായ്പേയിയുടെ ചെങ് ചാവോ-സുന് (91.36 മീറ്റര്), പാകിസ്ഥാന്റെ അര്ഷാദ് നദീം (92.97 മീറ്റര്), ഇന്ത്യയുടെ നീരജ് ചോപ്ര (90.23 മീറ്റര്) എന്നിവര് മാത്രമാണ് ഇതിനുമുമ്പ് ഏഷ്യന് വന്മകരയില് നിന്നും ഈ നേട്ടം കൈവരിച്ചവര്. ജാവലിന് ത്രോ ചരിത്രത്തിലെ എക്കാലത്തെയും മികച്ച 21-ാമത്തെ പ്രകടനമാണിത്.
1996-ല് 98.48 മീറ്റര് എറിഞ്ഞ് റെക്കോര്ഡ് കുറിച്ച ജാന് സെലസ്നിയാണ് ഈ പട്ടികയില് ഒന്നാം സ്ഥാനത്ത് തുടരുന്നത്. തന്റെ രണ്ടാം ശ്രമത്തില് തന്നെ മീറ്റ് റെക്കോര്ഡോടെ മികച്ച ദൂരം കണ്ടെത്താന് റുമേഷിനായി.
തുടര്ന്നുള്ള നാല് ശ്രമങ്ങള് ഫൗളായെങ്കിലും, മത്സരിച്ച മറ്റ് ഒമ്പത് താരങ്ങള്ക്കും 85 മീറ്റര് പോലും പിന്നിടാനായില്ല. മുന് ലോക ചാമ്പ്യന് ആന്ഡേഴ്സണ് പീറ്റേഴ്സ് 83.89 മീറ്ററോടെ രണ്ടാം സ്ഥാനത്ത് ഫിനിഷ് ചെയ്തു.
കഴിഞ്ഞ മാര്ച്ചില് ദിയാഗമയില് നടന്ന മത്സരത്തില് 89.37 മീറ്റര് ദൂരം കണ്ടെത്തി ഈ വര്ഷത്തെ മികച്ച പ്രകടനം താരം നേരത്തെ തന്നെ കാഴ്ചവെച്ചിരുന്നു. ക്രിക്കറ്റില് നിന്ന് ജാവലിനിലേക്ക് കായിക പാരമ്പര്യമുള്ള കുടുംബമാണെങ്കിലും, തുടക്കകാലത്ത് ക്രിക്കറ്റിനോടായിരുന്നു റുമേഷിന് താല്പര്യം.
അണ്ടര്-18 തലത്തില് കളിക്കുമ്പോള് മണിക്കൂറില് 134 കിലോമീറ്റര് വേഗതയില് പന്തെറിയാന് ഈ യുവതാരത്തിന് സാധിച്ചിരുന്നു. ഫാസ്റ്റ് ബൗളിങ് ടാലന്റ് ഹണ്ടില് മികച്ച വേഗതയുള്ള താരമായി തിരഞ്ഞെടുക്കപ്പെട്ടിരുന്ന റുമേഷ്, കൊളംബോ സെന്റ് പീറ്റേഴ്സ് കോളേജിനായി കളിക്കുമ്പോള് അഞ്ച് വിക്കറ്റും അര്ദ്ധ സെഞ്ച്വറിയും നേടി തിളങ്ങിയിരുന്നു.
എങ്കിലും പിന്നീട് ക്രിക്കറ്റില് നിന്നും ജാവലിന് ത്രോയിലേക്ക് താരം തന്റെ കരിയര് മാറ്റുകയായിരുന്നു. ഇതിനെക്കുറിച്ച് റുമേഷ് വ്യക്തമാക്കിയത് ഇപ്രകാരമാണ്: ”ക്രിക്കറ്റില് രാഷ്ട്രീയ ഇടപെടലുകളും കടുത്ത മത്സരവുമുണ്ട്.
അതൊരു ടീം ഇനമാണ്. ദേശീയ ടീമിലെത്താന് കേവലം പ്രതിഭ മാത്രം പോരാ.
എന്നാല് ജാവലിനില് എനിക്ക് കഴിവുണ്ടെങ്കില് ഞാന് തീര്ച്ചയായും അംഗീകരിക്കപ്പെടും.”
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
