കരിയറിന്റെ തുടക്കത്തിലെ കുറഞ്ഞ ശമ്പളം ഭാവി വരുമാനത്തെ ബാധിക്കുമെന്ന് മുന്നറിയിപ്പ്

ഉദ്യോഗാർത്ഥികൾ കരിയറിന്റെ തുടക്കത്തിൽ സ്വീകരിക്കുന്ന കുറഞ്ഞ ശമ്പളം അവരുടെ ഭാവിയിലെ വരുമാന വർധനവിനെ പ്രതികൂലമായി ബാധിച്ചേക്കാമെന്ന് മുന്നറിയിപ്പുമായി യുവ സംരംഭക രംഗത്ത്. ഓരോ പുതിയ ജോലിയിലെയും വേതനം മുൻപത്തെ വരുമാനത്തെ അടിസ്ഥാനമാക്കി നിശ്ചയിക്കുന്ന പ്രവണതയാണ് ഇതിന് കാരണമെന്ന് സംരംഭകയായ വന്യ ഗോയൽ ഇൻസ്റ്റാഗ്രാമിൽ പങ്കുവെച്ച വീഡിയോയിലൂടെ വ്യക്തമാക്കിയിട്ടുണ്ട്.

കുറഞ്ഞ വേതനത്തിൽ തൊഴിൽ ജീവിതം ആരംഭിക്കുന്ന പ്രൊഫഷണലുകൾ ഒരു പ്രത്യേക പ്രതിസന്ധിയിലോ ചക്രവ്യൂഹത്തിലോ പെട്ടുപോകുമെന്നാണ് അവർ വിലയിരുത്തുന്നത്. തൊഴിൽ മാറുന്ന അവസരങ്ങളിലെല്ലാം മുൻകാല ശമ്പളത്തെ അടിസ്ഥാനമാക്കി പുതിയ ഓഫറുകൾ നിശ്ചയിക്കപ്പെടുന്നതാണ് ഈ അവസ്ഥയ്ക്ക് കാരണം.

പ്രതിവർഷ ശമ്പള വർധനവും യാഥാർത്ഥ്യവും സംബന്ധിച്ച് വ്യക്തമായ ഉദാഹരണവും ഇവർ ചൂണ്ടിക്കാണിക്കുന്നുണ്ട്. പ്രതിവർഷം 6 ലക്ഷം രൂപ വരുമാനമുള്ള ഒരു ജീവനക്കാരന്റെ ഉദാഹരണമാണ് വന്യ ഇതിനായി അവതരിപ്പിച്ചത്.

ആദ്യ വർധനവിൽ എച്ച്.ആർ വിഭാഗം 20 ശതമാനം വർധനവ് നൽകിയാൽ ശമ്പളം 7.2 ലക്ഷം രൂപയായി ഉയരും. തുടർന്ന് അടുത്ത വർധനവിൽ അത് 8.6 ലക്ഷം രൂപയിലെത്തും.

തുടർന്ന് വിപണിയിലെ സാധാരണ നിരക്കായ 30 ശതമാനം വർധനവ് ലഭിച്ചാൽ ഈ തുക 10.3 ലക്ഷം രൂപയായി മാറും. എന്നാൽ, അഞ്ച് വർഷത്തിന് ശേഷം വിപണിയിലെ യഥാർത്ഥ ശമ്പള നിരക്കുമായി താരതമ്യം ചെയ്യുമ്പോൾ തങ്ങൾ വളരെ പിന്നിലാണെന്ന് ഈ ജീവനക്കാരൻ തിരിച്ചറിയുന്ന സാഹചര്യമാണ് ഇതുണ്ടാക്കുന്നത്.

‘സാലറി കറക്ഷൻ’ അഥവാ ശമ്പള പുനർനിർണ്ണയം അത്യന്താപേക്ഷിതം കേവലം ശതമാനക്കണക്കിലുള്ള പതിവ് ശമ്പളവർധനവിന് പിന്നാലെ മാത്രം പോകുന്നത് ഗുണം ചെയ്യില്ലെന്നാണ് വന്യ ഗോയൽ നൽകുന്ന ഉപദേശം. ചില സന്ദർഭങ്ങളിൽ സാധാരണ ശമ്പളവർധനവിന് പകരം യഥാർത്ഥ വിപണി മൂല്യം അനുസരിച്ചുള്ള ശമ്പള പുനർനിർണ്ണയമാണ് (സാലറി കറക്ഷൻ) ആവശ്യപ്പെടേണ്ടത്.

കരിയറിലെ മികച്ച വളർച്ചയ്ക്ക് ജോലി നന്നായി നിർവഹിക്കുന്നതിനൊപ്പം സ്വന്തം വിപണി മൂല്യം കൃത്യമായി മനസ്സിലാക്കാനും അത് അധികാരികൾക്ക് മുന്നിൽ സമർത്ഥമായി അവതരിപ്പിക്കാനും സാധിക്കണം. കമ്പനിക്കുള്ള സ്വന്തം സംഭാവനകൾ കൃത്യമായി പ്രകടിപ്പിക്കാനോ അർഹമായ വേതനത്തിനായി ശക്തമായി വാദിക്കാനോ (ബാർഗെയ്ൻ) കഴിയാത്തപക്ഷം മികച്ച കഴിവുള്ള ജീവനക്കാർക്കും കുറഞ്ഞ ശമ്പളത്തിൽ തന്നെ തുടരേണ്ടി വരുമെന്ന് അവർ കൂട്ടിച്ചേർത്തു.