എയർ ഇന്ത്യ എക്സ്പ്രസ് പശ്ചിമേഷ്യൻ സർവീസുകൾ പുനരാരംഭിച്ചു; വിമാന ടിക്കറ്റ് നിരക്കിൽ ഇളവുമായി എയർ ഇന്ത്യ

പശ്ചിമേഷ്യയിലേക്കുള്ള മുഴുവൻ വിമാന സർവീസുകളും പുനരാരംഭിച്ചതായി എയർ ഇന്ത്യ എക്സ്പ്രസ് അറിയിച്ചു. ഇതിന്റെ ഭാഗമായി കോഴിക്കോട് നിന്നുള്ള സലാല, കുവൈത്ത് സെക്ടറുകളിലെ വിമാന സർവീസുകൾ വീണ്ടും പ്രവർത്തനം തുടങ്ങി.

സലാല സർവീസുകൾ ഇന്നലെ മുതൽ ആരംഭിച്ചപ്പോൾ, കോഴിക്കോട് – കുവൈത്ത് സർവീസുകൾ ഇന്നും, ബെംഗളൂരു – കുവൈത്ത് സർവീസുകൾ നാളെയും പുനരാരംഭിക്കും. പുതിയ സമയക്രമം അനുസരിച്ച് ചൊവ്വ, വ്യാഴം ദിവസങ്ങളിൽ രാവിലെ 11ന് കോഴിക്കോട് നിന്ന് സലാലയിലേക്കും ഉച്ചകഴിഞ്ഞ് 2.15ന് തിരികെ കോഴിക്കോട്ടേക്കും വിമാനം സർവീസ് നടത്തും.

കോഴിക്കോട് – കുവൈത്ത് വിമാനം വെള്ളി രാവിലെ 7.30ന് കോഴിക്കോട് നിന്ന് പുറപ്പെടും. കുവൈത്തിൽ നിന്ന് 11.05ന് തിരിച്ച് വൈകിട്ട് 6.50ന് കോഴിക്കോട് എത്തും.

ബെംഗളൂരു – കുവൈത്ത് സർവീസ് വെള്ളി പുലർച്ചെ 2.25ന് പുറപ്പെട്ട് രാവിലെ 4.50ന് കുവൈത്തിലെത്തും. മടക്കയാത്ര രാവിലെ 5.50ന് ആരംഭിക്കുന്ന വിമാനം ഉച്ചയ്ക്ക് 1.25ന് ബെംഗളൂരുവിലെത്തും.

അടുത്ത ഘട്ടമായി 5 മുതൽ കോഴിക്കോട് – കുവൈത്ത് സെക്ടറിൽ ആഴ്ചയിൽ മൂന്ന് സർവീസുകൾ വീതം ഉണ്ടാകും. ബുധൻ, വെള്ളി, ഞായർ ദിവസങ്ങളിൽ പുലർച്ചെ 2.15ന് കോഴിക്കോട് നിന്നും രാവിലെ 5.50ന് തിരിച്ചും സർവീസ് ലഭ്യമാകും.

7 മുതൽ ബെംഗളൂരു – കുവൈത്ത് റൂട്ടിലും ആഴ്ചയിൽ മൂന്ന് ദിവസമായി സർവീസ് ഉയർത്തും. തിങ്കൾ, ചൊവ്വ, ശനി ദിവസങ്ങളിലായിരിക്കും ഈ സർവീസുകൾ.

മസ്കത്തിലേക്കുള്ള സർവീസുകളും ബെംഗളൂരുവിൽ നിന്ന് പുനരാരംഭിച്ചിട്ടുണ്ട്. അതേസമയം, വിമാന ഇന്ധനവിലയിൽ ഉണ്ടായ കുറവിനെത്തുടർന്ന് എയർ ഇന്ത്യ തങ്ങളുടെ ഇന്ധന സർചാർജുകളിൽ ഇളവ് പ്രഖ്യാപിച്ചു.

ഇതനുസരിച്ച് നോർത്ത് അമേരിക്ക, യൂറോപ്പ് സെക്ടറുകളിലേക്കുള്ള ടിക്കറ്റ് നിരക്കിൽ കുറവുണ്ടാകും. പശ്ചിമേഷ്യൻ സംഘർഷ സാഹചര്യത്തെത്തുടർന്ന് ഏപ്രിൽ ഏഴിനാണ് ഈ സർചാർജ് വർധിപ്പിച്ചിരുന്നത്.

പുതിയ പരിഷ്കാരം പ്രകാരം നോർത്ത് അമേരിക്ക, ഓസ്ട്രേലിയ സർവീസുകളുടെ ഇന്ധന സർചാർജ് 280 ഡോളറിൽ നിന്ന് 200 ഡോളറായി കുറച്ചു. യൂറോപ്പ്, ബ്രിട്ടൻ സർവീസുകളുടേത് 205 ഡോളറിൽ നിന്ന് 125 ഡോളറുമായി കുറഞ്ഞു.

ഈ പുതുക്കിയ നിരക്കുകൾ ജൂലൈ ഒന്ന് മുതൽ പ്രാബല്യത്തിൽ വന്നു.