ഫാക്ടറി തൊഴിലാളിയിൽ നിന്ന് ചൈനയിലെ ഏറ്റവും സമ്പന്നയായ വനിതയിലേക്ക്: ഷൗ ക്വുൻഫെയ്യുടെ വിജയഗാഥ

അധ്വാനിക്കാനുള്ള മനസ്സും നിശ്ചയദാർഢ്യവുമുണ്ടെങ്കിൽ ജീവിതത്തിൽ വിജയം കൈവരിക്കാം എന്നതിന്റെ മികച്ച ഉദാഹരണമാണ് ചൈനീസ് വനിതയായ ഷൗ ക്വുൻഫെയ്. കൗമാരപ്രായത്തിൽ തന്നെ സ്കൂൾ പഠനം ഉപേക്ഷിച്ച് ഫാക്ടറി ജീവനക്കാരിയായി ജോലി ചെയ്യേണ്ടി വന്ന ഇവർ, ഇന്ന് ചൈനയിലെ ഏറ്റവും സമ്പന്നയായ വനിതയായി മാറിയിരിക്കുകയാണ്.

56 കാരിയായ ഷൗവിന്റെ ആസ്തി ഏകദേശം 1.8 ലക്ഷം കോടി രൂപയായിട്ടാണ് (127 ശതകോടി യുവാൻ) കണക്കാക്കപ്പെടുന്നത്. പ്രമുഖ ഗ്ലാസ് നിർമ്മാണ കമ്പനിയായ ലെൻസ് ടെക്നോളജിയുടെ സ്ഥാപകയാണ് ഇവർ.

ഹുറുൻ റിച്ചസ്റ്റ് വുമൺ ഇൻ ചൈന 2026 പട്ടിക പ്രകാരം, കഴിഞ്ഞ ഒരു വർഷത്തിനിടെ ഷൗവിന്റെ സമ്പത്തിൽ 15 ശതമാനത്തിന്റെ വർധനവാണ് രേഖപ്പെടുത്തിയിരിക്കുന്നത്. ഹാൻസോ ഫാർമസ്യൂട്ടിക്കൽ സ്ഥാപകയായ ഷോങ് ഹുയിജുആനെ പിന്തള്ളിയാണ് ഷൗ ഒന്നാം സ്ഥാനം കരസ്ഥമാക്കിയത്.

ഷോങ്ങിന്റെ ആസ്തി ഏകദേശം 1.76 ലക്ഷം കോടി രൂപയാണ് (124 ശതകോടി യുവാൻ). ഇതിനുമുമ്പ് 2015-ലും ഷൗ ചൈനയിലെ ഏറ്റവും സമ്പന്നയായ വനിതയായി തിരഞ്ഞെടുക്കപ്പെട്ടിരുന്നു.

1970-ൽ ഹുനാൻ പ്രവിശ്യയിലാണ് ഷൗ ക്വുൻഫെയ് ജനിച്ചത്. കൗമാരത്തിൽ തന്നെ പഠനം അവസാനിപ്പിച്ച ഇവർ ജോലി തേടി ഷെൻഷനിലേക്ക് ചേക്കേറി.

പ്രതിദിനം 1.20 ഡോളർ മാത്രം വേതനത്തിൽ ഒരു വാച്ച്-ഗ്ലാസ് ഫാക്ടറിയിലാണ് ഇവർ തന്റെ കരിയറിന് തുടക്കമിട്ടത്. തുടർന്ന് 23-ാം വയസ്സിൽ സ്വന്തമായി ഒരു ഗ്ലാസ് പ്രോസസിങ് വർക്ക്ഷോപ്പ് ആരംഭിച്ചു.

അഡ്വാൻസ്ഡ് സ്ക്രീൻ പ്രിന്റിങ്, കേർവ്ഡ് ഗ്ലാസ് നിർമ്മാണം എന്നിവ സ്വയം പഠിച്ചെടുത്തത് പിന്നീട് ഇവരുടെ ബിസിനസ്സിന്റെ വളർച്ചയിൽ നിർണായകമായി മാറി. പിന്നീട് സ്മാർട്ട്ഫോണുകൾക്കായി ഗ്ലാസ് സ്ക്രീനുകൾ വിതരണം ചെയ്യുന്ന മുൻനിര സ്ഥാപനമായ ലെൻസ് ടെക്നോളജിക്ക് അവർ രൂപം നൽകി.

2007-ൽ ആപ്പിളിന്റെ ആദ്യ ഐഫോണുകൾക്കായി ഗ്ലാസ് കവറുകൾ നിർമ്മിച്ച് നൽകിത്തുടങ്ങിയതോടെ കമ്പനിയുടെ തലവര തന്നെ മാറിമറിഞ്ഞു. 2011 മുതൽ 2014-ന്റെ പകുതി വരെയുള്ള കാലയളവിൽ ലെൻസ് ടെക്നോളജിയുടെ വരുമാനത്തിന്റെ പകുതിയോളവും ആപ്പിളിൽ നിന്നു മാത്രമായിരുന്നു.

2015 മാർച്ച് മാസത്തിൽ ഷെൻഷനിൽ കമ്പനി ഓഹരി വിപണിയിൽ ലിസ്റ്റ് ചെയ്തതോടെ ഷൗ ചൈനയിലെ ഏറ്റവും സമ്പന്നയായ വനിത എന്ന പദവിയിലേക്ക് ഉയർന്നു. എന്നാൽ, 2018-ൽ യുഎസ്-ചൈന വ്യാപാര യുദ്ധവും ആപ്പിൾ ഫോണുകളുടെ വിൽപ്പനയിലെ ഇടിവും ലെൻസ് ടെക്നോളജിയുടെ ഓഹരി വിലയെ ഗുരുതരമായി ബാധിച്ചത് തിരിച്ചടിയായി.

ഈ പ്രതിസന്ധിയെത്തുടർന്ന് സ്മാർട്ട്ഫോണുകൾക്ക് പുറമെ ഇലക്ട്രിക് വാഹനങ്ങൾ, ആർട്ടിഫിഷ്യൽ ഇന്റലിജൻസ് ഹാർഡ്‌വെയർ, റോബോട്ടിക്സ് എന്നീ മേഖലകളിലേക്കും കമ്പനി പ്രവർത്തനം വ്യാപിപ്പിക്കുകയുണ്ടായി. ഹുറുൻ റിപ്പോർട്ട് പ്രകാരം ചൈനയിലെ ഏറ്റവും സമ്പന്നരായ 50 വനിതകളിൽ 65 ശതമാനം പേരും സ്വന്തം കഠിനാധ്വാനം കൊണ്ട് ഉയർന്നുവന്നവരാണ്.

ഇവരുടെ ആകെ സമ്പത്ത് 1.93 ട്രില്യൺ യുവാനിലെത്തിയിട്ടുണ്ട്. ഹുറുൻ്റെ മൊത്തത്തിലുള്ള ചൈനീസ് ശതകോടീശ്വരന്മാരുടെ പട്ടികയിൽ ഷൗവും ഭർത്താവും 33-ാം സ്ഥാനത്താണ്.

670 ശതകോടി യുവാൻ ആസ്തിയുള്ള ബൈറ്റ്ഡാൻസ് സ്ഥാപകൻ ഷാങ് യിമിങ് ആണ് ഈ പട്ടികയിൽ ഒന്നാം സ്ഥാനത്തുള്ളത്.